អាជ្ញាធរអាល្លឺម៉ង់ រំពឹងថានឹងអាចធ្វើការចាប់ខ្លួនក្រុមស្ដាំនិយមជ្រុលបន្ថែមទៀតនៅប៉ុន្មានថ្ងៃខាងមុខ ខណៈដែលការស៊ើបអង្កេតស្វែងរកអ្នកដែលជាប់ពាក់ព័ន្ធកំពុងបន្ត។ រដ្ឋអាជ្ញាអាល្លឺម៉ង់ បានលើកឡើងថា ក្រុមស្ដាំជ្រុលនិយមនេះ កំពុងរៀបចំផែនការផ្តួលរំលំរដ្ឋាភិបាល និងតែងតាំងអតីតសមាជិកនៃគ្រួសាររាជវង្សអាល្លឺម៉ង់ម្នាក់ធ្វើជាមេដឹកនាំ។ មិនត្រឹមតែប៉ុណ្ណោះ អតីតសមាជិកសភាមកពីគណបក្សស្តាំនិយម ឬហៅថា គណបក្ស Alternative For Germany (AfD) ក៏ស្ថិតក្នុងចំណោមអ្នកដែលត្រូវបានឃុំខ្លួនផងដែរ។ នេះបើយោងតាមក្រុមរដ្ឋអាជ្ញាអាល្លឺម៉ង់។
លោក Georg Maier រដ្ឋមន្ត្រីក្រសួងមហាផ្ទៃនៃរដ្ឋ Thuringia ភាគខាងកើតប្រទេស អាល្លឺម៉ង់ បានមានប្រសាសន៍ កាលពីថ្ងៃព្រហស្បតិ៍ ថា៖ «ដោយផ្អែកលើបទពិសោធរបស់ខ្ញុំ ជាធម្មតានឹងមានរលកនៃការចាប់ខ្លួនជាលើកទីពីរ»។ គួរដឹងដែរថា មេដឹកនាំផែនការដែលត្រូវបានចោទប្រកាន់ខាងលើនេះ គឺជាខ្សែរាជវង្សមួយរូបដែលមានព្រះនាមថា Prince Heinrich XIII ស្ថិតនៅក្នុងរាជវង្ស Reuss នៅរដ្ឋ Thuringia នៃប្រទេស អាល្លឺម៉ង់។ ទ្រង់មានព្រះជន្មាយុ ៧១ ឆ្នាំ ហើយទ្រង់មានប្រវត្តិធ្វើការជាអ្នកអភិវឌ្ឍអចលនទ្រព្យ។ យ៉ាងណាក៏ដោយ ការិយាល័យព្រះអង្គមិនបានឆ្លើយតបនឹងសំណើសុំការអត្ថាធិប្បាយនោះទេ។
គួររំឭកថា កាលពីថ្ងៃពុធ ជនសង្ស័យចំនួន ២៥ នាក់ ដែលត្រូវជាសមាជិកនិងអ្នកគាំទ្រក្រុមខុសច្បាប់មួយនេះ ត្រូវបានចាប់ឃុំខ្លួនបន្ទាប់ពីក្រុមប៉ូលិស អាល្លឺម៉ង់ បានធ្វើការវាយឆ្មក់ដោយប្រើកងកម្លាំងសន្តិសុខប្រមាណជា ៣ ០០០ នាក់។ ព្រឹត្តិការណ៍នេះ បានធ្វើឱ្យលោក Maier ពិពណ៌នាថា វាជាព្រឹត្តិការណ៍មិនធ្លាប់មានពីមុនមកក្នុងប្រវត្តិសាស្ត្រ អាល្លឺម៉ង់ សម័យទំនើប។ ការរកឃើញក្រុមប៉ុនប៉ង ផ្ដួលរំលំរដ្ឋាភិបាល ជារឿងដ៏ភ្ញាក់ផ្អើលមួយ ដែលកើតមានឡើងនៅក្នុងប្រទេសដែលប្រកាន់លទ្ធិប្រជាធិបតេយ្យ និងដែលមានស្ថិរភាពបំផុត ជាពិសេស ជាប្រទេសដែលមានសេដ្ឋកិច្ចដ៏ធំបំផុតរបស់អឺរ៉ុប។
អ្នកស្រី Melanie Merle រស់នៅជិតផ្ទះល្វែងក្នុងរដ្ឋធានី Frankfurt ដែលជាកន្លែងដែលព្រះអង្គម្ចាស់ Reuss ត្រូវបានចាប់ខ្លួន បាននិយាយថា៖ «វាពិតជារឿងដែលពិបាកយល់។ យើងតែងតែឮអំពីផែនការបែបនេះកើតមាននៅប្រទេសផ្សេង ប៉ុន្តែសម្រាប់ករណីនេះ គឺកើតឡើងនៅខាងមុខផ្ទះរបស់ខ្ញុំ»។
អ្នកស្រីបានសើចបណ្ដើរ ហើយនិយាយបណ្ដើរថា៖ «រដ្ឋាភិបាលដែលយើងមានសព្វថ្ងៃគឺមិនល្អនោះទេ ប៉ុន្តែប្រហែលជាល្អជាងអ្វីដែលពួកក្រុមគ្រោងផ្ដួលរំលំរដ្ឋាភិបាលទាំងនោះ»។
រដ្ឋអាជ្ញាអាល្លឺម៉ង់បានឱ្យដឹងថា ក្រុមចលនាប្រឆាំងនេះត្រូវបានបំផុសគំនិតដោយទ្រឹស្តីអាល្លឺម៉ង់ ដែលគេហៅថា Reichsbuerger និងទ្រឹស្ដី QAnon របស់អាមេរិក។ សមាជិកក្រុមពួកគេខ្លះគឺស្ថិតក្នុងចំណោមអ្នកដែលត្រូវបានចាប់ខ្លួនបន្ទាប់ពីការវាយលុកឈ្លានពានសេតវិមាន (Capitol Riots) របស់សហរដ្ឋអាមេរិក កាលពីខែមករា ឆ្នាំ ២០២១។
សមាជិកនៃក្រុមចលនា Reichsbuerger ដែលស្ថិតនៅក្នុងរដ្ឋ Thuringia មិនទទួលស្គាល់ប្រទេស អាល្លឺម៉ង់ បច្ចុប្បន្ន និងព្រំដែនរបស់ខ្លួនថា ជារដ្ឋស្របច្បាប់នោះទេ។ អ្នកខ្លះនៅតែប្រកាន់ជំនឿស្មោះស្ម័គ្រជាមួយចក្រភពពីបុរាណរបស់ អាល្លឺម៉ង់ ដែលគេស្គាល់ថា ជាចក្រភព Reich ដែលជាសម័យស្ថិតក្រោមរបបរាជានិយម។ ហើយអ្នកខ្លះក៏បានធ្វើការផ្សព្វផ្សាយផ្នត់គំនិតរបស់ណាស៊ីនិយម និងជឿថា អាល្លឺម៉ង់ បច្ចុប្បន្នកំពុងស្ថិតនៅក្រោមការកាន់កាប់ដោយពួកយោធា។
រដ្ឋអាជ្ញាបានលើកឡើងថា ជនជាប់ចោទចំនួន ១៩ នាក់ក្នុងចំណោមអ្នករៀបចំផែនការក្បត់ ត្រូវបានឃុំខ្លួននៅក្នុងមន្ទីរឃុំឃាំង កាលពីថ្ងៃពុធ ខណៈដែល ៦ នាក់ផ្សេងទៀតត្រូវបានគេរំពឹងថា បានឡើងបំភ្លឺនៅមុខចៅក្រមកាលពីថ្ងៃព្រហស្បតិ៍។ លោក Holger Muench ប្រធានការិយាល័យប៉ូលិសសហព័ន្ធបានប្រាប់ទូរទស្សន៍ ARD កាលពីថ្ងៃព្រហស្បតិ៍ថា ចំនួនជនសង្ស័យនៅក្នុងករណីនេះគឺមានចំនួន ៥៤ នាក់ ប៉ុន្តែតួលេខនេះអាចកើនឡើងបន្ថែមទៀត។
លោក Muench បានឱ្យដឹងថា ក្នុងការវាយឆ្មក់ចាប់ក្រុមស្ដាំនិយមជ្រុលកាលពីថ្ងៃពុធ ប៉ូលិសបានរកឃើញឧបករណ៍ជាច្រើន រាប់ចាប់តាំងពីអាវពាក់ការពារ ធ្នូបាញ់ កាំភ្លើង និងគ្រាប់រំសេវ ព្រមទាំងផែនការបង្កើតបញ្ជាការដ្ឋានការពារមាតុភូមិ និងភ័ស្តុតាងនៃការជ្រើសរើសសមាជិកថ្មីឱ្យចូលរួមបន្ថែមទៀត។
លោក Muench បានបញ្ជាក់បន្ថែមថា៖ «យើងចាប់បានជនល្មើសដែលជាមនុស្សគ្រោះថ្នាក់ជាច្រើន និងដែលកំពុងធ្វើការផ្តន្ទាទោស ដោយអ្នកខ្លះពាក់ព័ន្ធនឹងការមានលុយច្រើន ខ្លះទៀតមានអាវុធ ផែនការវាយប្រហារ និងខ្លះទៀតចង់ពង្រីករចនាសម្ព័ន្ធរបស់ខ្លួន»។
រដ្ឋមន្ត្រីក្រសួងមហាផ្ទៃនៃរដ្ឋ Thuringia លោក Maier បានចង្អុលបង្ហាញថា គណបក្ស Alternative for Germany (AfD) ជាបក្សស្ដាំនិយមជ្រុល និងតែងតែផ្សព្វផ្សាយនូវអ្វីដែលលោកហៅថា ការស្រមើស្រមៃអំពីការផ្តួលរំលំរដ្ឋាភិបាលអាល្លឺម៉ង់។ រដ្ឋមន្ត្រីដែលមកពីគណបក្សសង្គមប្រជាធិបតេយ្យរបស់អធិការបតី Olaf Scholz រូបនេះបានបន្ថែមថា៖ «ប្រជាជនមានការភ័យខ្លាច ហើយគណបក្ស AfD បានទាញយកអត្ថប្រយោជន៍ពីវាតាមរយៈការផ្តល់នូវដំណោះស្រាយដ៏សាមញ្ញ»។
គួររំឭកថា គណបក្ស AfD បានចេញសេចក្តីថ្លែងការណ៍មួយកាលពីថ្ងៃពុធ ដោយបានថ្កោលទោសក្រុមស្តាំនិយមជ្រុល និងបានបង្ហាញពីទំនុកចិត្តលើសមត្ថភាពខ្លួនក្នុងការនាំមកនូវដំណោះស្រាយច្បាស់លាស់យ៉ាងឆាប់រហ័ស និងពេញលេញដើម្បីដោះស្រាយបញ្ហានេះ៕