លោកប្រធានាធិបតីកូរ៉េខាងត្បូង Yoon Suk Yeol (ស្តាំ) និងនាយករដ្ឋមន្ត្រីជប៉ុន ហ្វូមីអូ គីស៊ីដាចូលរួមសន្និសីទសារព័ត៌មានរួមគ្នាមួយ បន្ទាប់ពីកិច្ចប្រជុំនៅការិយាល័យប្រធានាធិបតីក្នុងទីក្រុងសេអ៊ូល កាលពីថ្ងៃទី ៧ ខែឧសភា ឆ្នាំ ២០២៣។ AFP
ប្រទេសជប៉ុន និងកូរ៉េខាងត្បូង គ្រោងនឹងព្រមព្រៀងគ្នានៅដើមខែក្រោយ ដើម្បីភ្ជាប់រ៉ាដារបស់ប្រទេសទាំង២តាមរយៈប្រព័ន្ធមួយរបស់អាមេរិក ដើម្បីចែករំលែកព័ត៌មានតាមដានតាមពេលវេលាជាក់ស្តែង ស្តីពីមីស៊ីលផ្លោងរបស់កូរ៉េខាងជើង។ នេះបើតាមការចុះផ្សាយរបស់ទីភ្នាក់ងារព័ត៌មានរ៉យទ័រកាលពីថ្ងៃអង្គារ ដោយស្រង់សម្ដីរបស់ប្រភពមិនបញ្ចេញឈ្មោះម្នាក់ ដែលដឹងពីបញ្ហានេះ។
បើតាមប្រភព រដ្ឋមន្ត្រីការពារជាតិជប៉ុន កូរ៉េខាងត្បូង និងសហរដ្ឋអាមេរិក គ្រោងនឹងសម្រេចកិច្ចព្រមព្រៀងមួយលើបញ្ហានេះ នៅខាងក្រៅកិច្ចប្រជុំកំពូលការពារជាតិអាស៊ី ដែលនឹងធ្វើឡើងនៅប្រទេសសិង្ហបុរីនៅដើមខែក្រោយ។
ចំណែកឯអ្នកនាំពាក្យកំពូលរបស់រដ្ឋាភិបាលជប៉ុន លោក Hirokazu Matsuno វិញ បាននិយាយថា មិនទាន់មានការសម្រេចចិត្តណាមួយត្រូវបានធ្វើឡើងលើកិច្ចព្រមព្រៀង ដែលបានគ្រោងទុកនេះនៅឡើយទេ។
ទោះបីជាយ៉ាងណាក៏ដោយ ទីភ្នាក់ងារព័ត៌មាន Yonhap បានរាយការណ៍ថា ការិយាល័យប្រធានាធិបតីកូរ៉េខាងត្បូង បាននិយាយថា ក្រុងសេអ៊ូល នឹងបង្កើតក្រុមជាមួយប្រទេសជប៉ុន និងសហរដ្ឋអាមេរិក ដើម្បីចែករំលែកព័ត៌មានតាមដានអំពីមីស៊ីលរបស់កូរ៉េខាងជើង។ សេចក្ដីរាយការណ៍ដដែលបានបន្តដោយ ស្រង់សម្ដីមន្រ្តីជាន់ខ្ពស់កូរ៉េខាងត្បូងម្នាក់ថា គេកំពុងធ្វើការលើប្រព័ន្ធនេះក្នុងពេលបច្ចុប្បន្ន។
គួរគូសបញ្ជាក់ថា កាលពីខែវិច្ឆិកាឆ្នាំមុន ជប៉ុន កូរ៉េខាងត្បូង និងសហរដ្ឋអាមេរិក បានយល់ព្រមបង្កើនល្បឿននៃការចែករំលែកព័ត៌មានជាមួយគ្នា ដោយសារតែកូរ៉េខាងជើងបង្កើនការបាញ់មីស៊ីលផ្លោងទ្រង់ទ្រាយធំដែលមិនធ្លាប់មានពីមុនមក។
បច្ចុប្បន្ននេះ ជប៉ុន និងកូរ៉េខាងត្បូង មានទំនាក់ទំនងជាមួយអាមេរិកលើប្រព័ន្ធរ៉ាដារៀងៗខ្លួន ខណៈប្រទេសទាំង២គ្មានទំនាក់ទំនងរ៉ាដាជាមួយគ្នាដោយផ្ទាល់នោះទេ៕
