សារព័ត៌មាន​ CNA​ ផ្សាយ​ថា ​អូស្ត្រាលី បាន​អះអាង​សាជាថ្មី​នូវ​ការ​ប្តេជ្ញាចិត្ត​របស់​ខ្លួន​ ក្នុង​ការ​ធ្វើ​ឱ្យប្រសើរ​ឡើងនូវ​ទំនាក់ទំនង​កសិកម្ម​ជា​មួយ​ប្រទេស​ចិន​ បន្ទាប់​ពី​កិច្ច​ប្រជុំ​ថ្នាក់​រដ្ឋមន្ត្រី​មួយ​រវាង​រដ្ឋមន្ត្រី​កសិកម្ម​អូស្ត្រាលី​ និង​សម​ភាគីចិន។​

ទីក្រុង​កង់​បេរ៉ា​ បាន​អ​បអរសាទ​រ​ចំពោះ​ការ​រីក​ចម្រើន​ឆ្ពោះទៅ​រក​ការ​ស្តារឡើង​វិញនូវ​ពាណិជ្ជកម្ម​អង្ករ​ចំពេល​មាន​ទំនាក់ទំនង​ការ​ទូតធ្លាក់​ចុះ​នៃ​ប្រទេស​ទាំង២ ​ធ្លាក់ចុះ​។

អូស្ត្រាលី​ បាន​និយាយថា​ ខ្លួន​បាន​ឈានដល់​កិច្ច​ព្រមព្រៀង​ជា​មួយ​ប្រទេស​ចិន​ ដើម្បី​ដោះស្រាយ​ជម្លោះ​របស់​ពួកគេ​លើការ​នាំ​ចូល​ស្រូវ​សាលី​ ហើយ​ចិន​ បន្ត​ការ​ទិញធ្យូង​ថ្ម​របស់​អូស្ត្រាលី​ព្រម​ទាំង​សន្យា​បង្កើន​ការ​នាំចូល​សាច់​គោពី​អូស្ត្រាលីផង​។

រដ្ឋមន្ត្រី​ក្រសួង​កសិកម្ម​លោក ​Murray Watt បាន​និយាយថា​ប្រទេស​ទាំង ២ ​សុទ្ធ​តែ​បាន​ទទួល​ផល​ប្រយោជន៍​ពីការ​ធ្វើ​ឱ្យ​ពាណិជ្ជកម្ម​មាន​ប្រក្រតី​ភាព​ឡើងវិញ។​ លោក​ថ្លែង​បែបនេះ​បន្ទាប់​ពី​ជួប​ប្រជុំជា​មួយ​អនុ​រដ្ឋមន្ត្រី​កសិកម្ម​ចិន​ Ma Youxiang​ នៅទី​ក្រុងកង់​បេរ៉ា​កាល​ពីថ្ងៃទី​១៧ ​ខែមេសា។​

រដ្ឋ​មន្ត្រី​ក្រសួង​កសិកម្ម​លោក ​Murray Watt ​បាន​និយាយ​នៅក្នុង​សេចក្តីថ្លែង​ការណ៍​មួយ​ថា ​៖«ខ្ញុំ​បាន​រំឭក​ឡើងវិញ​នូវ​ជំហរ​ច្បាស់លាស់​ និង​ជាប់លាប់​របស់​យើងថា​ រាល់​ឧប​សគ្គ​ពាណិជ្ជកម្ម​ដែល​ប៉ះពាល់​ដល់​ការ​នាំ​ចេញ​របស់​អូស្ត្រាលី​គួរតែ​ត្រូវបាន​ដកចេញ​»។

លោក​បន្ថែមថា​ អ្នក​ទាំង២​ បាន​ពិភាក្សា​ពី​បញ្ហា​ទ្វេភាគី ​ដែល​រួមមាន​កុងស៊ុល​និង​ពាណិជ្ជកម្ម​រវាង​អូស្ត្រាលី​ និង​ចិន។​

ទំនាក់​ទំនងការ​ទូត​របស់​ប្រទេស​អូស្ត្រាលី​ ជា​មួយចិន ​ដែល​ដៃ​គូពាណិជ្ជកម្ម​ដ៏ធំ​បំផុត​របស់ខ្លួន​បាន​តាន​តឹងយ៉ាង​ខ្លាំង ​ចាប់​តាំងពីឆ្នាំ ​២០២៨ ​នៅ​ពេលដែល​ខ្លួន​បាន​ហាមឃាត់​ក្រុមហ៊ុន​ Huawei ​របស់​ប្រទេស​ចិន​មិន​ឱ្យផ្ដល់​ឧបករណ៍​ដំណើរ​ការ​បណ្តាញ ​5G​។

ទំនាក់ទំនងនេះ​កាន់តែ​អាក្រក់​បន្ទាប់ពី​ទីក្រុង​កង់បេរ៉ា​បាន​អំពាវនា​វឱ្យ​មាន​ការ​ស៊ើបអង្កេត​ឯករាជ្យ​លើ​ប្រភព​ដើមនៃ ​COVID-19 ​ដែល​សំដៅ​ដល់ចិន។​ ចិន​ បាន​ខឹង​សម្បា​និង​ឆ្លើយ​តប​ដោយ​ការបន្ថែម​ពន្ធ​លើ​ទំនិញ​អូស្ត្រាលី​រួម​មាន​ស្រា និង​ស្រូវសាលី។

ដំណើរ​ទស្សន​កិច្ច​របស់​អនុរដ្ឋមន្ត្រី​កសិកម្ម​ចិន​លោក ​Ma Youxiang ​ធ្វើ​ឡើង​តែ​ប៉ុន្មាន​ថ្ងៃ​បន្ទាប់​ពី​ដំណើរ​ទស្សនកិច្ច​របស់​អនុរដ្ឋមន្ត្រី​ការបរទេស ​Ma Zhaoxu ​ទៅ​កាន់​ប្រទេស​អូស្ត្រាលី​។

រដ្ឋមន្ត្រី​ក្រសួងក​សិកម្ម​លោក ​Murray Watt​ បាន​ប្រាប់​កាសែត ​The Australian​ ថា​ មន្ត្រីចិ​ន​ កំពុង​បង្ហាញពី ​«បំណង​ប្រាថ្នា​ដ៏​ស្មោះស្ម័គ្រ​សម្រាប់​កិច្ច​សហ​ប្រតិបត្តិការ​» ដើម្បី​ដក​ទណ្ឌកម្ម​ពន្ធ​ដែល​ចិន​ធ្លាប់​ដាក់​លើ​ផលិតផល​របស់​អូស្ត្រាលី។

អូស្ត្រាលី ​រំពឹងថា​នឹង​ឈានដល់​កិច្ច​ព្រមព្រៀង​ជា​មួយចិន​ជុំវិញ​ការ​ស្នើឱ្យ​បន្ធូរ​បន្ថយ​របាំង​ពន្ធលើ​ស្រាបន្ទាប់​ពី​កិច្ច​ព្រមព្រៀង​លើ​ស្រូវសាលី។

ចិនជា​ទីផ្សារ​ធំបំផុត​នៃ​ផលិត​ផល​ស្រា​អូស្ត្រាលី។​ កាល​ពីឆ្នាំ​២០១៩​ អូស្ត្រាលី​ នាំស្រា​ទៅចិន ក្នុង​តម្លៃ​ប្រមាណ​ជាង ១ ពាន់ ​៣​ រយ លាន​ដុល្លារ​អូស្ត្រាលី​ ប៉ុន្តែ​បន្ទាប់ពី​ចិនដាក់​ទណ្ឌកម្ម​អូស្ត្រាលី នាំ​ស្រា​ទៅចិន​ បាន​ត្រឹម​តែជាង​១២​ លាន​ដុល្លារ​អូស្ត្រាលី​ប៉ុណ្ណោះ។ ​នេះបើ​តាម​កាសែត​នានា​ ដែល​ស្រង់​របាយការណ៍​របស់​អង្គភាព​ឧស្សាហកម្ម​ស្រា​អូស្ត្រាលី ​ដែល​ចេញផ្សាយ​កាលពីខែ​កុម្ភៈ​ឆ្នាំ២០២៣​៕