លោក Michael Mulroy អតីតមន្ត្រីជាន់ខ្ពស់នៃមន្ទីរបញ្ជកោណ។ Twitter
មន្រ្តីសហរដ្ឋអាមេរិក កំពុងស្រាវជ្រាវរកប្រភពដែលធ្វើឱ្យឯកសារយោធា និងចារកម្មសម្ងាត់កម្រិតខ្ពស់ បែកធ្លាយនៅលើអ៊ិនធឺណិត ខណៈអ្នកជំនាញអះអាងថា វាអាចជាជនជាតិអាមេរិកាំងណាម្នាក់ ដែលធ្វើឱ្យបែកធ្លាយ។ នេះបើតាមសេចក្ដីរាយការណ៍របស់ទីភ្នាក់ងារសារព័ត៌មាននៅថ្ងៃទី ១០ ខែមេសានេះ។
ក្រុមមន្ត្រីអាមេរិកបានឱ្យដឹងថា វិសាលភាពនៃឯកសារសម្ងាត់ មានរាប់ទាំងពីព័ត៌មានទាក់ទងនឹងអ៊ុយក្រែន ចិន មជ្ឈិមបូព៌ា និងអាហ្វ្រិក។
អតីតមន្ត្រីជាន់ខ្ពស់នៃមន្ទីរបញ្ជកោណ លោក Michael Mulroy បានប្រាប់រ៉យទ័រក្នុងបទសម្ភាសន៍ថា៖«គេផ្ដោតទៅលើអាមេរិកផ្ទាល់ចំពោះការលេចធ្លាយ ព្រោះឯកសារជាច្រើនមានតែនៅក្នុងដៃរបស់សហរដ្ឋអាមេរិកប៉ុណ្ណោះ»។
បើតាមការរាយការណ៍របស់រ៉យទ័រដដែល ក្រុមមន្ត្រីអាមេរិក បាននិយាយថា ការស៊ើបអង្កេតកំពុងស្ថិតក្នុងដំណាក់កាលដំបូង ហើយអ្នកដែលរៀបចំការស៊ើបអង្កេត មិនបានច្រានចោលពីលទ្ធភាពដែលថាអ្នកមានទំនាក់ទំនងជាមួយរុស្ស៊ី អាចនៅពីក្រោយការបែកធ្លាយនោះទេ។
គួរបញ្ជាក់ថា ការបែកធ្លាយចុងក្រោយនេះ ត្រូវបានគេមើលឃើញថា ជាការបំពានផ្នែកសន្តិសុខដ៏ធ្ងន់ធ្ងរបំផុតមួយ រាប់តាំងពីការលេចធ្លាយឯកសារ វីដេអូ និងព័ត៌មានការទូតជាង ៧០០ ០០០ សំណុំនៅលើអ៊ិនធឺណិតក្នុងឆ្នាំ ២០១៣។
មន្ត្រីអាមេរិក ២រូប ដែលរ៉យទ័រមិនបានបញ្ជាក់ឈ្មោះ បាននិយាយកាលពីថ្ងៃអាទិត្យថា អាមេរិកមិនបានច្រានចោលការណ៍ដែលថា ឯកសារសម្ងាត់បែកធ្លាក់ចុងក្រោយអាចត្រូវបានគេក្លែងបន្លំ ដើម្បីបំភាន់អ្នកស៊ើបអង្កេតអំពីប្រភពដើម ឬដើម្បីផ្សព្វផ្សាយព័ត៌មានមិនពិតដែលអាចប៉ះពាល់ដល់ផលប្រយោជន៍សន្តិសុខរបស់សហរដ្ឋអាមេរិក នោះទេ។
ប្រភពដដែលថា យោធា និងទីភ្នាក់ងារស៊ើបការណ៍សម្ងាត់ កំពុងពិនិត្យមើលដំណើរការរបស់ខ្លួនថាតើព័ត៌មានស៊ើបការណ៍សម្ងាត់មួយចំនួន ត្រូវបានចែករំលែកផ្ទៃក្នុងយ៉ាងទូលំទូលាយប៉ុណ្ណា។
មន្ត្រីម្នាក់ក្នុងចំណោមទាំង ២ នាក់ បានអះអាងបន្ថែមថា ក្រុមមន្ត្រីអាមេរិកក៏កំពុងសម្លឹងមើលពីកត្តាជំរុញលើកទឹកចិត្ត ដែលធ្វើឱ្យមន្ត្រីអាមេរិក ឬក្រុមមន្ត្រីណាមួយពាក់ព័ន្ធនឹងការលេចធ្លាយឯកសារសម្ងាត់រសើបបែបនេះ៕
