អ្នកនាំពាក្យរដ្ឋាភិបាលតាលីបង់ លោក Zabihullah Mujahid ធ្វើសេចក្តីថ្លែងការណ៍កាលពីថ្ងៃចន្ទ។ Twitter
មន្ត្រីរដ្ឋាភិបាលបាននិយាយថា កងកម្លាំងតាលីបង់ បានសម្លាប់មេបញ្ជាការកំពូលម្នាក់របស់ក្រុម IS ដែលត្រូវបានចោទប្រកាន់ថាបានរៀបចំផែនការវាយប្រហារប្រឆាំងនឹងបេសកកម្មការទូតនៅក្នុងរដ្ឋធានីរបស់ប្រទេសអាហ្វហ្គានីស្ថាន។
អំពើហិង្សានៅអាហ្វហ្គានីស្ថាន បានធ្លាក់ចុះយ៉ាងខ្លាំង បន្ទាប់ពីក្រុមតាលីបង់ បានដណ្តើមអំណាច នៅខែសីហា ឆ្នាំ២០២១។
ប៉ុន្តែកាលពីឆ្នាំមុន សន្តិសុខកាន់តែអាក្រក់ទៅៗ ដោយមានការវាយប្រហារយ៉ាងច្រើនសន្ធឹកសន្ធាប់ ត្រូវបានអះ អាងដោយសាខាតំបន់របស់ក្រុមIS។
អ្នកនាំពាក្យរដ្ឋាភិបាលតាលីបង់ លោក Zabihullah Mujahid បាននិយាយនៅក្នុងសេចក្តីថ្លែងការណ៍មួយ កាលពីថ្ងៃចន្ទថា កងកម្លាំងតាលីបង់ បានសម្លាប់ Qari Fateh ជា ប្រធានផ្នែកស៊ើបការណ៍ និងប្រតិបត្តិការ របស់ ISក្នុងតំបន់ ក្នុងអំឡុងពេលប្រតិបត្តិការមួយ កាលពីយប់ថ្ងៃអាទិត្យ។
លោក Mujahid បាននិយាយថា៖ «Fateh បានគ្រប់គ្រងដោយផ្ទាល់ទៅលើកិច្ចប្រតិបត្តិការកាលពីពេលថ្មីៗនៅក្នុងទីក្រុងកាប៊ុល រួមទាំងប្រឆាំងនឹងបេសកកម្មការទូតនានា វិហារអ៊ិស្លាម និងគោលដៅផ្សេងៗទៀត»។
សមាជិកក្រុម IS ម្នាក់ទៀត ត្រូវបានសម្លាប់នៅក្នុងប្រតិបត្តិការប្រឆាំងនឹងក្រុមនេះ ដែលមានមូលដ្ឋាន នៅតំបន់ Khair Khana នៃទីក្រុងកាប៊ុល។ នេះបើយោងតាមសេចក្តីថ្លែងការណ៍នោះ។
អ្នកស្រុកនៅក្នុងសង្កាត់នោះ បានរាយការណ៍ពីសំឡេងកាំភ្លើងឮយ៉ាងខ្លាំង កាលពីយប់ថ្ងៃអាទិត្យនោះ។
ក្រុមមន្ត្រីតាលីបង់ បានបង្ហោះវីដេអូនៅលើបណ្តាញសង្គម Twitter ដែលបង្ហាញឱ្យឃើញសាកសពមនុស្សនាក់ដែលដេកក្នុងគំនរបាក់បែក។
របាយការណ៍របស់ក្រុមប្រឹក្សាសន្តិសុខអង្គការសហប្រជាជាតិក្នុងខែកក្កដា ឆ្នាំ ២០២២ បានពណ៌នាលោក Fateh ជាមេដឹកនាំក្រុម IS ដ៏សំខាន់ម្នាក់ ដែលត្រូវបានចោទប្រកាន់ពីបទធ្វើប្រតិបត្តិការយោធានៅក្នុងតំបន់ដែលលាតសន្ធឹងលើប្រទេសឥណ្ឌា អ៊ីរ៉ង់ និងអាស៊ីកណ្តាល។
IS បានលេចឡើង ជាបញ្ហាប្រឈមផ្នែកសន្តិសុខដ៏ធំបំផុតចំពោះការគ្រប់គ្រងរបស់តាលីបង់ ដោយបានធ្វើការ វាយប្រហារលើជនបរទេស ជនជាតិភាគតិចសាសនា និងស្ថាប័នរដ្ឋាភិបាល។
ក្រុមទាំង២ចែករំលែកមនោគមន៍វិជ្ជាអ៊ីស្លាមនិកាយស៊ុននីយ៉ាងតឹងរ៉ឹង ប៉ុន្តែក្រុមIS កំពុងប្រយុទ្ធដើម្បីបង្កើត «កាលីហ្វ» ជាសកល ខណៈពេលដែលពួកតាលីបង់មានគោលដៅមើលទៅខាងក្នុងជាងក្នុងការគ្រប់គ្រង ប្រទេសអាហ្វហ្គានីស្ថានឯករាជ្យមួយ។
ក្រុម IS បានអះអាងទទួលខុសត្រូវចំពោះការវាយប្រហារដោយកាំភ្លើងកាលពីខែធ្នូ ទៅលើសណ្ឋាគារក្រុងកាប៊ុល ដែលបានធ្វើឱ្យជនជាតិចិន ៥នាក់ រងរបួស។
ក្នុងខែធ្នូនោះដែរ ក្រុមនេះ បានវាយប្រហារស្ថានទូតប៉ាគីស្ថានក្នុងទីក្រុងកាប៊ុល។ ទីក្រុងអ៊ីស្លាម៉ាបាដ បានពណ៌នាថាវាជាការប៉ុនប៉ងធ្វើឃាតលើឯកអគ្គរដ្ឋទូតរបស់ខ្លួន។
ចំណែកនៅក្នុងខែមករា ក្រុមនេះ បាន អះអាងពីការបំផ្ទុះគ្រាប់បែកអត្តឃាតនៅជិតក្រសួងការបរទេសក្នុងទីក្រុងកាប៊ុល ដែលបានបណ្តាលឱ្យមនុស្សយ៉ាងតិច ១០នាក់ស្លាប់។
បុគ្គលិកស្ថានទូតរុស្ស៊ី២ នាក់ បានស្លាប់នៅក្នុងការបំផ្ទុះគ្រាប់បែកអត្តឃាតនៅខាងក្រៅស្ថានទូត របស់ពួកគេកាលពីខែកញ្ញាឆ្នាំមុន ដែលជាការវាយប្រហារមួយផ្សេងទៀតដែលត្រូវបានអះអាងដោយក្រុមIS។
ក្រុមតាលីបង់ បានស្តីបន្ទោសក្រុមនេះចំពោះការវាយប្រហារអត្តឃាតកាលពីខែកញ្ញា ឆ្នាំ ២០២២ នៅទីក្រុងកាប៊ុល ដែលបានបណ្តាល មនុស្សចំនួន៥៤ នាក់ស្លាប់ ក្នុងនោះមានស្ត្រី និងក្មេងស្រីចំនួន ៥៤ នាក់ផងដែរ៕
វីដេអូ៖
