មនុស្សរាប់លាននៅប្រទេសអ៊ុយក្រែន ជាពិសេសរដ្ឋធានីកៀវ កំពុងប្រឈមនឹងអាកាសធាតុចុះត្រជាក់ខ្លាំង ចាប់តាំងពីថ្ងៃអាទិត្យ ខណៈដែលរុស្ស៊ីបង្កើនការបាញ់ផ្លោងមីស៊ីល ដើម្បីផ្តាច់ហេដ្ឋារចនាសម្ព័ន្ធថាមពល ក្នុងបំណងបង្ខំអ៊ុយក្រែនឱ្យងាកទៅរកការចរចា។
ការធ្លាក់ព្រិលខ្លាំង ត្រូវគេរំពឹងថា កើតមានចាប់ផ្តើម ចាប់តាំងពីថ្ងៃអាទិត្យ នៅក្នុងទីក្រុងកៀវ រដ្ឋធានីរបស់ប្រទេសអ៊ុយក្រែន ជាមួយនឹងសីតុណ្ហភាពធ្លាក់ចុះត្រជាក់ខ្លាំង រហូតដល់ក្រោមចំណុចកក ដែលមានទាំងថ្ងៃទាំងយប់ ស្របពេលដែលហេដ្ឋារចនាសម្ព័ន្ធថាមពល ត្រូវរងផលប៉ះពាល់ខ្លាំង ដោយសារការបាញ់មីស៊ីលពីសំណាក់ភាគីរុស្ស៊ី។
គិតត្រឹមថ្ងៃអាទិត្យ តាមសេចក្តីរាយការណ៍របស់រ៉យទ័រ មនុស្សរាប់លាននាក់ ដែលនៅតែរស់នៅក្នុង និងជុំវិញរដ្ឋធានីអ៊ុយក្រែន ដែលមានភ្លើង និងកំដៅតិចតួចប៉ុណ្ណោះ។ កាលពីថ្ងៃសៅរ៍ ប្រតិបត្តិករបណ្តាញអគ្គិសនី Ukrenergo ដែលត្រូវបានដកស្រង់សម្ដីដោយរ៉យទ័រ បានអះអាងថា ខ្លួនអាចគ្របដណ្តប់បានតែ ៣/៤ នៃតម្រូវការប្រើប្រាស់ប៉ុណ្ណោះ ដែលទាមទារឱ្យមានការរឹតបន្តឹង និងការដាច់ភ្លើង នៅទូទាំងប្រទេស។
លោក Sergey Kovalenko ប្រធានផ្នែកប្រតិបត្តិការរបស់ YASNO ដែលផ្តល់ថាមពលឯកជនធំបំផុតដល់ប្រទេសអ៊ុយក្រែន ក៏ដូចជាដល់ទីក្រុងកៀវ បាននិយាយថា ស្ថានភាពនៅក្នុងទីក្រុងមានភាពប្រសើរឡើង ប៉ុន្តែនៅតែ «ពិបាកណាស់»។ លោកបានបញ្ជាក់ថា ប្រជាពលរដ្ឋគួរមានថាមពលយ៉ាងហោច ៤ ម៉ោង ក្នុង ១ ថ្ងៃ។
លោក Kovalenko បានសរសេរនៅលើទំព័រហ្វេសប៊ុករបស់គាត់ថា៖ «ប្រសិនបើអ្នកមិនមានអគ្គិសនីយ៉ាងហោចណាស់ ៤ ម៉ោងក្នុង ១ ថ្ងៃ សូមសរសេរទៅកាន់ DTEK Kyiv Electric Networks សហការីនឹងជួយដោះស្រាយបញ្ហានោះជាអ្វី»។
ប្រធានាធិបតី វ៉ុលឌីមៀរ ហ្សេលេនស្គី (Volodymyr Zelensky) បាននិយាយថា មនុស្ស ៦ លាននាក់គ្មានអគ្គិសនី កាលពីថ្ងៃសុក្រ បន្ទាប់ពីការទម្លាក់គ្រាប់បែកចុងក្រោយបង្អស់របស់រុស្ស៊ី កាលពីសប្តាហ៍មុនមកនេះ។ នៅក្នុងការឈ្លោះ ដែលត្រូវបានដឹងជាសាធារណៈដ៏កម្រមួយពាក់ព័ន្ធនឹងមេដឹកនាំអ៊ុយក្រែន លោក ហ្សេលេនស្គី កាលពីថ្ងៃសុក្រ បានរិះគន់អភិបាលក្រុងកៀវ ចំពោះការធ្វើអ្វី ដែលលោក រិះគន់ថា ជា«ការងារដ៏កម្សោយ» ក្នុងការរៀបចំជម្រកសង្គ្រោះបន្ទាន់ ដើម្បីជួយអ្នកដែលគ្មានថាមពល និងកំដៅបន្ទាប់ពីការវាយប្រហាររបស់រុស្ស៊ី។
យោងតាមរ៉យទ័រ ភាគីរុស្ស៊ីនិយាយថា ការបាញ់ប្រហារដោយមីស៊ីលនោះ ខ្លួនមិនបានកំណត់គោលដៅលើប្រជាជនស៊ីវិលទេ ខណៈដែលវិមានក្រឹមឡាំង បាននិយាយថា ការវាយប្រហាររបស់ទីក្រុងម៉ូស្គូលើហេដ្ឋារចនាសម្ព័ន្ធថាមពល គឺជាផលវិបាកនៃទីក្រុងកៀវ ដែលមិនមានបំណងចរចា។
ដោយសារការបាញ់ប្រហារដោយមីស៊ីលនោះ វាបានធ្វើឱ្យខូចខាតយ៉ាងធ្ងន់ធ្ងរបំផុតមកទល់ពេលនេះលើអ៊ុយក្រែន ដោយធ្វើឱ្យមនុស្សរាប់លាននាក់ គ្មានភ្លើង ទឹក ឬកំដៅ។ ប្រតិបត្តិករអគ្គិសនីអ៊ុយក្រែន Ukrenergo បានឱ្យដឹងថា ការដាច់ភ្លើងនឹងបន្ត ហើយជំរុញឱ្យមានការប្រើប្រាស់ថាមពលមានកំណត់។
វាបាននិយាយនៅក្នុងសេចក្តីថ្លែងការណ៍មួយនៅលើកម្មវិធីផ្ញើសារ Telegram ថា៖ «យើងចង់រំឭកអ្នកថា ឥឡូវនេះ រាល់ជនជាតិអ៊ុយក្រែន ដែលផ្ទះរបស់ពួកគេមានអគ្គិសនីប្រើប្រាស់ឡើងវិញ អាចជួយស្ដារវាដល់អ្នកដទៃ បានលឿនជាងមុន ដោយគ្រាន់តែប្រើប្រាស់អគ្គិសនីតិចតួចប៉ុណ្ណោះ»។
ព្រិលត្រូវបានគេរំពឹងថា នឹងបន្តនៅក្នុងទីក្រុងកៀវ ដែលជាទីក្រុងដែលមានប្រជាជានចំនួន ២,៨លាននាក់ មុនពេលសង្គ្រាម រហូតដល់ពាក់កណ្តាលសប្តាហ៍ ខណៈដែលសីតុណ្ហភាពត្រូវបានព្យាករថា នឹងនៅទាបជាងចំណុចកកទៅទៀត។
ដូចការសន្យាមុនរដូវត្រជាក់មកដល់របស់ប្រទេសជប៉ុន ក្នុងការជួយអ៊ុយក្រែនលើថាមពលកំដៅ ក្រសួងការបរទេសជប៉ុន បាននិយាយនៅក្នុងសេចក្តីថ្លែងការណ៍ កាលពីសប្តាហ៍មុនថា រដ្ឋាភិបាលជប៉ុនបានសម្រេចចិត្តនៅថ្ងៃទី២២ ខែវិច្ឆិកា ក្នុងការផ្តល់ជំនួយសង្គ្រោះបន្ទាន់ប្រហែល ២,៥៧ លានដុល្លារ ដើម្បីគាំទ្រដល់ការរៀបចំវិស័យថាមពលអ៊ុយក្រែន សម្រាប់រដូវរងារ។
ប្រព័ន្ធផ្សព្វផ្សាយអ៊ុយក្រែន បានដកស្រង់សេចក្តីថ្លែងការណ៍ថា៖ «រដ្ឋាភិបាលជប៉ុន នឹងជួយអ៊ុយក្រែន តាមរយៈការិយាល័យឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR) ដោយផ្តល់ម៉ាស៊ីនភ្លើង និងចង្កៀងថាមពលពន្លឺព្រះអាទិត្យដល់អ៊ុយក្រែន»។
សេចក្តីថ្លែងការណ៍ បានឱ្យដឹងថា រដ្ឋាភិបាលជប៉ុន នឹងបន្តជួយ និងគាំទ្រប្រជាជនអ៊ុយក្រែន ដែលកំពុងជួបការលំបាក រួមជាមួយ G7 និងសមាជិកដទៃទៀតនៃសហគមន៍អន្តរជាតិ។
ដូចការរំពឹងរបស់អ្នកវិភាគជាច្រើន ក្នុងពេលកន្លងមក រុស្ស៊ីនឹងប្រើពេលក្នុងរដូវត្រជាក់នេះ សម្រាប់យកឈ្នះសង្គ្រាមនៅអ៊ុយក្រែន ដើម្បីបង្ខំឱ្យអ៊ុយក្រែនងាកទៅរកតុចរចាបញ្ចប់សង្គ្រាម ប៉ុន្តែអ៊ុយក្រែនដឹកនាំដោយប្រធានាធិបតី លោក វ៉ូឡូឌីមៀរ ហ្សេលេនស្គី បានប្តេជ្ញារួចហើយ នឹងមិនចរចាដាច់ខាតរហូតដល់រំដោះទឹកដីរបស់ខ្លួនទាំងអស់មកវិញ រួមទាំងតំបន់គ្រីមា ដែលរុស្ស៊ីកាន់កាប់ តាំងពីឆ្នាំ ២០១៤ នោះផងដែរ៕
វីដេអូ៖