លោកPetr Pavel ជួបអ្នកគាំទ្រក្នុងអំឡុងការបោះឆ្នោតប្រធានាធិបតី កាលពីថ្ងៃទី២៧ ខែមករា ឆ្នាំ២០២៣។ AFP
ប្រធានាធិបតីជាប់ឆ្នោតរបស់ប្រទេសឆែក លោក Petr Pavel ដែលជាអតីតមេបញ្ជាការកងទ័ពណាតូ កំពុងតែមានប្រជាប្រិយបំផុតក្នុងចំណោមរដ្ឋប្រជាធិបតេយ្យ បន្ទាប់ពីឈ្នះតំណែងប្រធានាធិបតីឆែក ដោយលោកគ្រោងនិយាយតាមទូរស័ព្ទជាមួយ ប្រធានាធិតីអ៊ុយក្រែន លោក វ៉ុលឌីមៀរ ហ្សេលេស្គី (Volodymyr Zelenskyy) និងប្រធានាធិបតីតៃវ៉ាន់ លោកស្រី សៃអ៊ឹងវិន (Tsai Ing-wen)។
ប្រធានាធិបតីជាប់ឆ្នោតលោក Petr Pavel នៃប្រទេសឆេកដែលស្ថិតនៅតំបន់អឺរ៉ុបកណ្តាល បានឈ្នះភ្លូកទឹកភ្លូកដីលើគូប្រជែងនយោបាយ គឺ លោក Andrej Babis ក្នុងការបោះឆ្នោត កាលពីថ្ងៃទី ២៨ ខែមករា ឆ្នាំ ២០២៣ ហើយនឹងក្លាយទៅជាប្រធានាធិបតីទី៤ នៃសាធារណរដ្ឋឆែក។ មេដឹកនាំដែលទើបជាប់ឆ្នោតថ្មី នឹងជំនួសប្រធានាធិបតីផុតអាណត្តិលោក Milos Zeman នៅថ្ងៃទី ៨ ខែមីនា។
ថ្វីបើសាធារណរដ្ឋឆែក ជាប្រទេសតូចនៅតំបន់អឺរ៉ុបកណ្តាល ប៉ុន្តែជ័យជម្នះរបស់លោក ក៏នាំទៅដល់ការប្រែប្រួលភូមិសាស្ត្រដ៏សំខាន់ ដោយសារមេដឹកនាំឆែកដែលកាន់អំណាចមុនលោក គឺជាអ្នកដែលមានទំនោរនយោបាយស្និទ្ធជាមួយប្រទេសចិន និងរុស្ស៊ី។
យោងតាមសារព័ត៌មាន expats.cz ដែលមានមូលដ្ឋាននៅប្រទេសឆែក ប្រធានាធិបតីជាប់ឆ្នោត Petr Pavel បាននិយាយនៅក្នុងកម្មវិធីមួយរបស់បណ្តាញព័ត៌មានCNNថា លោកនឹងនិយាយជាមួយប្រធានាធិបតីអ៊ុយក្រែនលោក វ៉ុលឌីមៀរ ហ្សេលេស្គី និងប្រធានាធិបតីតៃវ៉ាន់ លោកស្រី សាយ អ៊ឹងវិន។ ការហៅទូរស័ព្ទទៅកាន់ប្រទេសទាំង២ដែល១កំពុងជាប់ដៃក្នុងសង្គ្រាមជាមួយរុស្ស៊ី និងតៃវ៉ាន់ដែលស្ថិតនៅមាត់ច្រកនៃសង្គ្រាមជាមួយប្រទេសចិន គឺជាការហៅទូរស័ព្ទជាមួយមិត្តបរទេស ស្ថិតក្នុងចំណោមការហៅទូរស័ព្ទលើកដំបូងរបស់លោក Pavel ចាប់តាំងពីត្រូវបានជ្រើស រើសជាប្រធានាធិបតីឆែក នៅចុងសប្តាហ៍នេះ។
យោងតាមសេចក្តីរាយការណ៍ ប្រធានាធិបតីត្រៀមចាកចេញពីតំណែង លោក Milos Zeman មានទំនាក់ទំនងជិតស្និទ្ធជាយូរជាមួយមហាអំណាចរុស្ស៊ី និងមហាអំណាចចិន។
សេចក្តីរាយការណ៍របស់ euronews លោក Milos Zeman បានស្វាគមន៍ប្រធានាធិបតីចិន ស៊ី ជីនភីង (Xi Jinping) ក្នុងការគោរពយ៉ាងធំធេង ដោយកាំភ្លើងកម្រ ២១ ដើមក្នុងឆ្នាំ ២០១៦ ហើយបានប្តេជ្ញាថានឹងធ្វើឱ្យសាធារណរដ្ឋឆែកជា «ច្រកទ្វារ» របស់ចិនទៅកាន់អឺរ៉ុប។ បន្ទាប់ពីរុស្ស៊ីបានលុកលុយឧបទ្វីបគ្រីមា (Crimea)របស់អ៊ុយក្រែនក្នុងឆ្នាំ២០១៤ លោក Zeman បានណែនាំប្រឆាំងនឹងការស្តីបន្ទោសលោក វ៉្លាឌីមៀរ ពូទីន (Vladimir Putin) ដែលជាប្រធានាធិបតីរុស្ស៊ី។ លោកបានហៅវាថាជា «សង្គ្រាមស៊ីវិលរវាងពលរដ្ឋអ៊ុយក្រែន២ក្រុម» ហើយបន្ទាប់មកបានចូលរួមក្នុងការប្រារព្ធទិវាជ័យជម្នះរបស់រុស្ស៊ីក្នុងទីក្រុងម៉ូស្គូនៅឆ្នាំបន្ទាប់ទៀតផង។
លោក Pavel និយាយតាមទូរទស្សន៍ CNN ដោយកត់សម្គាល់ពីជ័យជម្នះក្នុងការបោះឆ្នោតរបស់គាត់ថា៖«ការប្រារព្ធពិធីអបអរសាទររយៈពេលខ្លីមួយ។ រួមជាមួយនឹងអារម្មណ៍នៃក្តីសោមនស្ស ខ្ញុំចាប់ផ្តើមមានអារម្មណ៍ថា បន្ទុកនៃការទទួលខុសត្រូវ និងការរំពឹងទុកកាន់តែច្រើនឡើង»។
មេដឹកនាំអ៊ុយក្រែន និងតៃវ៉ាន់ ដែលអ្នកទាំង២ បានអបអរសាទរចំពោះប្រធានាធិបតីជាប់ឆ្នោតរបស់ប្រទេសឆែក ក្រោយជ័យជម្នះរបស់គាត់ ការសន្ទនាភ្លាមៗរបស់ Pavel នឹងបង្ហាញពីការផ្លាស់ប្តូរយ៉ាងខ្លាំងនៅក្នុងគោលនយោ បាយរបស់រដ្ឋាភិបាលថ្មីរបស់ឆែក។
ការចុះផ្សាយរបស់ expats លោក Pavel ថ្លែងទៅកាន់ទូរទស្សន៍ Czech Television Václav Moravec ថា គាត់មិនឃើញមានបញ្ហាក្នុងការបង្ហើយកិច្ចព្រមព្រៀងការពារជាតិជាមួយសហរដ្ឋអាមេរិក ដូចទៅនឹងប្រទេសស្លូវ៉ាគី ដែលបានចុះហត្ថលេខាកាលពីដើមឆ្នាំមុននោះទេ។
លោក Pavel បានប្រាប់ Moravec ថា៖«មិនមានហេតុផលណាមួយដែលត្រូវភ័យខ្លាចចំពោះកិច្ចព្រមព្រៀងបែបនេះទេ ប៉ុន្តែវាចាំបាច់ក្នុងការពន្យល់ដល់មនុស្សអំពីអ្វីដែលវាគឺអំពី ហើយវានឹងមានឥទ្ធិពលវិជ្ជមានដល់ជីវិតរបស់ពួកគេ»។
យោងតាមលោក Dalibor Rohac មកពីវិទ្យាស្ថានសហគ្រាសអាមេរិក តំណែងជាប្រធានាធិបតីរបស់ Pavel នឹងនាំមកនូវការផ្លាស់ប្តូរដ៏ធំមួយចំពោះទំនាក់ទំនងឆែក-អាមេរិក។ ថ្លែងទៅកាន់ទូរទស្សន៍ឆែក លោក Rohac បានកត់សម្គាល់ថា Pavel នឹងមានប្រជាប្រិយភាពនៅទីក្រុងវ៉ាស៊ីនតោន ដោយសារជំនាញភាសាអង់គ្លេស និងអារម្មណ៍កំប្លែង ក៏ដូចជាការពិតដែលថាគាត់ «មើលទៅដូចជាឪពុករបស់ Tom Cruise»៕
វីដេអូ៖
