យន្តហោះគ្មានមនុស្សបើករបស់ចិន។
នៅថ្ងៃទី ៣១ ខែកក្កដា ឆ្នាំ ២០២៣ ប្រទេសចិន បានប្រកាសពីវិធានការរឹតបន្តឹងការគ្រប់គ្រងការនាំចេញយន្តហោះគ្មានមនុស្សបើក ឬហៅកាត់ថា ដ្រូន និងឧបករណ៍ទាក់ទងនឹងដ្រូនមួយចំនួន ដោយអះអាងថា ខ្លួនចង់ការពារសន្តិសុខ និងផលប្រយោជន៍របស់ជាតិ ខណៈដែលកំពុងមានភាពតានតឹងជាមួយសហរដ្ឋអាមេរិកជុំវិញបញ្ហាបច្ចេកវិទ្យា។
ក្រសួងពាណិជ្ជកម្មចិនបានឱ្យដឹងថា វិធានការរឹតបន្តឹងលើឧបករណ៍ទាំងនោះរួមមានម៉ាស៊ីនដ្រូនមួយចំនួន ឡាស៊ែរ ឧបករណ៍ទំនាក់ទំនង និងប្រព័ន្ធប្រឆាំងដ្រូន។ ហើយវិធានការនេះ នឹងចូលជាធរមានចាប់ពីថ្ងៃទី ១ ខែកញ្ញា តទៅ។
អ្នកនាំពាក្យក្រសួងបានលើកឡើងនៅក្នុងសេចក្តីថ្លែងការណ៍មួយថា វិធានការគ្រប់គ្រងនេះ ក៏នឹងមានវិសាលភាពដល់ជនស៊ីវិលដែលប្រើប្រាស់ដ្រូនមួយចំនួនផងដែរ ហើយគ្មានដ្រូនស៊ីវិលណាមួយអាចត្រូវបាននាំចេញក្នុងគោលបំណងបម្រើដល់ប្រយោជន៍យោធានោះទេ។
អ្នកនាំពាក្យរូបនេះបាននិយាយថា៖ «ការពង្រីកវិសាលភាពនៃការគ្រប់គ្រងដ្រូនរបស់ប្រទេសចិននៅពេលនេះ គឺជាវិធានការសំខាន់មួយដើម្បីបង្ហាញពីជំហររបស់យើង ថាជាតួអង្គសំខាន់ដែលមានការទទួលខុសត្រូវ អនុវត្តគំនិតផ្តួចផ្តើមការពារសន្តិសុខពិភពលោក និងរក្សាសន្តិភាពពិភពលោក»។
ជាក់ស្ដែង អាជ្ញាធរបានជូនដំណឹងទៅកាន់បណ្ដាប្រទេសពាក់ព័ន្ធមួយចំនួនរួចស្រេចហើយ។ គួរដឹងដែរថា ចិនជាប្រទេសដែលមានឧស្សាហកម្មផលិតដ្រូនដ៏ធំ ហើយនាំចេញទៅកាន់ទីផ្សារជាច្រើននៅទូទាំងពិភពលោក រួមទាំងសហរដ្ឋអាមេរិកផងដែរ។
សមាជិកសភាអាមេរិកម្នាក់បាននិយាយថា ជាង ៥០ភាគរយនៃដ្រូនដែលដាក់លក់នៅសហរដ្ឋអាមេរិកត្រូវបានផលិតដោយក្រុមហ៊ុន DJI ដែលមានមូលដ្ឋាននៅប្រទេសចិន ហើយពួកវាគឺជាយន្តហោះដ្រូនដែលភ្នាក់ងារសុវត្ថិភាពសាធារណៈអាមេរិក ពេញនិយមប្រើប្រាស់បំផុត។
យ៉ាងណាក៏ដោយ ក្រុមហ៊ុន DJI បានប្រកាសកាលពីថ្ងៃចន្ទថា ខ្លួនតែងតែគោរពនិងអនុវត្តច្បាប់ និងបទប្បញ្ញត្តិនៃប្រទេស ឬតំបន់ដែលខ្លួនប្រតិបត្តិការយ៉ាងខ្ជាប់ខ្ជួន រួមទាំងស្របតាមបទប្បញ្ញត្តិគ្រប់គ្រងការនាំចេញរបស់ប្រទេសចិនផងដែរ។
ក្រុមហ៊ុនផលិតដ្រូននេះបានបន្ថែមថា «យើងមិនដែលបានរចនា និងផលិតផលិតផល ឬឧបករណ៍សម្រាប់ប្រើប្រាស់ក្នុងវិស័យយោធានោះទេ ហើយក៏មិនធ្លាប់ធ្វើទីផ្សារ ឬលក់ផលិតផលរបស់យើងសម្រាប់ប្រើប្រាស់នៅក្នុងជម្លោះយោធា ឬសង្គ្រាមនៅក្នុងប្រទេសណាមួយនោះដែរ»។
យ៉ាងណាមិញ គួររំឭកថា កាលពីខែមីនា ឆ្នាំ២០២២ ក្រុមហ៊ុនលក់រាយមួយរបស់អាឡឺម៉ង់បានចោទប្រកាន់ក្រុមហ៊ុន DJI ពីបទធ្វើឱ្យលេចធ្លាយទិន្នន័យស្តីពីទីតាំងយោធាអ៊ុយក្រែនទៅកាន់ប្រទេសរុស្ស៊ី ប៉ុន្តែក្រុមហ៊ុនDJI បានច្រានចោលថាជារឿងមិនពិតទាំងស្រុង។
ក្រសួងពាណិជ្ជកម្មចិនក៏ធ្លាប់បានប្រកាសកាលពីខែមេសាឆ្នាំនេះថា ប្រព័ន្ធផ្សព្វផ្សាយលោកខាងលិចកំពុងផ្សព្វផ្សាយចោទប្រកាន់ដែលគ្មានមូលដ្ឋាន ពោលគឺតែងតែចោទប្រទេសចិនថាកំពុងនាំចេញដ្រូនទៅកាន់សមរភូមិក្នុងប្រទេសអ៊ុយក្រែន។
ជាការឆ្លើយតបក្រសួងបានចេញរបាយការណ៍មួយដើម្បីបង្ហាញការចោទប្រកាន់ទាំងនោះ ថាជាការប៉ុនប៉ងដើម្បីលាបពណ៌ក្រុមហ៊ុនចិន។ បន្ថែមលើនេះ ក្រសួងក៏បានសង្កត់ធ្ងន់ថា ខ្លួននឹងបន្តពង្រឹងការគ្រប់គ្រងការនាំចេញដ្រូនបន្ថែមទៀត។
ការរឹតបន្តឹងការនាំចេញដ្រូននេះ ធ្វើឡើងបន្ទាប់ពីប្រទេសចិនបានប្រកាសដាក់ចេញវិធានការគ្រប់គ្រងការនាំចេញលោហៈមួយចំនួនដែលប្រើប្រាស់ក្នុងការផលិតបន្ទះសៀគ្វីកាលពីខែមុន។ ការរឹតបន្តឹងនេះផងដែរធ្វើឡើងបន្ទាប់ពីទីក្រុងវ៉ាស៊ីនតោនបានចាប់ផ្ដើមរឹតបន្តឹងការចូលប្រើប្រាស់របស់ចិនទៅកាន់បច្ចេកវិទ្យាសំខាន់ៗដូចជាឧបករណ៍ផលិតបន្ទះសៀគ្វីជាដើម។
កាលពីសប្ដាហ៍មុន របាយការណ៍ស៊ើបការណ៍សម្ងាត់របស់សហរដ្ឋអាមេរិក បានចេញផ្សាយថា ទីក្រុងប៉េកាំង ទំនងជាបានផ្តល់ឧបករណ៍យោធាទៅកាន់រុស្ស៊ី ប្រើប្រាស់នៅក្នុងសង្គ្រាមនៅប្រទេសអ៊ុយក្រែន។ ប៉ុន្តែ កាលពីថ្ងៃសុក្រ ទីក្រុងប៉េកាំងបានអះអាងថា ខ្លួនជាមួយរុស្ស៊ីគ្រាន់តែមានកិច្ចសហប្រតិបត្តិការសេដ្ឋកិច្ច និងពាណិជ្ជកម្មធម្មតាតែប៉ុណ្ណោះ៕
