មន្ត្រីប៉ូលិសសហព័ន្ធត្រួតពិនិត្យរថយន្ត នៅព្រំដែនអាល្លឺម៉ង់។ AFP
ប៉ូលិសក្រុងវីយែននៃប្រទេសអូទ្រីស កាលពីថ្ងៃពុធ បានបង្កើនការល្បាតប្រដាប់អាវុធនៅតាមទីតាំងរសើបៗក្នុងរដ្ឋធានីនេះ រួមទាំងព្រះវិហារសាសនានានា បន្ទាប់ពីទីភ្នាក់ងារស៊ើបការណ៍សម្ងាត់ក្នុងស្រុក បានទទួលព័ត៌មានដែលបង្ហាញថា ក្រុមភេរវកម្មអ៊ិស្លាមជ្រុលនិយមកំពុងរៀបចំផែនការវាយប្រហារ។
ប៉ូលិសក្រុងវីយែន បានសរសេរសេចក្ដីប្រកាសនៅលើបណ្ដាញសង្គមធ្វីធើរថា សេវាស៊ើបការណ៍សម្ងាត់អូទ្រីស មានហេតុផលក្នុងការជឿថា ក្រុមអ៊ិស្លាមជ្រុលនិយមកំពុងរៀបចំផែនការវាយប្រហារក្រុងវីយែន។
ប៉ូលិសបន្តថា ៖«ជាវិធានការប្រុងប្រយ័ត្នកន្លែងរសើបៗ ត្រូវបានដាក់ឱ្យស្ថិតនៅក្រោមការយាមកាមដោយកងកម្លាំងនគរបាលប្រតិបត្តិការប្រចាំ និងកងកម្លាំងនគរបាលពិសេស ហើយថា គេមិនទាន់ដឹងថាវិធានការនេះ មានរយៈពេលប៉ុន្មាននៅឡើយទេ»។
ជាង៣ម៉ោងក្រោយការជូនដំណឹងដល់សាធារណជនចំពោះការគំរាមកំហែងដែលអាចកើតមាននេះ ប៉ូលិសបានផ្ញើការអាប់ដេតមួយទៀត ដោយបញ្ជាក់ថា សេចក្តីយោងដំបូងចំពោះហានិភ័យនៃការវាយប្រហារលើព្រះវិហារសាសនា អាចកើតមាន មិនត្រឹមតែលើព្រះវិហារគ្រិស្តសាសនាប៉ុណ្ណោះទេ ប៉ុន្តែក៏អាចមានលើកន្លែងគោរពបូជារបស់សាសនាផ្សេងៗ និងអគារផ្សេងទៀតផងដែរ។
គេមើលឃើញថា ការបង្កើនការពង្រឹងសន្តិសុខបែបនេះជាវិធានការដ៏កម្រមួយសម្រាប់អូទ្រីស ខណៈវីយែនគឺជាទីក្រុងមួយក្នុងចំណោមរដ្ឋធានីដែលមានសុវត្ថិភាពបំផុតនៅលើពិភពលោក ហើយការវាយប្រហារដោយសកម្មប្រយុទ្ធជ្រុលនិយមកម្រកើតមានណាស់។
យ៉ាងណាមិញ ការវាយប្រហារដ៏សាហាវចុងក្រោយមួយ បានកើតឡើងក្នុងឆ្នាំ២០២០ ពេលខ្មាន់កាំភ្លើងក្រុមជីហាដម្នាក់ បានបើកការបាញ់ប្រហារដោយសម្លាប់មនុស្ស ៤ នាក់ មុនពេលប៉ូលិសបាញ់ខ្មាន់កាំភ្លើងរូបនោះឱ្យស្លាប់៕
