ទីតាំងកន្លែងកើតហេតុក្នុងខេត្ត Dak Lak កាលពីខែមុន។
អាជ្ញាធរវៀតណាម បានចាប់ខ្លួនបុរស ៣ នាក់បន្ថែមទៀត ដែលពាក់ព័ន្ធនឹងការវាយប្រហារភេរវកម្មលើសាលាឃុំចំនួន ២ កន្លែងនៅក្នុងខេត្ត Dak Lak កាលពីខែមុន។ នេះបើតាមការចុះផ្សាយរបស់កាសែត VnEpxress ដែលថា បុរសទាំង ៣ ត្រូវបានចាប់ខ្លួន១០០ គីឡូម៉ែត្រពីកន្លែងកើតហេតុ។
បុរសទាំង៣អ្នក រួមមានឈ្មោះ Nay Yen អាយុ ៥៣ ឆ្នាំឈ្មោះ Nay Tam អាយុ ៤៩ ឆ្នាំ និងឈ្មោះ Y Ju Nie អាយុ ៥៥ ឆ្នាំ និងត្រូវបានចាប់ខ្លួនដោយប៉ូលិសខេត្ត Dak Lak កាលពីថ្ងៃសៅរ៍ ចំពោះអំពើភេរវកម្ម ដែលដាក់គោលដៅលើអាជ្ញាធរ។
គួរបញ្ជាក់ថា ក្រុមប្រដាប់អាវុធបានវាយប្រហារលើការិយាល័យគណៈកម្មាធិការប្រជាជនចំនួន ២ ដែលជាកន្លែងប៉ូលិសស្នាក់នៅ ក្នុងឃុំ Ea Tieu និងឃុំ Ea Ktur កាលពីព្រឹកថ្ងៃទី ១១ ខែមិថុនា ដែលបណ្តាលឱ្យមនុស្ស៩នាក់ស្លាប់ និងជាច្រើននាក់ផ្សេងទៀតរងរបួស។
រហូតមកដល់ពេលនេះ មនុស្សជាង ៩០ នាក់ ត្រូវបានចាប់ខ្លួន ដើម្បីធ្វើការស៊ើបអង្កេតសម្រាប់ការចោទប្រកាន់ជាច្រើន រួមទាំងអំពើភេរវកម្មផងដែរ។
បើតាមការចុះផ្សាយរបស់ VnEpxress ដែលស្រង់សម្ដីប្រភពផ្លូវការមិនបញ្ចេញឈ្មោះ ក្នុងចំណោមអ្នកដែលត្រូវបានចាប់ខ្លួន មានទាំងសមាជិកនៃអង្គការដែលមានមូលដ្ឋាននៅសហរដ្ឋអាមេរិក ដែលបានទទួលការណែនាំឱ្យចូលទៅវៀតណាមហើយធ្វើការវាយប្រហារ។
ក្រោយការវាយប្រហារនៅខែមិថុនា អាជ្ញាធរវៀតណាមបានរឹបអាវុធដែលជាអូសវត្ថុតាំងជាច្រើន រួមមានកាំភ្លើង២៣ដើម គ្រាប់បែកដៃ២គ្រាប់ គ្រាប់កាំភ្លើង ១២០០គ្រាប់ អាវុធបំផ្ទុះ១៥ដើម កាំបិត៣០ដើម និងសម្ភារផ្ទុះ ១,២ គីឡូក្រាម។ នាពេលនេះ អាជ្ញាធរវៀតណាមកំពុងស្វែងរកជនរត់គេចខ្លួន៣នាក់ផ្សេងទៀត ដែលបានពាក់ព័ន្ធនឹងការវាយប្រហារ៕
