អាជ្ញាធរចុះត្រួតពិនិត្យតំបន់ប៉មទួអេហ្វែលបារាំង ដែលរងការគំរាមកំហែងដោយគ្រាប់បែក។ រូបថត AFP
អាជ្ញាធរបារាំងបានជម្លៀសអ្នកទេសចរចេញពីតំបន់ប៉មទួអេហ្វែល (Eiffel Tower) អស់រយៈពេលជាច្រើនម៉ោងកាលពីចុងសប្តាហ៍កន្លងទៅនេះ ជុំវិញការគំរាមកំហែងដោយគ្រាប់បែកបង្កៃបន្ទាប់ពីប្រទេសនេះជួបវឹកវរដោយសារបាតុកម្មកាលពីពេលថ្មីៗកន្លងទៅនេះ។ យោងតាមទូរទស្សន៍បារាំងBFMTV។
BFMTV បានរាយការណ៍ថាជាន់ទាំង ៣ នៃប៉មទួអេហ្វែលរួមទាំងទីធ្លាជុំវិញនោះ ត្រូវបានជម្លៀសមនុស្សចេញស្របពេលដែលអាជ្ញាធរបន្តវាយតម្លៃការគំរាមកំហែងនេះ។
កន្លែងប្រចាំការដ៏ធំមួយរបស់សមត្ថកិច្ចត្រូវបានបង្កើតឡើងភ្លាមៗ ចំណែកឯចរាចរណ៍ត្រូវបានបង្វែរឱ្យប្រើទិសដៅផ្សេងខណៈក្រុមអ្នកជំនាញដោះមីនក៏មានវត្តមាននៅនឹងកន្លែងផងដែរដើម្បីវាយតម្លៃរឿងនេះ។
អ្នកនាំពាក្យរបស់ SETE ដែលជាក្រុមហ៊ុនប្រតិបត្តិការសម្រាប់អគារទួអេហ្វែលបាននិយាយថា៖ «វាជានីតិវិធីទូទៅក្នុងស្ថានភាពបែបនេះតែវាកម្រកើតមានណាស់»។
ទោះយ៉ាងណាប្រហែល ២ ម៉ោង បន្ទាប់ពីការជម្លៀសនោះប៉ូលិសបារាំងបានអនុញ្ញាតឱ្យអ្នកទេសចរអាចត្រឡប់ទៅទស្សនា និងដើរកម្សាន្តក្បែរតំបន់ប៉មទួអេហ្វែលឡើងវិញ។
ពេលនេះនៅខាងជើងសសរខាងត្បូងនៃប៉មទួអេហ្វែលមានកន្លែងប្រចាំការរបស់ប៉ូលិសមួយដែលចាំឃ្លាំមើលវីដេអូ ខណៈអ្នកទេសចរត្រូវឆ្លងកាត់ការត្រួតពិនិត្យសិនមុនពេលអនុញ្ញាតឱ្យចូលទស្សនា។
ការជម្លៀសបែបនេះគឺកម្រកើតមានណាស់។ ប្រវត្តិនៃការជម្លៀសរយៈពេលខ្លីធ្លាប់កើតឡើងម្តងនៅឆ្នាំ ២០១៩ នៅពេលដែលបុរសម្នាក់ព្យាយាមតោងឡើងលើប៉មទួអេហ្វែល។
ប៉មទួអេហ្វែលជានិមិត្តរូបនៃទីក្រុងប៉ារីស ប្រទេសបារាំង និងទទួលបានទេសចរខ្ទង់ ៧ លាននាក់ប្រចាំឆ្នាំ៕
