លោក Nabil Abu Rudeineh អ្នកនាំពាក្យការិយាល័យប្រធានាធិបតីប៉ាឡេស្ទីន ថ្លែងនាពេលកន្លងទៅ។ រូបថត AFP
វិធានការ និងសកម្មភាពរបស់អ៊ីស្រាអែលប្រឆាំងនឹង ប៉ាឡេស្ទីននៅតំបន់វេសប៊ែង និងទីក្រុងហ្សេរុយសាឡិមខាងកើតនឹងមិននាំមកនូវភាពស្ងប់ស្ងាត់ឬស្ថិរភាពទេ។
លោក Nabil Abu Rudeineh អ្នកនាំពាក្យការិយាល័យប្រធានាធិបតីប៉ាឡេស្ទីន បាននិយាយថា ការទៅលេងរាល់ថ្ងៃរបស់ប្រជាជនអ៊ីស្រាអែលស្តាំនិយមនៅបរិវេណវិហារ Al Aqsa Mosque ក្នុងទីក្រុងហ្ស៊េរុយសាឡិម គឺជាបញ្ហា ប្រឈមយ៉ាងច្បាស់ និងការបង្កហេតុដែលត្រូវបានគេថ្កោលទោស និងមិនអាចទទួលបាននោះទេ។
នៅក្នុងសេចក្តីថ្លែងការណ៍មួយលោកបាននិយាយថា៖ «អ្នកតាំងលំនៅអ៊ីស្រាអែលរាប់សិបនាក់ដែលដឹកនាំដោយលោក Rabbi Yehuda Glick បានចូលទៅក្នុងទីលាន Al Aqsa Square ធ្វើដំណើរបង្កហេតុ និងបានបួងសួងអធិដ្ឋាននៅផ្នែកខាងកើតនៃវិហារនោះ»។
ការចូលទៅទីលាននោះបានកើតឡើង ១ ថ្ងៃ ក្រោយពីពលរដ្ឋប៉ាឡេស្ទីន ៦ នាក់ បានឈឺចាប់ដោយសារស្ទះខ្យល់កាលពីថ្ងៃចន្ទ ដោយសារការវាយប្រហារស្ព្រៃយ៍ម្រេចរបស់អ្នកតាំងលំនៅអ៊ីស្រាអែលនិងការវាយធ្វើបាបនៅក្នុងទីប្រជុំជន Huwara ខាងត្បូងទីក្រុងណាប្លូនៃតំបន់វេសប៊ែង។ នេះបើយោងតាមសាក្សីប៉ាឡេស្ទីន។
ពួកគេបាននិយាយថា អ្នកតាំងលំនៅអ៊ីស្រាអែលរាប់សិបនាក់ បានធ្វើការវាយប្រហារផ្ទះសំបែងជាច្រើនរបស់ពលរដ្ឋប៉ាឡេស្ទីន យានជំនិះ និងរថយន្តសាមុយ ក្រៅពីដុតរថយន្តដឹកទំនិញ ១ គ្រឿងនៅក្រោមការការពាររបស់កងទ័ពអ៊ីស្រាអែល។
លោកបានបន្ថែមថា៖ «ការបន្តរបស់អ៊ីស្រាអែលក្នុងការចាត់វិធានការបែបនេះជា ការបន្ថែមទៅលើការកើនឡើងនៃឧក្រិដ្ឋកម្មរបស់អ្នកតាំងលំនៅប្រឆាំងនឹងពលរដ្ឋប៉ាឡេស្ទីន ក្រោមការការពាររបស់កងទ័ពដែលកាន់កាប់តំបន់វេសប៊ែង នឹងមិននាំមកនូវភាពស្ងប់ស្ងាត់ ឬស្ថិរភាព នោះទេ»៕
