លោកអង់តូនីញ៉ូ ហ្គុយតឺរេស ថ្លែងក្នុងសន្និសីទមួយកាលពីថ្ងៃទី ១១ មេសា។ AFP
ជនស៊ីវិលជាង ៥០ នាក់ត្រូវបានសម្លាប់នៅក្នុងការប្រយុទ្ធមួយនាប្រទេសស៊ូដង់នៅថ្ងៃទី ១៦ ខែមេសា ម៉ោងនៅស៊ូដង់។ នេះបើតាមសេចក្ដីរាយការណ៍ព័ត៌មាននានាដែលបានចេញផ្សាយ។
សារព័ត៌មាន NHK របស់ជប៉ុន ផ្សាយថា កងទ័ពរបស់ស៊ូដង់និងក្រុមប្រដាប់អាវុធ ១ ក្រុមកំពុងប្រយុទ្ធយ៉ាងស្វិតស្វាញហើយសញ្ញានៃការប្រយុទ្ធមិនទាន់ថមថយនៅឡើយ។
ប្រព័ន្ធផ្សព្វផ្សាយក្នុងស្រុករាយការណ៍ថា កងទ័ពស៊ូដង់បើកការវាយប្រហារដោយកាំភ្លើងធំនិងការវាយប្រហារពីលើអាកាសតាមយន្តហោះយោធាលើមូលដ្ឋានក្រុមសកម្មប្រយុទ្ធ។
ក្រុមគ្រូពេទ្យក្នុងតំបន់និយាយថា ជនស៊ីវិលជាង ៥០ នាក់ត្រូវបានសម្លាប់ និងប្រហែល ៦០០ នាក់ផ្សេងទៀតរងរបួស។ អ្នករងរបួសទាំងនោះមានទាំងយោធា និងជនស៊ីវិល។
កងទ័ពស៊ូដង់ បានគ្រប់គ្រងប្រទេសចាប់តាំងពីរដ្ឋប្រហារក្នុងខែតុលា ឆ្នាំ ២០២១។ ប៉ុន្តែការចរចានយោបាយ កំពុងដំណើរការ ដើម្បីរៀបចំបង្កើតរដ្ឋាភិបាលស៊ីវិលឡើងវិញ។ កងកម្លាំងផ្ដាច់ខ្លួនដែលកំពុងប្រយុទ្ធជាមួយយោធាស៊ូដង់ នេះត្រូវបានគេរាយការណ៍ថា ជាក្រុមតស៊ូប្រឆាំងទៅនឹងអំណាចផ្ដាច់ការរបស់កងទ័ពដែលកាន់កាប់ប្រទេសដោយរដ្ឋប្រហារ។
អគ្គលេខាធិការអង្គការសហប្រជាជាតិ លោក Antonio Guterres បានថ្កោលទោសចំពោះការប្រយុទ្ធគ្នានេះ។ លោកបានបញ្ជាក់សាជាថ្មីពីការប្តេជ្ញាចិត្តរបស់អង្គការសហប្រជាជាតិក្នុងការគាំទ្រប្រជាជនស៊ូដង់ក្នុងការខិតខំប្រឹងប្រែងរបស់ពួកគេសម្រាប់ការផ្លាស់ប្តូរតាមបែបប្រជាធិបតេយ្យ។
ទោះជាយ៉ាងណាក្ដីសេចក្ដីរាយការណ៍នានាបង្ហាញថា ការប៉ះទង្គិចគ្នាទំនងជានឹងកើនឡើងបន្ថែមទៀត ខណៈភាគីទាំង ២ កំពុងបង្ហាញសញ្ញាថា ពួកគេនឹងបន្តការប្រយុទ្ធ៕
