.jpg)
មនុស្សម្នា នាំគ្នាស្រែក ពេលប្រមូលផ្តុំគ្នាតវ៉ាប្រឆាំងនឹងគោលនយោបាយសូន្យកូវីដរបស់ចិន នៅតាមផ្លូវ ក្នុងទីក្រុងសៀងហៃ កាលពីថ្ងៃទី ២៧ ខែវិច្ឆិកា។ AFP
ប្រជាជនចិនរាប់ពាន់នាក់ចេញធ្វើបាតុកម្មតវ៉ាប្រឆាំងនឹងគោលនយោបាយបិទខ្ទប់ «សូន្យកូវីដ» នៅតាមបណ្ដាទីក្រុងនានាទូទាំងប្រទេសចិន កាលពីចុងសប្ដាហ៍ និងបន្តដល់ព្រឹកថ្ងៃចន្ទ ទី ២៨ ខែវិច្ឆិកា ដោយក្រុមបាតុករ នៅកន្លែងខ្លះ ថែមទាំងបានស្រែកទាមទារឱ្យលោកប្រធានាធិបតី ស៊ី ជីនភីង ចុះចេញពីតំណែងទៀតផង។
គិតត្រឹមរសៀលថ្ងៃអាទិត្យ ការតវ៉ាទ្រង់ទ្រាយធំ បានធ្វើឡើងនៅក្រុងធំៗ រួមមានសៀងហៃ ប៉េកាំង Chengdu Guangzhou និងក្រុង Wuhan ជាដើម។ បើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ ក្រុមបាតុករយ៉ាងហោចណាស់ ១ ០០០ នាក់ បានធ្វើការប្រមូលផ្ដុំគ្នាជាថ្មី នៅព្រឹកថ្ងៃចន្ទនេះ ប៉ុន្តែមិនទាន់មានសេចក្ដីរាយការណ៍ណាមួយ ពីចំនួនក្រុមបាតុករ ដែលត្រូវរងគ្រោះ ដោយសារការប៉ះទង្គិចគ្នាជាមួយ ឬត្រូវចាប់ខ្លួន ដោយអាជ្ញាធរចិន នៅទូទាំងប្រទេសនោះទេ។
នៅសៀងហៃ ដែលមានអ្នកតវ៉ាជាង ៣០០ នាក់ ប្រមូលផ្ដុំគ្នា នៅថ្ងៃសៅរ៍ និងជាទីក្រុងមួយ ក្នុងចំណោមទីក្រុងចិនធំៗ ដែលការតវ៉ាផ្ទុះឡើងនោះ ក្រុមបាតុករស្រែកថា៖ «ចុះចេញ ស៊ី ជីនភីង! ចុះចេញ បក្សកុម្មុយនីស្ត!»។
ជាមួយគ្នានេះដែរ ការរាយការណ៍ពីសារព័ត៌មានផ្សេងៗ និងខ្សែវីដេអូជាច្រើនពីកន្លែងតវ៉ា នៅតាមទីក្រុងខុសៗគ្នា បង្ហាញថា ក្រុមអ្នកតវ៉ាមិនត្រឹមតែទាមទារឱ្យលោក ស៊ី ឬបក្សកុម្មុយនីស្តរបស់លោកចុះចេញប៉ុណ្ណោះទេ ប៉ុន្តែពួកគេ ក៏បានស្រែកដែរថា «មិនចង់បានការធ្វើតេស្តកូវីដទេ តែចង់បានសេរីភាព!» «មិនចង់បានរបបផ្តាច់ការទេ ចង់បានលទ្ធិប្រជាធិបតេយ្យ!» និង «បើកស៊ីនជាំង បើកចិនវិញ!» ជាដើម។
បាតុកម្មដ៏កម្រ នៅចិនបែបនេះ ផ្ទុះឡើងចាប់តាំងពីថ្ងៃសុក្រ បន្ទាប់ពីមានអគ្គិភ័យដ៏សាហាវមួយ ឆាបឆេះលើអាផាតមិន នៅតំបន់ស៊ីនជាំង កាលពីថ្ងៃព្រហស្បតិ៍ និងសម្លាប់មនុស្សយ៉ាងហោចណាស់ ១០ នាក់។ ក្រុមបាតុករបានកាន់ទុក្ខជនរងគ្រោះដែលស្លាប់នៅក្នុងអគ្គិភ័យនេះ និងបង្ហាញការខឹងសម្បារបស់ខ្លួនទៅលើការបិទខ្ទប់ «សូន្យកូវីដ» បន្ទាប់ពីវីដេអូផ្សេងៗពីកន្លែងកើតហេតុ បង្ហាញថា វិធានការដ៏តឹងរ៉ឹងនេះ បានពន្យារពេលក្រុមអ្នកពន្លត់អគ្គិភ័យ ក្នុងការធ្វើប្រតិបត្តិការជួយស ្រេង្គាះរបស់ខ្លួន និងធ្វើឱ្យជនរងគ្រោះពិបាករត់ចេញ។ ទោះជាប៉ូលិសបានបដិសេធនូវកំហុសទាំងនេះក៏ដោយ អគ្គិភ័យ នៅស៊ីនជាំងនេះ ក្លាយជាប្រធានបទស្នូលរបស់ក្រុមអ្នកតវ៉ា។
បើតាមសេចក្ដីរាយការណ៍របស់បណ្ដាញព័ត៌មាន CNN ការតវ៉ាបានបន្តតានតឹងមកទល់យប់ថ្ងៃអាទិត្យឈានចូលថ្ងៃចន្ទ ទី ២៨ ខែវិច្ឆិកា។ រាប់តាំងពីទីក្រុងសៀងហៃ រហូតដល់រដ្ឋធានីប៉េកាំងក្រុមអ្នកវ៉ា បានស្រែកប្រឆាំងនឹងការបិទខ្ទប់សូន្យកូវីដ និងអំពាវនាវសុំសេរីភាព និងលទ្ធិប្រជាធិបតេយ្យ។
តាមបរិវេណសាកលវិទ្យាល័យចិនរាប់សិបផ្សេងទៀត ក្រុមនិស្សិតក៏បានធ្វើបាតុកម្ម ឬដាក់ផ្ទាំងបដា ដើម្បីតវ៉ាដូចគ្នានេះផងដែរ ក្នុងរូបភាពនយោបាយមួយដ៏រសើបសម្រាប់បក្សកុម្មុយនីស្ត ដែលធ្លាប់ប្រឈមមុខនឹងការតវ៉ាគាំទ្រលទ្ធិប្រជាធិបតេយ្យដ៏ធំ នៅទីលានធានអានមេន ដែលដឹកនាំដោយនិស្សិត ក្នុងឆ្នាំ ១៩៨៩។
ជិត ៣ ឆ្នាំ ចាប់តាំងពីកូវីដ ១៩ ផ្ទុះឡើង ចិននៅតែប្រកាន់ខ្ជាប់គោលនយោបាយសូន្យកូវីដ ដើម្បីទប់ស្កាត់ការរីករាលដាល ដោយនិយាយថា វាជាវិធានការការពារជីវិតប្រជាជនជាធំ និងសំខាន់សម្រាប់ប្រព័ន្ធសុខាភិបាល។ ពីដំបូងឡើយ វាមានប្រសិទ្ធភាពខ្ពស់ ខណៈប្រទេសផ្សេងៗទៀត ជាពិសេសលោកខាងលិច មានអត្រានៃការឆ្លង និងស្លាប់ដោយសារកូវីដ ខ្ពស់កប់ពពក៕
វីដេអូ៖
