លោកប្រធានាធិបតីហ្វីលីពីន Ferdinand Marcos Jr (ឆ្វេង) និង លោកប្រធានាធិបតីចិន ស៊ី ជីនភីង ក្នុងពិធីស្វាគមន៍ នៅមហាសាលប្រជាជន ក្នុងទីក្រុងប៉េកាំង កាលពីថ្ងៃទី៤ មករា។ AFP
ចិន និងហ្វីលីពីន បាននិយាយនៅក្នុងសេចក្តីថ្លែងការណ៍រួមចេញផ្សាយនៅថ្ងៃទី ៥ មករា នេះថា ប្រទេសទាំង ២ យល់ព្រមបង្កើតបណ្តាញទំនាក់ទំនងផ្ទាល់រវាងក្រសួងការបរទេសជុំវិញជម្លោះនៅសមុទ្រចិនខាងត្បូង ដើម្បីដោះស្រាយបញ្ហាដោយសន្តិវិធី។
សេចក្តីថ្លែងការណ៍រួម ដែលមានកិច្ចព្រមព្រៀងចំនួន ១៤ ដើម្បីបន្ធូរបន្ថយភាពតានតឹងផ្នែកសន្តិសុខ និងជំរុញកិច្ចសហ ប្រតិបត្តិការសេដ្ឋកិច្ច ចេញផ្សាយឡើងស្របពេលដែលភាគីទាំង២ ខិតខំជួសជុលទំនាក់ទំនងដែលតានតឹង បន្ទាប់ពីការសម្រេចចិត្តរបស់តុលាការក្រុងឡាអេក្នុងឆ្នាំ ២០១៦ ដែលថា ចិនគ្មានទាមទារទឹកដីនៅសមុទ្រចិនខាងត្បូង តាមការប្រឆាំងរបស់ហ្វីលីពីន។
ចិនបានច្រានចោលសេចក្ដីសម្រេចនោះ ហើយបង្កើនសកម្មភាពយោធា និងមូលដ្ឋានទ័ពរបស់ខ្លួននៅតំបន់ជម្លោះដែលជាតំបន់សម្បូរដោយធនធានប្រេង ឧស្ម័ន និងធនធានជលផល។ យោធូបនីយកម្មរបស់ចិន បានបង្កឱ្យមានការព្រួយបារម្ភពីហ្វីលីពិន ហើយបង្កជាភាពតានតឹងផ្នែកការទូតជាញឹកញាប់។
យ៉ាងណាមិញ ក្នុងសេចក្តីថ្លែងការណ៍រួមថ្ងៃព្រហស្បត្តិ៍ ដែលចេញផ្សាយបន្ទាប់ពីប្រធានាធិបតីហ្វីលីពីន លោកហ្វឺឌី ណាន់ ម៉ាកូស ជូនៀ (Ferdinand Marcos Jr) ជួបជាមួយប្រធានាធិបតីចិន លោក ស៊ី ជិនពីងនៅទីក្រុងប៉េកាំងកាលពីថ្ងៃពុធមេដឹកនាំទាំង២ បានបញ្ជាក់សារជាថ្មីថា ប្រទេសរបស់ខ្លួននឹងគោរពអធិបតេយ្យភាព និងបូរណភាពទឹកដីរបស់គ្នាទៅវិញទៅមក។
ភាគីទាំង២ បានឯកភាពបន្តកិច្ចពិភាក្សាស្តីពីការរុករកប្រេង និងឧស្ម័ននៅសមុទ្រចិនខាងត្បូង និងពិភាក្សាអំពីកិច្ចសហប្រតិបត្តិការលើវិស័យនានា រួមមានថាមពលព្រះអាទិត្យ ខ្យល់ និងនុយក្លេអ៊ែរ និងរថយន្តអគ្គិសនី។ បន្ថែមពីនោះ ឆ្មាំសមុទ្រចិន និងហ្វីលីពីន ក៏នឹងជួបឱ្យបានឆាប់តាមដែលអាចធ្វើទៅបាន ដើម្បីពិភាក្សាអំពីកិច្ចសហប្រតិបត្តិការជាក់ស្តែង។
សេចក្តីថ្លែងការណ៍បានឱ្យដឹងទៀតថា ប្រទេសទាំង២នឹងពិចារណាផ្តល់ដំណឹងដល់គ្នាទៅវិញទៅមក នៅពេលបាញ់គ្រាប់រ៉ុក្កែត និងសហការគ្នាលើការប្រមូលយកកម្ទេចគ្រាប់រ៉ុក្កែតឡើងវិញ ដែលធ្លាប់ជាបញ្ហាចម្រូងចម្រាស់មួយរវាងកងឆ្នាំសមុទ្ររបស់ប្រទេសទាំង២។
មិនត្រឹមតែប៉ុណ្ណេះ ប្រទេសទាំង២បានអះអាងសារជាថ្មីអំពីសារៈសំខាន់នៃការរក្សាសន្តិភាព និងស្ថិរភាព ក៏ដូចជាសេរីភាពនៃការធ្វើនាវាចរណ៍ និងការហោះហើរលើសមុទ្រនៅសមុទ្រចិនខាងត្បូង ហើយនឹងរៀបចំកិច្ចសន្ទនាប្រចាំឆ្នាំស្តីពីសន្តិសុខ។
ចំពោះកិច្ចសហប្រតិបត្តិការសេដ្ឋកិច្ចចិនបានយល់ព្រមអនុញ្ញាតឱ្យមានការនាំចូលពីហ្វីលីពីនបន្ថែមទៀត ដោយមានគោលបំណងសម្រាប់ពាណិជ្ជកម្មទ្វេភាគី ដើម្បីឱ្យបានដូច ឬលើសពីបរិមាណមុនការរាតត្បាតកូវីដ។ ក្រៅពីនេះ ក៏មានការសន្យាផ្សេងៗទៀតពីការពង្រឹងវិស័យទេសចរណ៍ ក៏ដូចជាការបន្តកិច្ចព្រមព្រៀងស្តីពីគំនិតផ្តួចផ្តើមខ្សែក្រវាត់ និងផ្លូវ ដែលជាយុទ្ធសាស្ត្រវិនិយោគហេដ្ឋារចនាសម្ព័ន្ធក្រៅប្រទេសដ៏សំខាន់ របស់លោក ស៊ី៕
វីដេអូ៖
