ប្រធានាធិបតីរុស្ស៊ី លោក វ្ល៉ាឌីមៀរ ពូទីន។ រូបថត AFP
ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានថ្លែងក្នុងបទសម្ភាសន៍មួយកាលពីថ្ងៃអាទិត្យថា ក្រោយផ្អាកការចូលរួមរបស់ខ្លួនក្នុងកិច្ចព្រមព្រៀងគ្រប់គ្រងអាវុធនុយក្លេអ៊ែរ (New START) រុស្ស៊ី នឹងគិតគូរអំពីអាវុធនុយក្លេអ៊ែររបស់ប្រទេសណាតូផ្សេងៗ ទៀតដូចបារាំង និងអង់គ្លេសជាដើម មិនត្រឹមតែអាមេរិកប៉ុណ្ណោះទេ។ នេះបើតាមការស្រង់សម្ដីរបស់ទីភ្នាក់ងារព័ត៌មាន AP។
ការលើកឡើងបែបនេះ ធ្វើឡើងបន្ទាប់ពីលោក ពូទីន បានថ្លែងនៅពេលប្រកាសពីការផ្អាកកិច្ចព្រមព្រៀង New START នៅដើមសប្ដាហ៍មុនថា បារាំង និងអង់គ្លេស ដែលមិនមែនជាភាគីនៃកិច្ចព្រមព្រៀងនេះ បានចូលរួមជាមួយសហរដ្ឋអាមេរិកក្នុងការកំណត់គោលដៅរុស្ស៊ីជាមួយនឹងអាវុធនុយក្លេអ៊ែរ។
លោក ពូទីន បានថ្លែងក្នុងបទសម្ភាសន៍ជាមួយទូរទស្សន៍រុស្ស៊ីមួយ ដែលថតកាលពីថ្ងៃពុធ និងចាក់ផ្សាយនៅថ្ងៃអាទិត្យថា លោកបានចាត់វិធានការ ដើម្បី «ថែរក្សាប្រទេសរបស់យើង ធានាសន្តិសុខ និងស្ថិរភាពជាយុទ្ធសាស្ត្រ»។
លោកបន្ថែមថា៖ «ក្នុងលក្ខខណ្ឌនាពេលបច្ចុប្បន្ននេះពេលប្រទេសណាតូនាំមុខគេទាំងអស់បានប្រកាសពីគោលដៅចម្បងក្នុងការធ្វើឱ្យមានការបរាជ័យជាយុទ្ធសាស្ត្រ សម្រាប់យើង ដើម្បីធ្វើឱ្យប្រជាជនរបស់យើងរងទុក្ខ...ធ្វើម៉េចយើងមិនអាចគិតគូរពីអាវុធនុយក្លេអ៊ែររបស់ពួកគេបាន?ជាងនេះទៅទៀត ពួកគេផ្គត់ផ្គង់អាវុធដល់អ៊ុយក្រែន ដែលមានតម្លៃរាប់សិបពាន់លានដុល្លារ»។
ក្នុងបទសម្ភាស៍ដដែល លោក ពូទីន បាននិយាយឡើងវិញពីអ្វីដែលលោកថា លោកខាងលិចព្យាយាមបំផ្លាញរុស្ស៊ី ហើយថា «ប្រតិបត្តិការយោធាពិសេស» នៅអ៊ុយក្រែនរយៈពេល ១ ឆ្នាំកន្លងទៅនេះ គឺជាផ្នែកមួយនៃការប្រយុទ្ធដើម្បីអត្ថិភាពរបស់រុស្ស៊ី។ កាលពី ១ ឆ្នាំមុន លោកប្រកែកថា គោលដៅសំខាន់របស់លោកក្នុងការឈ្លានពានអ៊ុយក្រែនគឺដើម្បីកាត់បន្ថយ «ការគំរាមកំហែងដល់សន្តិសុខរុស្ស៊ី» ហើយចាប់តាំងពីពេលនោះមក លោកបានលើកហេតុផលទាំងនោះថា ជាហេតុផលប្រសិនបើអាវុធនុយក្លេអ៊ែរ ត្រូវប្រើនៅអ៊ុយក្រែន។
នាយកទីភ្នាក់ងារសម្ងាត់ CIA លោក វីលៀម ប៊ឺនស៍ បានថ្លែងកាលពីថ្ងៃអាទិត្យថា បញ្ហាពិតប្រាកដនៅពីក្រោយការលុកលុយអ៊ុយក្រែន គឺការបាត់បង់ការគ្រប់គ្រងរបស់លោក ពូទីន លើអ៊ុយក្រែន និងការងើបឡើងរបស់ប្រទេសក្នុងនាមជារដ្ឋឯករាជ្យ និងប្រជាធិបតេយ្យ ដែលស្របតាមលោកខាងលិច។ ការលើកឡើងបែបនេះ បន្ថែមពីលើការថ្លែងរបស់លោកប្រធានាធិបតី ចូ បៃដិន កាលពីសប្ដាហ៍មុនដែលថា សហរដ្ឋអាមេរិក និងសម្ព័ន្ធមិត្ត មិនស្វែងរងការធ្វើឱ្យរុស្ស៊ីត្រូវបំផ្លិចបំផ្លាញនោះទេ។
គួរគូសបញ្ជាក់ថា New START គឺជាកិច្ចព្រមព្រៀងគ្រប់គ្រងអាវុធចុងក្រោយដែលនៅសេសសល់រវាងទីក្រុងម៉ូស្គូ និងវ៉ាស៊ីនតោន។ ចំពោះការផ្អាកការចូលរួមក្នុងកិច្ចព្រមព្រៀងនេះ លោក ពូទីន បាននិយាយថា រុស្ស៊ីមិនអាចទទួលយកការត្រួតពិនិត្យរបស់សហរដ្ឋអាមេរិកលើទីតាំងនុយក្លេអ៊ែររបស់ខ្លួនបានទេ ខណៈអាមេរិក និងសម្ព័ន្ធមិត្តណាតូ ចង់ឱ្យរុស្ស៊ីបរាជ័យនៅអ៊ុយក្រែន។ លោកសង្កត់ធ្ងន់ថា ទីក្រុងម៉ូស្គូមិនដកខ្លួនចេញពីកិច្ចព្រមព្រៀងនោះទេ ហើយក្រសួងការបរទេសរុស្ស៊ីបាននិយាយថា រុស្ស៊ីនឹងគោរពលក្ខខណ្ឌស្តីពីអាវុធនុយក្លេអ៊ែរ និងបន្តជូនដំណឹងដល់សហរដ្ឋអាមេរិកអំពីការបាញ់សាកល្បងមីស៊ីលផ្លោង។
ក្នុងបទសម្ភាស៍ជាមួយទូរទស្សន៍រុស្ស៊ីដដែល លោក ពូទីន មិនបានរៀបរាប់លម្អិតអំពីរបៀបដែលលោកនឹង «គិតគូរ» ពីអាវុធនុយក្លេអ៊ែររបស់ប្រទេសណាតូដទៃក្រៅពីអាមេរិកនោះទេ ប៉ុន្តែបានបង្ហាញ ថា លោកបើកចំហចំពោះការពិភាក្សាអំពីប្រធានបទនេះ៕
វីដេអូ៖
