លោក ចូ បៃដិន ប្រធានាធិបតីសហរដ្ឋអាមេរិក (ឆ្វេង) និងលោក ស៊ី ជីនភីង ប្រធានាធិបតីចិន។ AFP
ត្រឹមតែ ១ ថ្ងៃប៉ុណ្ណោះបន្ទាប់ពីប្រមុខការទូតរបស់សហរដ្ឋអាមេរិកលោក អានតូនី ប្ល៊ីនកែន (Antony Blinken) បញ្ចប់ទស្សនកិច្ចដ៏កម្រក្នុងរយៈពេលជិត ៥ ឆ្នាំនៅទីក្រុងប៉េកាំង ដើម្បីបន្ថយកម្ដៅនៃការប្រឈមដាក់គ្នារវាងមហាអំណាចលេខ ១ និងលេខ ២ នេះ ប្រធានាធិបតីអាមេរិក លោក ចូ បៃដិន(Joe Biden) កាលពីថ្ងៃអង្គារបានហៅប្រធានាធិបតីចិនស៊ី ជីនភីង (Xi Jinping) ថាជា «ជនផ្តាច់ការ» ដែលធ្លាក់ដល់របត់ថ្មីមួយទៀតនៃទំនាក់ទំនងរបស់មហាអំណាចទាំង ២។
ក្នុងជំនួបទ្វេភាគី ២ ថ្ងៃ កាលពីថ្ងៃអាទិត្យចន្ទ ភាគីចិនបានហៅ «ទំនាក់ទំនងនៃប្រទេសទាំង ២ ធ្លាក់ដល់ចំណុចដ៏ទាបបំផុតចាប់តាំងពីផ្តើមរឹតចំណងការទូតជាមួយគ្នាឡើងវិញ» នៅឆ្នាំ ១៩៧៩ ក្រោយអាមេរិកទទួលស្គាល់គោលនយោបាយចិនតែមួយ ដែលបូកបញ្ចូលតៃវ៉ាន់ជាផ្នែករបស់ចិន។
ថ្លែងក្នុងកម្មវិធីរៃអង្គាសថវិកាមួយពីរដ្ឋកាលីហ្វ័រនីញ៉ា ក្រៅពីហៅមេដឹកនាំចិនថា «ផ្តាច់ការ» ប្រធានាធិបតីអាមេរិកក៏បាននិយាយថា ប្រធានាធិបតី ស៊ី ជីនភីង មានការខ្មាសអៀនខ្លាំងណាស់ នៅពេលដែលបាឡុងហោះរបស់ចិនត្រូវបានបង្ហោះលើលម្ហអាកាសអាមេរិកនៅដើមឆ្នាំនេះ។ នេះបើយោងតាមទីភ្នាក់ងារព័ត៌មានរ៉យទ័រ។
ការហៅមេដឹកនាំចិនបែបនេះ បើតាមរ៉យទ័រ វាមិនច្បាស់ទេថា ហេតុអ្វីបានជាលោក បៃដិន ធ្វើអត្ថាធិប្បាយលើមេដឹកនាំចិន ដែលជាប្រធានាធិបតីដ៏មានឥទ្ធិពលបំផុតរបស់ប្រទេសចិនចាប់តាំងពីស្ថាបនិកបក្សកុម្មុយនីស្តចិន លោក ម៉ៅ សេទុង (Mao Zedong) ក្រោយលោក ស៊ី ជីនភីង ទទួលបានអាណត្តិទី ៣ ដែលមិនធ្លាប់មានពីមុនមកជាប្រធានាធិបតី និងជាប្រធានបក្សកុម្មុយនីស្ត។
លោក បៃដិន បាននិយាយថា៖ «មូលហេតុដែលលោក ស៊ី ជីនភីង ខកចិត្តខ្លាំង ពេលដែលខ្ញុំបានបាញ់ទម្លាក់បាឡុងមានប្រអប់ចំនួន ២ ដែលពេញដោយឧបករណ៍ចារកម្មនៅក្នុងនោះ គឺគាត់មិនដឹងថាបាឡុងមាននៅទីនោះទេ»។
លោក បៃដិន និយាយថា «នោះជាការអាម៉ាស់យ៉ាងខ្លាំងសម្រាប់ជនផ្តាច់ការ។ នៅពេលដែលពួកគេមិនដឹងថាមានអ្វីបានកើតឡើង។ បាឡុងនោះមិនត្រូវបានរំពឹងទៅកន្លែងណាដែលវាត្រូវទៅនោះទេ។ វាត្រូវបានបង្ហោះទៅហើយ»។
តាមរ៉យទ័រដដែល លោក បៃដិន ក៏បានលើកឡើងថា ប្រទេសចិនជួបប្រទះផលលំបាកខាងសេដ្ឋកិច្ចយ៉ាងពិតប្រាកដក្នុងអំឡុងពេលនេះ។
ទោះយ៉ាងណាក៏ដោយ រហូតដល់ពេលនេះ ប្រធានាធិបតីចិន លោក ស៊ី ជីនភីង និងក្រសួងការបរទេសចិនមិនទាន់ឆ្លើយតបជាផ្លូវការទៅនឹងអ្វីដែលប្រធានាធិបតីអាមេរិកលើកឡើងនោះទេ។
ក្នុងជំនួបដ៏កម្រកាលពីដើមសប្តាហ៍នេះ ប្រធានាធិបតីចិន ស៊ី ជីនភីង និងរដ្ឋមន្ត្រីការបរទេសអាមេរិក អានតូនី ប្ល៊ីនកែន បានព្រមព្រៀងគ្នាដើម្បីធ្វើឱ្យអរិភាពដ៏ខ្លាំងរបស់ពួកគេងាកមកធម្មតាឡើងវិញ។ ក្រៅពីការសន្យាបន្ធូរបន្ថយភាពតានតឹង ភាគីទាំង ២ បានបរាជ័យក្នុងការបង្កើតលទ្ធផលសំខាន់ផ្សេងទៀតក្នុងអំឡុងពេលដំណើរទស្សនកិច្ចដ៏កម្ររបស់រដ្ឋមន្ត្រីការបរទេសអាមេរិកទៅកាន់ប្រទេសចិន។
នៅក្នុងជំនួបនោះ ពួកគេក៏បានបើកផ្លូវឱ្យមន្ត្រីការទូតជួបពិភាក្សាគ្នាឡើងវិញនៅក្នុងប៉ុន្មានសប្តាហ៍ខាងមុខនេះ។
បេសកជនផ្នែកអាកាសធាតុរបស់សហរដ្ឋអាមេរិក លោក ចន ឃើរី (John Kerry) អាចទៅបំពេញទស្សនកិច្ចនៅប្រទេសចិន ក្នុងពេលឆាប់ៗនេះ។ នេះបើតាមការលើកឡើងរបស់លោកបៃដិនកាលពីថ្ងៃអង្គារដែលសារព័ត៌មានរ៉យទ័របានដកស្រង់។
លោក បៃដិន បាននិយាយកាលពីថ្ងៃចន្ទថា លោកគិតថាទំនាក់ទំនងរវាងប្រទេសទាំង ២ ស្ថិតនៅលើផ្លូវត្រូវ។
ទោះបីអាមេរិកបង្កើតក្រុមសន្តិសុខយុទ្ធសាស្ត្រ Quad ដែលរួមមានប្រទេសជប៉ុន អូស្ត្រាលី ឥណ្ឌា និងសហរដ្ឋអាមេរិក ប៉ុន្តែប្រធានាធិបតី លោក ចូ បៃដិននិយាយថា អាមេរិកមិនបានព្យាយាមឡោមព័ទ្ធប្រទេសចិនទេ៕
