នាវាមុជទឹក ទីតាន បានផ្ទុះធ្លាក់ទៅបាតសមុទ្រ។ AFP
អាជ្ញាធរ បានលើកឡើងកាលពីថ្ងៃព្រហស្បតិ៍ថា យានមុជទឹក ដែលដឹកមនុស្សចំនួន ៥ នាក់ ក្នុងដំណើរស្រាវជ្រាវ និងសិក្សាអំពីកប៉ាល់ទីតានិក (Titanic) បានធ្លាក់នៅក្បែរកន្លែងលិចកប៉ាល់ទីតានិកនោះ បណ្តាលឱ្យមនុស្សទាំងអស់នៅក្នុងនោះ បានស្លាប់យ៉ាងអាណោចអាធ័ម។
ការណ៍នេះបានធ្វើឱ្យក្តីសង្ឃឹមក្នុងការស្វែងរកបុរសទាំង ៥ នាក់ ដែលអាចថានឹងនៅរស់ បានបាត់បង់ បន្ទាប់ពីការផ្គត់ផ្គង់អុកស៊ីហ្ស៊ែនរយៈពេល ៩៦ ម៉ោងរបស់យានមុជទឹកនោះអស់ក្រោយពេលធ្វើដំណើរចុះទៅក្នុងសមុទ្រកាលពីថ្ងៃអាទិត្យ។ ឆ្មាំឆ្នេរសមុទ្របានប្រកាសថា បំណែកយានមុជទឹកនោះ ត្រូវបានរកឃើញនៅចម្ងាយប្រហែល ៤៨៨ ម៉ែត្រ ពីកប៉ាល់ទីតានិកនៅក្នុងសមុទ្រអាត្លង់ទិកខាងជើង។
លោក ចន មួហ្គឺរ (John Mauger) ឧត្តមនាវីទោប្រចាំនៅស្រុកឆ្មាំសមុទ្រទីមួយ បានថ្លែងថា «នេះគឺជាព្រឹត្តិការណ៍បំផ្លិចបំផ្លាញយានមុជទឹកមួយដ៏មហន្តរាយបំផុត»។ គួរដឹងដែរថា បន្ទាប់ពីយាននេះបានបាត់ខ្លួន កងទ័ពជើងទឹកសហរដ្ឋអាមេរិកបានវិភាគទិន្នន័យតាមទូរស័ព្ទ និងបានរកឃើញភាពមិនប្រក្រតី ដោយហាក់ដូចជាបានឃើញសំឡេងផ្ទុះ កើតមាននៅជិតទីតាំងដែលបាត់បង់សញ្ញាទាក់ទង។
ក្រុមហ៊ុន OceanGate Expeditions ដែលជាក្រុមហ៊ុនគ្រប់គ្រង និងដំណើរការនាវាមុជទឹកនេះ បានអះអាងនៅក្នុងសេចក្តីថ្លែងការណ៍មួយថា «មនុស្សទាំង ៥ នាក់នៅក្នុងនាវានោះ ដោយមានអ្នកបើកយន្តហោះម្នាក់ឈ្មោះថា ស្តុកថុន រូស (Stockton Rush) បានបាត់បង់ជីវិតគួរឱ្យសោកស្ដាយជាទីបំផុត»។
ដោយឡែក ៤ នាក់ទៀតដែលនៅក្នុងយាននោះជាមួយគ្នា មាន ២ នាក់ជាសមាជិកគ្រួសារជនជាតិប៉ាគីស្ថានដ៏លេចធ្លោមួយគឺ លោក សាហ្សាដា ដាវូដ (Shahzada Dawood) និងកូនប្រុសរបស់លោកឈ្មោះថា ស៊ូឡេម៉ាន ដាវូដ (Suleman Dawood) និង ២ នាក់ទៀតគឺ អ្នកចូលចិត្តដើរផ្សងព្រេងជនជាតិអង់គ្លេសម្នាក់ឈ្មោះថា ហាមីស ហាឌិង (Hamish Harding) និងអ្នកជំនាញកប៉ាល់ទីតានិកលោក ផូល ហេនរី ណឺជីអូឡេត (Paul-Henri Nergeolet)។
ឆ្នាំ សមុទ្រអាមេរិកថា នាវាមុជទឹក ទីតាន បានផ្ទុះធ្លាក់ទៅបាតសមុទ្រ បណ្ដាលឱ្យមនុស្សទាំង ៥ នាក់ នៅក្នុងយាននោះស្លាប់ ។ AFP
ក្រុមហ៊ុន OceanGate បានលើកឡើងនៅក្នុងសេចក្តីថ្លែងការណ៍មួយថា «បុរសទាំង ៥ នាក់នេះ គឺជាអ្នករុករកដ៏ពិតប្រាកដ ដែលបានចែករំលែកស្មារតីនៃការផ្សងព្រេង និងចំណង់ចំណូលចិត្តយ៉ាងជ្រាលជ្រៅក្នុងការរុករក និងការពារមហាសមុទ្ររបស់ពិភពលោក»។ ក្រុមហ៊ុននេះបន្តថា «យើងសោកស្ដាយខ្លាំងណាស់ចំពោះការបាត់បង់ជីវិតរបស់ពួកគេ»។
គួរបញ្ជាក់ដែរថា ក្រុមហ៊ុន OceanGate បានចងក្រងឯកសារអំពីភាពពុកផុយរបស់កប៉ាល់ទីតានិក និងប្រព័ន្ធអេកូឡូស៊ីនៅជុំវិញនោះ តាមរយៈការធ្វើដំណើរទៅកាន់ទីនោះរៀងរាល់ឆ្នាំ។ ដោយឡែក ឆ្មាំឆ្នេរសមុទ្រក៏នៅតែបន្តការស្វែងរកព័ត៌មានបន្ថែម និងតម្រុយដែលអាចរកបានដោយកងទ័ពជើងទឹក អំពីការផ្ទុះយានមុជទឹកនោះ។ កិច្ចខិតខំប្រឹងប្រែងស្វែងរកនេះ បានពង្រីកតំបន់រុករកឱ្យកាន់តែធំជាបន្តបន្ទាប់ ហើយប្រព័ន្ធផ្សព្វផ្សាយព័ត៌មានជាច្រើន ក៏បានផ្តល់ព័ត៌មានថ្មីៗអំពីប្រតិបត្តិការនោះផងដែរ។
បន្ថែមលើនេះ សេតវិមានអាមេរិក ក៏បានសម្តែងការអរគុណចំពោះឆ្មាំឆ្នេរសមុទ្រអាមេរិក និងដៃគូអន្តរជាតិដែលចូលរួមក្នុងកិច្ចខិតខំប្រឹងប្រែងស្វែងរក និងជួយសង្គ្រោះក្នុងប្រតិបត្តិការនេះ។ មិនត្រឹមតែប៉ុណ្ណោះ ពួកគេបានចូលរួមរំលែកទុក្ខដល់ក្រុមគ្រួសាររងគ្រោះផងដែរ។
នាវាមុជទឹក ទីតាន បានផ្ទុះធ្លាក់ទៅបាតសមុទ្រ។ AFP
គួររំឭកថា នាវាមុជទឹករបស់ក្រុមហ៊ុន OceanGate បានដឹកមនុស្ស ៤៦ នាក់ទៅកាន់កន្លែងនាវាទីតានិកដោយជោគជ័យកាលពីឆ្នាំ២០២១ និងឆ្នាំ២០២២ នេះបើយោងតាមឯកសាររបស់ក្រុមហ៊ុនផ្ទាល់។ ចំពោះអតីតអ្នកដំណើរ ពួកគេបានលើកឡើងពីការព្រួយបារម្ភជុំវិញសុវត្ថិភាពរបស់នាវាមុជទឹក ដោយលើកឡើងពីស្ថានភាពចង្អៀត និងពន្លឺមានតិចតួចបំផុតអំឡុងពេលចុះទៅដល់ខាងក្រោម។
គួរដឹងដែរថា មុនពេលពួកគេចាប់ផ្ដើមធ្វើដំណើរតាមយានមុជទឹកនោះ មានការពន្យារពេលដោយសារតែបញ្ហាបច្ចេកទេស ដែលតម្រូវឱ្យមានការជួសជុល ដោយបានពន្យារពេលការធ្វើដំណើររហូតដល់ទៅ ១០ ម៉ោងកន្លះ។ លោក នីកូឡាយ រ៉ូថឺមែន (Nicolai Roterman) អ្នកបរិស្ថានវិទ្យានៅសមុទ្រជ្រៅ បានព្រមានថា «ឧបទ្ទវហេតុបែបនេះបានបង្ហាញពីហានិភ័យពីធម្មជាតិនៃទេសចរណ៍សមុទ្រជ្រៅ ហើយអាចនឹងកើតមានឧបទ្ទវហេតុស្រដៀងគ្នាបន្ថែមទៀត នៅពេលដែលឧស្សាហកម្មទេសចរណ៍សមុទ្រជ្រៅកាន់តែរីកចម្រើនបន្ថែមទៀត»៕
