សេដ្ឋវិទូជាន់ខ្ពស់នៃ IMF លោកស្រី Concepcion Verdugo Yepes (ស្តាំ) សម្លឹងមើលក្នុងអំឡុងកិច្ចប្រជុំកំពូលដើម្បីលទ្ធិប្រជាធិបតេយ្យឆ្នាំ ២០២៣ នៅក្រសួងរតនាគារអាមេរិក កាលពីថ្ងៃទី ២៨ ខែមីនា ឆ្នាំ ២០២៣។ AFP
ថ្ងៃទី ៤ ខែមេសា ឆ្នាំ ២០២៣ អង្គការមូលនិធិរូបិយវត្ថុអន្តរជាតិ ឬហៅកាត់ថា IMF បានលើកឡើងថា វិបត្តិធនាគារនៅសហរដ្ឋអាមេរិក និងអឺរ៉ុបនាពេលថ្មីៗនេះអាចនឹងរីករាលដាលដល់ស្ថាប័នមិនមែនធនាគារសំខាន់ៗដូចជា មូលនិធិសោធននិវត្តន៍ ក៏ដូចជាអាចជំរុញឱ្យមានភាពស្មុគស្មាញកាន់តែខ្លាំងដល់ការប្រយុទ្ធប្រឆាំងនឹងអតិផរណារបស់ធនាគារកណ្តាលនៅតាមបណ្ដាប្រទេសនានា។
អ្នកជំនាញសេដ្ឋកិច្ចរបស់អង្គការ IMF បានលើកឡើងនៅក្នុងអត្ថបទមួយថា៖ «ហានិភ័យរបស់វិស័យធនាគារអាចនឹងកើនឡើងនៅប៉ុន្មានខែខាងមុខនេះចំពេលមានការរឹតបន្តឹងគោលនយោបាយរូបិយវត្ថុទូទាំងសកលលោក»។
លោកបានបន្ថែមថា៖ «ហានិភ័យនេះក៏បានរីករាលដាលដល់វិស័យមិនមែនធនាគារដែលជាប់ពាក់ព័ន្ធជាបន្តបន្ទាប់។ វិស័យមិនមែនធនាគារទាំងអស់នោះផងដែរមានតម្លៃស្ទើរតែពាក់កណ្តាលនៃទំហំហិរញ្ញវត្ថុទាំងអស់នៅលើពិភពលោក»។
គួរដឹងដែរថា អត្ថបទរបស់អ្នកជំនាញសេដ្ឋកិច្ចខាងលើត្រូវបានបោះផ្សាយស្របទៅ នឹងរបាយការណ៍ប្រចាំឆ្នាំរបស់អង្គការ IMF ស្តីពីស្ថិរភាពហិរញ្ញវត្ថុសកល។ ជាការកត់សម្គាល់ធនាគារកណ្តាលនៅសហគមន៍អឺរ៉ុប និងនៅសហរដ្ឋអាមេរិក បាននិងកំពុងដាក់ចេញវិធានការដោះស្រាយដ៏ត្រឹមត្រូវមួយ ដើម្បីដោះស្រាយបញ្ហាអត្រាអតិផរណាដែល កំពុងកើនឡើងខ្ពស់ខ្លាំងតាមរយៈការដំឡើងអត្រាការប្រាក់ដើម្បីអាចជួយសម្រួលដល់វិស័យធនាគារដែលកំពុងជួបបញ្ហាបង្កឡើងដោយការដួលរលំធនាគារ Silicon Valley។
ធនាគាផ្តល់ប្រាក់កម្ចីផ្នែកបច្ចេកវិទ្យាដែលមានទីស្នាក់ការកណ្ដាលនៅរដ្ឋកាលីហ្វ័រនីញ៉ាមួយនេះបានក្ស័យធនបន្ទាប់ពីបានដំឡើងអត្រាការប្រាក់ខ្ពស់ហួសហេតុ អំឡុងពេលដែលធនាគារកណ្តាលអាមេរិកបានចាប់ផ្តើមយុទ្ធនាការដំឡើងអត្រាការប្រាក់កាលពីឆ្នាំ ២០២២។
គួរដឹងដែរថា ចំនួនស្ថាប័នហិរញ្ញវត្ថុដែលមិនមែនជាធនាគារ ឬហៅកាត់ថា NBFIs រួមមានដូចជាស្ថាប័នមូលនិធិសោធននិវត្តន៍ និងមូលនិធិវិនិយោគផ្សេងៗ បានកើនឡើងច្រើនរាប់ចាប់តាំងពីវិបត្តិហិរញ្ញវត្ថុពិភពលោកឆ្នាំ ២០០៨ ដោយសារតែកាលនោះ និយតករនៅតាមបណ្ដាប្រទេសភាគច្រើនបានរឹតបន្តឹងច្បាប់ស្ដីពីធនាគារ។
អង្គការ IMF បានលើក ឡើងថា «NBFIs មានទំនាក់ទំនងយ៉ាងជិតស្និទ្ធជាមួយធនាគារហើយអាចក្លាយជាកត្តារួមចំណែកដ៏សំខាន់ដល់វិបត្តិហិរញ្ញវត្ថុ»។សេដ្ឋវិទូរបស់អង្គការ IMF ខាងលើបានសរសេរថា «វិស័យ NBFIs ដែលអាចដំណើរការទៅបានដោយរលូនមានសារៈសំខាន់ណាស់សម្រាប់ស្ថិរភាពហិរញ្ញវត្ថុ»។
ដើម្បីដោះស្រាយបញ្ហាឱ្យបានត្រឹមត្រូវ អង្គការ IMF បានផ្ដល់ជាអនុសាសន៍ថា អ្នកបង្កើតគោលនយោបាយទាំងឡាយត្រូវតែប្រើប្រាស់គ្រប់មធ្យោបាយរួមមានដូចជា ការអនុម័តវិធានការត្រួតពិនិត្យនិងបទប្បញ្ញត្តិផ្សេងៗនៅក្នុងវិស័យហិរញ្ញវត្ថុឱ្យបានកាន់តែរឹងមាំជាងមុន និងចាត់វិធានការឱ្យក្រុមហ៊ុនបង្ហាញទិន្នន័យអំពីហានិភ័យដែលពួកគេកំពុងជួបប្រទះ។
ធនាគារកណ្តាលរបស់បណ្ដា ប្រទេសនីមួយៗក៏មានតួនាទីសំខាន់ផងដែរដោយត្រូវផ្តោតលើគោលដៅគាំទ្រជាលក្ខណៈបណ្តោះអាសន្នដល់វិស័យ NBFIs ដោយសារតែពួកគេមានឥទ្ធិពលខ្លាំងដល់ស្ថិរភាពហិរញ្ញវត្ថុ និងស្ថាប័នដទៃទៀតដែលត្រូវបានចាត់ទុកថា មានសារៈសំខាន់នៅក្នុងវិស័យមួយនេះ៕
