![](https://pppkhmer.sgp1.digitaloceanspaces.com/image/main/field/image/000_hkg8296450.jpg)
លោក Kan Zaw ជាបុគ្គលម្នាក់ ក្នុងចំណោមទាំង ១៩ នាក់ នៅមីយ៉ាន់ម៉ា ដែលត្រូវបានដាក់ទណ្ឌកម្ម ដោយ EU។ AFP
សហភាពអឺរ៉ុប (EU) កាលពីថ្ងៃអង្គារ ទី ៨ ខែវិច្ឆិកា បានដាក់ទណ្ឌកម្មលើមន្ត្រីជាន់ខ្ពស់ និងមន្ត្រីកងកម្លាំងប្រដាប់អាវុធជាច្រើននាក់ នៅក្នុងប្រទេសមីយ៉ាន់ម៉ា ដែលក្រុមយោធាឡើងគ្រប់គ្រង តាមរយៈរដ្ឋ-ប្រហារ កាលពីឆ្នាំមុន ហើយបង្កអំពើហិង្សាទូទាំងប្រទេស។
ក្នុងវិធានការចុងក្រោយនេះ EU បានបង្កកទ្រព្យសម្បត្តិ និងការធ្វើដំណើរចូលអឺរ៉ុបរបស់បុគ្គលចំនួន ១៩ នាក់ រួមទាំងរដ្ឋមន្ត្រីវិនិយោគ និងទំនាក់ទំនងសេដ្ឋកិច្ចបរទេស លោក Kan Zaw និងប្រធានយុត្តិធម៌ នៅតុលាការកំពូលរបស់មីយ៉ាន់ម៉ា មេទ័ពកំពូល និងពាណិជ្ជករ ដែលមានទំនាក់ទំនងជាមួយកងកម្លាំងប្រដាប់អាវុធ។
ប្លុកនៃរដ្ឋទាំង ២៧ ក៏បានបង្កកទ្រព្យសម្បត្តិរបស់ក្រុមប្រឹក្សារដ្ឋបាលរដ្ឋ (SAC) របស់មីយ៉ាន់ម៉ា នៅ EU ផងដែរ។ ទីស្នាក់ការកណ្តាលរបស់ EU បានលើកឡើងនៅក្នុងសេចក្តី-ថ្លែងការណ៍ថា៖ «ក្រុមប្រឹក្សា SAC ដែលបង្កើតឡើង ក្នុងខែកុម្ភៈ ឆ្នាំ ២០២១ ពោលគឺបន្ទាប់ពីរដ្ឋប្រហារយោធា ត្រូវទទួលខុសត្រូវ ចំពោះគោលនយោបាយ និងសកម្មភាព ដែលបំផ្លាញលទ្ធិប្រជាធិបតេយ្យ និងនីតិរដ្ឋ»។
ប្រទេសមីយ៉ាន់ម៉ា បានធ្លាក់ចូលទៅក្រោមការគ្រប់គ្រងយោធាដ៏តឹងរ៉ឹងអស់រយៈពេល ៥ ទសវត្សរ៍ ដែលធ្វើឱ្យប្រទេសនេះមានភាពឯកោជាអន្តរជាតិ និងរងដោយទណ្ឌកម្ម។ នៅពេលក្រុមយោធាបន្ធូរបន្ថយអំណាច លោកស្រី អ៊ុងសាន ស៊ូជី ក៏បានក្លាយជាមេដឹកនាំ ក្នុងការបោះឆ្នោត នាឆ្នាំ ២០១៥ ហើយសហគមន៍អន្តរជាតិភាគច្រើន ក៏ដកទណ្ឌកម្មវិញ ហើយបង្កើនការវិនិយោគ។
ប៉ុន្តែសភាពធូរស្បើយរបស់មីយ៉ាន់ម៉ា បានបញ្ចប់ទៅវិញត្រឹមថ្ងៃទី ១ ខែកុម្ភៈ ឆ្នាំ ២០២១ ពេលដែលកងកម្លាំងប្រដាប់អាវុធធ្វើរដ្ឋប្រហារ ព្រមទាំងច្រានចោលលទ្ធផលបោះឆ្នោត ឆ្នាំ ២០២០ ដែលគណបក្សសម្ព័ន្ធជាតិដើម្បីប្រជាធិបតេយ្យរបស់លោកស្រី អ៊ុងសាន ស៊ូជី បានឈ្នះភ្លូកទឹកភ្លូកដី។
ទោះយ៉ាងណា រដ្ឋប្រហារបាននាំឱ្យការតវ៉ាទ្រង់ទ្រាយធំទូទាំងប្រទេសផ្ទុះឡើង ហើយក៏បង្កើតឱ្យកងកម្លាំងតស៊ូប្រដាប់អាវុធ ប្រឆាំងរបបយោធាផងដែរ។ ប៉ុន្តែការប្រឆាំងទាំងនេះ ត្រូវរងហិង្សាយ៉ាងចាស់ដៃពីក្រុមយោធា ដែលសម្លាប់ជនស៊ីវិលរាប់ពាន់នាក់ ខណៈមនុស្សរាប់ម៉ឺននាក់ ត្រូវបានចាប់ខ្លួន។
សេចក្ដីថ្លែងការណ៍របស់ EU បានលើកឡើងថា៖ «អឺរ៉ុបមានការព្រួយបារម្ភយ៉ាងខ្លាំងពីការបន្តកើនឡើងនៃអំពើហិង្សា និងការវិវឌ្ឍឆ្ពោះទៅរកជម្លោះអូសបន្លាយ ដែលរាលដាលពាសពេញប្រទេស និងមានផលប៉ះពាល់ទូទាំងតំបន់»។
ប្លុកក៏បានប្ដេជ្ញាចិត្តផងដែរថា នឹងខិតខំរកយុត្តិធម៌ ដោយឱ្យដល់អ្នក ដែលទទួលខុសត្រូវ ចំពោះការរំលោភសិទ្ធិមនុស្ស ឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិ ចាប់តាំងពីរដ្ឋប្រហារ ត្រូវទទួលទោស។
បូករួមទាំងទណ្ឌកម្មថ្មីនេះ បុគ្គលចំនួន ៨២ នាក់ និងអង្គ-ភាពចំនួន ១១ ដូចជាទីភ្នាក់ងារ ក្រុមហ៊ុន ឬអង្គការនានា ឥឡូវនេះ ត្រូវជាប់ទណ្ឌកម្ម។ ប្លុកអឺរ៉ុប ក៏រឹតត្បឹតលើការនាំចេញអាវុធ ក៏ដូចជាឧបករណ៍ ដែលអាចប្រើសម្រាប់ការគាបសង្កត់ ក្នុងប្រទេស ឬសម្រាប់ការត្រួតពិនិត្យទំនាក់ទំនង ដែលផ្គត់ផ្គង់ឱ្យក្រុមយោធាផងដែរ៕
វីដេអូ៖