«នាវាសន្តិភាព (Peace Art)» ដែលមានទម្ងន់ ១៤ ៣០០តោនគ្រោងចេញទៅបំពេញបេសកកម្មមនុស្សធម៌។ AFP
តាមសេចក្តីរាយការណ៍នានាបានឱ្យដឹងថា មហាយក្សចិនដែលប្រឈមការប្រជែងឥទ្ធិពលជាមួយសហរដ្ឋអាមេរិកនិងសម្ព័ន្ធនៅ កំពុងបញ្ជូនកប៉ាល់មន្ទីរពេទ្យដែលគ្រប់គ្រងដោយយោធាទៅកាន់ប៉ាស៊ីហ្វិក ហើយនឹងចូលចតផ្តល់ការព្យាបាលដល់ប្រជាពលរដ្ឋទូទៅ នៅប្រទេសកោះ គីរីបាទី តុងហ្គា វ៉ានូអាទូ កោះសូឡូម៉ុន និងទីម័រខាងកើត។
ក្រសួងការពារជាតិចិន បាននិយាយនៅក្នុងសេចក្តីថ្លែងការណ៍មួយផ្សព្វផ្សាយនៅថ្ងៃអាទិត្យ «នាវាសន្តិភាព (Peace Art)» ដែលមានទម្ងន់ ១៤ ៣០០តោន ដែលមានទំហំធំជាងនាវាពិឃាតចិនធម្មតា នឹងផ្តល់ជំនួយផ្នែកវេជ្ជសាស្ត្រដល់ពលរដ្ឋចិន និងអ្នករស់នៅក្នុងប្រទេសដែនកោះដែលនាវានេះចូលទៅចត ក្នុងបេសកកម្មដែលចិនដាក់ឈ្មោះថា «បេសកកម្មសុខដុមរមនា (Harmony Mission)» លើកទី៩ របស់ខ្លួន។
អ្នកនាំពាក្យកងទ័ពជើងទឹកចិន លោក Liu Wensheng បាននិយាយនៅក្នុងសេចក្តីថ្លែងការណ៍មួយថា៖«នេះគឺដើម្បីបង្ហាញរូបភាពរបស់យើងជាប្រទេសធំមួយដែលមានការទទួលខុសត្រូវ»។
តាមសេចក្តីរាយការណ៍របស់រ៉យទ័រ កប៉ាល់នេះត្រូវបានគេដាក់ឱ្យប្រើប្រាស់ក្នុងឆ្នាំ ២០០៨ ហើយវាបានធ្វើដំណើរទៅកាន់ប្រទេសជាង ៤០ រួចមកហើយក្នុងរយៈពេលជាង១០ឆ្នាំនេះ។
ប្រទេសចិនបាននិងកំពុងកសាងទំនាក់ទំនងនៅក្នុងតំបន់ប៉ាស៊ីហ្វិកក្នុងរយៈពេលប៉ុន្មានឆ្នាំចុងក្រោយនេះចំពោះការព្រួយបារម្ភរបស់សហរដ្ឋអាមេរិក និងសម្ព័ន្ធមិត្តអូស្ត្រាលី និងនូវែលសេឡង់ ដែលបានមើលឃើញតំបន់នេះជាផ្នែកនៃឥទ្ធិពលរបស់ពួកគេជាយូរមកហើយ។
ប្រទេសចិនបានចុះហត្ថលេខាលើកិច្ចព្រមព្រៀងសន្តិសុខជាមួយកោះ សូឡូម៉ុនក្នុងឆ្នាំ ២០២២ ហើយសង្ឃឹមថានឹងបង្កើតទំនាក់ទំនងស្រដៀងគ្នាជាមួយបណ្តាប្រទេសប៉ាស៊ីហ្វិកផ្សេងទៀត។ រដ្ឋមន្ត្រីការបរទេសរបស់ខ្លួនបាននិយាយថា ទំនាក់ទំនងជាមួយកោះអាចធ្វើជាគំរូ។
សហរដ្ឋអាមេរិកបានសន្យាផ្តល់មូលនិធិបីដងសម្រាប់តំបន់ ហើយអាមេរិកបានបើកស្ថានទូតមួយនៅកោះសូឡូម៉ុន ក្នុងខែកុម្ភៈ បន្ទាប់ពីអវត្តមានរយៈពេល៣០ឆ្នាំ។ អាមេរិកក៏កំពុងរៀបចំផែនការស្ថានទូតនៅប្រទេសវ៉ានូអាទូ (Vanuatu) ៕
