ប្រធានបុគ្គលិកនៃកងកម្លាំងអវកាសអាមេរិក លោកស្រី Nina Armagno បានព្រមាន នៅថ្ងៃចន្ទ ទី ២៨ ខែវិច្ឆិកាថា ការរីកចម្រើនយ៉ាងឆាប់រហ័សផ្នែកសមត្ថភាពយោធារបស់ប្រទេសចិន បង្កើនហានិភ័យដល់ឧត្តមភាពរបស់អាមេរិក នៅក្នុងលំហអាកាស។
លោកស្រី Armagno បានថ្លែងក្នុងកម្មវិធីមួយនៅទីក្រុងស៊ីដនី ដែលរៀបចំដោយអង្គការស្រាវជ្រាវអូស្ត្រាលី Australian Strategic Policy Institute ថា ទីក្រុងប៉េកាំងបានធ្វើឱ្យមានការវិវឌ្ឍយ៉ាងសំខាន់ផ្នែកបច្ចេកវិទ្យាអវកាសយោធា ដូចជាលើវិស័យទំនាក់ទំនងផ្កាយរណប និងយានអវកាសដែលអាចប្រើឡើងវិញបាន ដែលអនុញ្ញាតឱ្យប្រទេសផ្សេងៗទៀតបង្កើនកម្មវិធីអវកាសរបស់ខ្លួនយ៉ាងឆាប់រហ័សទៅតាមនោះដែរ។
លោកស្រី Armagno បានលើកឡើងយ៉ាងដូច្នេះថា៖ «ខ្ញុំគិតថា វាអាចទៅរួចទាំងស្រុង ដែលពួកគេអាចតាមទាន់ និងដើរលើសពួកយើង។ វឌ្ឍនភាពដែលពួកគេបានធ្វើ គឺពិតជាអស្ចារ្យ លឿនគួរឱ្យភ្ញាក់ផ្អើល»។
គេកត់សម្គាល់ថា ទីក្រុងប៉េកាំងបានធ្វើឱ្យមានការជឿនលឿនលើផ្នែកអវកាសរបស់ខ្លួនគួរឱ្យភ្ញាក់ផ្អើល ក្នុងរយៈពេលប៉ុន្មានឆ្នាំថ្មីៗនេះ ហើយវាជាការវិវឌ្ឍដ៏សំខាន់របស់ចិន ដើម្បីចូលរួមប្រកួតប្រជែងជាមួយអាមេរិក និងរុស្ស៊ី ដែលប្រណាំងគ្នារាប់ទសវត្សរ៍លើវិស័យអវកាស។
កន្លងមក ប្រធានកម្មវិធីរុករកព្រះចន្ទចិន លោក Ye Peijian បានប្រដូចព្រះច័ន្ទ និងភពព្រះអង្គារ ដែលខ្លួនបានដាក់យានរុករក ទៅនឹងកោះមានជម្លោះ ក្នុងសមុទ្រចិនខាងត្បូង ដែលទីក្រុងប៉េកាំង កំពុងព្យាយាមទាមទារការកាន់កាប់។ បច្ចុប្បន្ននេះ ចិនក៏កំពុងអភិវឌ្ឍបច្ចេកវិទ្យាពិសោធន៍ ដើម្បីទាញយកធនធានធម្មជាតិលើការស្រាវជ្រាវផ្នែកអវកាសរបស់ខ្លួន។
តាមរយៈនេះ លោកស្រី Armagno បាននិយាយថា ចិនគឺជាប្រទេសតែ ១ គត់ ដែលមានចេតនារៀបចំសណ្តាប់ធ្នាប់អន្តរជាតិឡើងវិញតាមបែបខ្លួន ហើយបង្កើនអំណាចសេដ្ឋកិច្ច ការទូត យោធា និងបច្ចេកវិទ្យា ដើម្បីសម្រេចបាននូវគោលបំណងនោះ។
លោកស្រី Armagno បន្តថា រួមជាមួយរុស្ស៊ី ប្រទេសចិនក៏បានធ្វើការសាកល្បងមីស៊ីល«ដោយមិនប្រុងប្រយ័ត្ន» ដែលបានបង្កើតបរិមាណដ៏គ្រោះថ្នាក់នៃកម្ទេចកម្ទីអវកាស ក្នុងរយៈពេលប៉ុន្មានឆ្នាំថ្មីៗនេះ។ មន្ត្រីអាមេរិកដដែល បន្ថែមយ៉ាងដូច្នេះថា៖ «វាលកម្ទេចកម្ទីទាំងនេះ បានគំរាមកំហែងដល់ប្រព័ន្ធលម្ហអាកាស ហើយប្រព័ន្ធទាំងនេះមានសារៈ សំខាន់ ចំពោះសន្តិសុខ សេដ្ឋកិច្ច និងផលប្រយោជន៍វិទ្យាសាស្ត្រ សម្រាប់គ្រប់ប្រទេសទាំងអស់»៕
វីដេអូ៖