លោក អេម៉ានុយអែល ម៉ាក្រុង (ឆ្វេង) និងលោក វ៉ាង យី ក្នុងជំនួបនាពេលកន្លងទៅ។ រូបថត Xinhua
ការិយាល័យប្រធានាធិបតីនិយាយបន្ទាប់ពីកិច្ចពិភាក្សារវាងបុរសទាំង ២ ថា លោកប្រធានាធិបតីបារាំង អេម៉ានុយអែល ម៉ាក្រុង និងអ្នកការទូតកំពូលចិន លោក វ៉ាង យី បានព្រមព្រៀងគ្នាកាលពីថ្ងៃពុធដើម្បីរួមចំណែកឈានទៅរកសន្តិភាពនៅប្រទេសអ៊ុយក្រែន។
លោកម៉ាក្រុង មិនបានលាក់បាំងក្តីសង្ឃឹមរបស់លោក ដែលថាទីក្រុងប៉េកាំង ដែលនៅតែជាសម្ព័ន្ធមិត្តដ៏សំខាន់របស់ទីក្រុងម៉ូស្គូ និងមិនបានថ្កោលទោសការលុកលុយរបស់អ៊ុយក្រែន ដែលបានធ្វើឡើងជិត ១ ឆ្នាំ មុននឹងដាក់សម្ពាធលើរុស្ស៊ីឱ្យត្រឡប់ទៅតុចរចាវិញ។
នៅទីក្រុងប៉ារីសកាលពីថ្ងៃ ពុធ លោកម៉ាក្រុង និងលោកវ៉ាង បានពិភាក្សាអំពីសង្គ្រាម និង ផលវិបាករបស់វាទៅលើប្រទេសដែលងាយរងគ្រោះ បំផុត ជាពិសេសទាក់ទងនឹងសន្តិសុខស្បៀង និងសមត្ថ ភាពហិរញ្ញវត្ថុ។ នេះបើយោងតាមការិយាល័យប្រធានាធិបតីបារាំង។
វិមាន Elysee បានឱ្យដឹងថា លោក ម៉ាក្រុង និងលោក វ៉ាង បានបង្ហាញគោលបំណងដូចគ្នាក្នុងការរួមចំណែកដល់សន្តិភាពស្របតាមច្បាប់អន្តរជាតិ ដោយមិនបានបញ្ជាក់ពីអ្វីដែលជាការរួមចំណែករបស់ប្រទេសនីមួយៗ នោះទេ។
បន្ទាប់ពីដំណើរទស្សនកិច្ចទៅប្រទេសបារាំង លោក វ៉ាង នឹងបន្តដំណើរទស្សនកិច្ចរបស់លោក ដោយឈប់នៅសន្និសីទសន្តិសុខទីក្រុងមុយនិក ដែលគ្រោងធ្វើនៅថ្ងៃសុក្រដល់ថ្ងៃអាទិត្យហើយ លោកក៏នឹងធ្វើដំណើរទៅកាន់ទីក្រុងម៉ូស្គូផងដែរ។
លោកប្រធានាធិបតីបារាំងបាននិយាយអំពីកិច្ចសហប្រតិបត្តិការជាមួយប្រទេសចិនក្នុងការប្រឈមនឹង «បញ្ហាប្រឈមជាសកល » ក្នុងនោះមានវិបត្តិអាកាសធាតុផងដែរ។
ក្រោយមកនៅថ្ងៃពុធ លោក វ៉ាង បានជួបជាមួយរដ្ឋមន្ត្រីការបរទេសបារាំង លោកស្រី Catherine Colonna។ នៅថ្ងៃព្រហស្បតិ៍ លោកបានជួបពិភាក្សាអំពីបញ្ហាយុទ្ធសាស្ត្រជាមួយទីប្រឹក្សាការទូតរបស់លោក ម៉ាក្រុងគឺលោក Emmanuel Bonne៕
វីដេអូ៖
