លោកប្រធានាធិបតីរុស្ស៊ី លោក វ្ល៉ាឌីមៀរ ពូទីន ជួបជាមួយសមភាគីស៊ីរី លោកបាសារ អាល់អាសាដ នៅវិមានក្រឹមឡាំង ក្នុងទីក្រុងម៉ូស្គូ កលពីថ្ងៃទី ១៥ ខែមីនា ឆ្នាំ ២០២៣។ AFP
លោកប្រធានាធិបតីរុស្ស៊ី លោក វ្ល៉ាឌីមៀរ ពូទីន បាននិយាយថា អរគុណចំពោះកិច្ចខិតខំប្រឹងប្រែងរួមគ្នារបស់រុស្ស៊ី និងស៊ីរី ជោគជ័យយ៉ាងសំខាន់ ត្រូវបានសម្រេចក្នុងការប្រយុទ្ធប្រឆាំងនឹងអំពើភេរវកម្មអន្តរជាតិ។
លោក ពូទីន បាននិយាយ ខណៈពេលដែលទទួលលោកប្រធានាធិបតីស៊ីរី បាសារ អាល់អាសាដ នៅវិមានក្រឹមឡាំងកាលពីថ្ងៃពុធថា៖«យើងរក្សាទំនាក់ទំនង ហើយទំនាក់ទំនងរបស់យើង កំពុងរីកចម្រើន។ អរគុណចំពោះកិច្ចខិតខំប្រឹងប្រែងរួមគ្នារបស់យើង និងការរួមចំណែកយ៉ាងម៉ឺងម៉ាត់របស់កងកម្លាំងប្រដាប់អាវុធរុស្ស៊ីនៅក្នុងប្រទេសស៊ីរី លទ្ធផលសំខាន់ៗត្រូវបានសម្រេចក្នុងការប្រយុទ្ធប្រឆាំងនឹងអំពើភេរវកម្មអន្តរជាតិ»។
មេដឹកនាំរុស្ស៊ីរូបនេះ បានបញ្ជាក់ថា លទ្ធផលដែលសម្រេចបានផ្តល់ឱកាសសម្រាប់ឱ្យធ្វើសេដ្ឋកិច្ចសង្គម និងស្ថាន ភាពនយោបាយក្នុងស្រុក មានស្ថិរភាព។
លោក ពូទីន បានសម្តែងការសោកស្តាយដែលប្រជាជនស៊ីរី «ប្រឈមមុខនឹងបញ្ហាធ្ងន់ធ្ងរមួយទៀត គឺគ្រោះមហន្តរាយ ផលប៉ះពាល់នៃបាតុភូតរញ្ជួយដី»។
លោកបានប្រាប់លោកអាសាដថា៖«ជាការពិតណាស់ នេះធ្វើឱ្យស្ថានការណ៍កាន់តែធ្ងន់ធ្ងរឡើង។ ប៉ុន្តែយើងដូចជាមិត្តពិតប្រាកដដទៃទៀត កំពុងព្យាយាមគាំទ្រអ្នក»។
មេដឹកនាំរុស្ស៊ីបានរំឭថា ក្រោយគ្រោះមហន្តរាយនេះ អង្គភាពនៃក្រសួងសង្គ្រោះបន្ទាន់របស់រុស្ស៊ី បានធ្វើការនៅក្នុងប្រទេសស៊ីរី។ លោកបានបន្ថែមថា កងទ័ពរុស្ស៊ីនៅស៊ីរី ក៏បានចូលរួមចំណែកក្នុងការប្រយុទ្ធប្រឆាំងនឹងផលវិបាកនៃគ្រោះមហន្តរាយនេះផងដែរ។
ខាងភាគីរុស្ស៊ី រដ្ឋមន្ត្រីការបរទេសលោក Sergey Lavrov រដ្ឋមន្ត្រីការពារជាតិលោក Sergey Shoigu រដ្ឋមន្ត្រីក្រសួងសំណង់ និងសម្ភារប្រើប្រាស់ លោក Irek Faizullin រដ្ឋមន្ត្រីហិរញ្ញវត្ថុ Anton Siluanov ជំនួយការប្រធានាធិបតីទទួលបន្ទុកកិច្ចការអន្តរជាតិ Yury Ushakov និងអ្នកនាំពាក្យប្រធានាធិបតី Dmitry Peskov បានចូលរួមក្នុងកិច្ចពិភាក្សានោះ៕
