អង់គ្លេសបានបញ្ចេញប្រតិកម្មយ៉ាងខ្លាំងចំពោះការចាប់ខ្លួនអ្នកកាសែតរបស់សារព័ត៌មាន BBC គឺលោក អេដ ឡរិន (Ed Lawrence)។ នៅថ្ងៃអង្គារ ទី ២៩ វិច្ឆិកា ឆ្នាំ ២០២២ អង់គ្លេសបានកោះហៅឯកអគ្គរដ្ឋទូតចិនប្រចាំនៅទីក្រុងឡុង ដ៍ដើម្បីបង្ហាញពីការមិនពេញចិត្តជាខ្លាំងរបស់ខ្លួនទាក់ទិននឹងការចាប់ខ្លួន និងការរំលោភបំពានលើលោកឡរិនដែលបានទៅយកព័ត៌មាននៅកន្លែងធ្វើបាតុកម្មក្នុងទីក្រុងសៀងហៃ។
ឯកអគ្គរដ្ឋទូតចិនប្រចាំនៅទីក្រុងឡុងដ៍លោក ចាង ស៊េកវេង (Zheng Zeguang) ត្រូវបានកោះហៅទៅកាន់ការិយា ល័យការបរទេសពាក់ព័ន្ធរឿងរ៉ាវចាប់ខ្លួនលោកឡរិនដែលរដ្ឋមន្ត្រីការបរទេសអង់គ្លេសចាត់ទុកថា ជារឿងគួរឱ្យព្រួយបារម្ភខ្លាំង។
ដោយបញ្ជាក់ពីការកោះហៅឯកអគ្គរដ្ឋទូតចិនលោកប្រមុខការបរទេសអង់គ្លេស ជេមស៍ ក្លេវឺលី (James Cleverly) បានប្រាប់ក្រុមអ្នកយកព័ត៌មាននៅឯកិច្ចប្រជុំរបស់អង្គការអូតង់ក្នុងប្រទេសរូម៉ានីថា៖ «វាពិតជាមានសារៈសំខាន់ខ្លាំងណាស់ ដែលយើងត្រូវការពារសេរីភាពសារព័ត៌មាន»។ «វាមានសារៈសំខាន់មែនទែន ដែលអ្នកសារព័ត៌មានអាចធ្វើការងាររបស់ពួកគេបានដោយគ្មានការរំខាន និងដោយគ្មានការភ័យខ្លាចចំពោះការវាយប្រហារ»។
គួរជ្រាបថាអ្នកសារព័ត៌មានរបស់ BBC លោក ឡរិន ត្រូវបានប៉ូលិសចិនចាប់យកទៅបាត់កាលពីថ្ងៃអាទិត្យ ខណៈដែលកំពុងថតសកម្មភាពតវ៉ាប្រឆាំងនឹងវិធានការរឹតបន្តឹងជំងឺកូវីដនៅក្នុងទីក្រុងសៀងហៃ។ បាតុកម្មនេះ គឺជាចលនាតវ៉ាមួយក្នុងចំណោមការប្រឆាំងតវ៉ាជាច្រើនដែលបានអង្រួនប្រទេសចិន ក្នុងរយៈពេលប៉ុន្មានថ្ងៃថ្មីៗនេះ។
ភ្លាមៗក្រោយអ្នកកាសែតសារព័ត៌មាន BBC ត្រូវបានចាប់ខ្លួនប្រទេសអង់គ្លេស បានបញ្ចេញប្រតិកម្មយ៉ាងខ្លាំង ហើយ BBC បានឱ្យដឹងថា អ្នកសារព័ត៌មានរបស់ខ្លួនត្រូវបានវាយដំដោយប៉ូលិសមុនពេលត្រូវបានដោះលែង។
ពីខាងភាគីចិនវិញ ចិនបានវាយបកតបវិញចំពោះប្រតិកម្មរបស់អង់គ្លេសជុំវិញករណីចាប់ខ្លួនអ្នកកាសែតអស់គ្លេស និងការទាមទារឱ្យប៉ូលិសចិនបង្ហាញការគោរពចំពោះបាតុករប្រឆាំងវិធានការរឹតត្បិតកូវីដ។
មុនពេលលោក ចាង ត្រូវបានកោះហៅអ្នកនាំពាក្យស្ថានទូតចិនធ្លាប់បានលើកឡើងពីអត្រាមរណភាពដោយសារកូវីដក្នុងចំនួនខ្ពស់នៅក្នុងចក្រភពអង់គ្លេស និងបាននិយាយទៀតថា៖ «ភាគីអង់គ្លេសគ្មានសិទ្ធិអីក្នុងការវិនិច្ឆ័យលើ
គោលនយោបាយកូវីដរបស់ចិន ឬកិច្ចការផ្ទៃក្នុងផ្សេងទៀតរបស់ចិនឡើយ»៕