ប្រធានសភាថៃ លោក Wan Muhamad Noor នឹងកោះប្រជុំសមាជិកសភា និងព្រឹទ្ធសភាឱ្យបានឆាប់។ AFP
សភាទាំង ២ ថ្នាក់របស់ព្រះរាជាណាចក្រថៃ គឺរដ្ឋសភា និងព្រឹទ្ធសភាដែលមានសមាជិកសរុប ៧៥០ រូប អាចនឹងជួបប្រជុំភ្លាមៗ ដើម្បីកំណត់កាលបរិច្ឆេទជ្រើសរើសនាយករដ្ឋមន្ត្រី ដែលអូសបន្លាយជាង ៣ ខែទៅហើយ បន្ទាប់ពីការបោះឆ្នោតសកលកាលពីថ្ងៃទី ១៤ ខែឧសភា។
ប្រធានសភាលោក Wan Muhamad Noor Matha ដែលគេហៅយ៉ាងខ្លីថា «Wan Noor» ត្រូវបានដកស្រង់សម្តីដោយសារព័ត៌មាន thaipbsworld.com របស់ថៃ ដោយបាននិយាយថា លោកនឹងកោះប្រជុំសភា និងព្រឹទ្ធសភានៅថ្ងៃពុធនេះដើម្បីកំណត់កាលបរិច្ឆេទសម្រាប់ការប្រជុំរួមគ្នាដើម្បីជ្រើសរើសនាយករដ្ឋមន្ត្រី ដែលអាចជាថ្ងៃណាមួយចាប់ពីថ្ងៃទី ១៨ ដល់ថ្ងៃទី ២២ ខែសីហា។
តាមខ្លឹមសារដែលបានចេញផ្សាយនោះ ប្រធានសភាថៃលោក Wan Noor ដែលជាប់ ឆ្នោតដោយការឯកភាពគ្នារបស់សម្ព័ន្ធគណបក្សទាំង ៨ ផ្តួចផ្តើមដោយគណបក្សឆ្ពោះទៅមុខ (Move Forward Party) មានលោក ភិថា លីមចារើនរ៉ាតជាអ្នកដឹកនាំ បាននិយាយថា ការប្រជុំសភាទាំង ២ ជាថ្មីត្រូវអនុលោមតាមការសម្រេចរបស់តុលាការធម្មនុញ្ញដែលរំពឹងទុកនៅថ្ងៃពុធស្អែកនេះថា តើលោក ភិថា នៅបន្តមានសិទ្ធិឈរឈ្មោះសម្រាប់តួនាទីជានាយករដ្ឋមន្ត្រី ឬក៏ត្រូវអស់សិទ្ធិតាមញត្តិដែលសមាជិកសភាភាគច្រើនបានបោះឆ្នោតទប់ស្កាត់លោកសម្រាប់តំណែងនាយករដ្ឋមន្ត្រីកាលពីថ្ងៃទី ១៧ កក្កដា ដោយសារតែ លោក ភិថា ជាប់បណ្តឹងនៅតុលាការធម្មនុញ្ញជុំវិញរឿងក្តីកាន់កាប់ភាគហ៊ុននៅក្រុមហ៊ុនប្រព័ន្ធផ្សព្វផ្សាយ អំឡុងពេលដែលប្រធានបក្សឈ្នះឆ្នោតនេះឈរឈ្មោះជាតំណាងរាស្ត្រ។
ក្នុងរយៈពេលជិត ១ ខែចាប់តាំងពីថ្ងៃទី ១៩ ខែកក្កដាមក តុលាការធម្មនុញ្ញថៃដែលមានក្រុមប្រឹក្សាជំនុំជម្រះមានសមាជិក ៩ រូប ប្រើប្រាស់ដើម្បីត្រួតពិនិត្យបណ្តឹងទាំងប្រឆាំង និងគាំទ្រ លោក ភិថា លីមចារើនរ៉ាត សម្ព័ន្ធភាពគណបក្សទាំង ៨ ដែលមានអាសនៈសរុប ៣១២ ក៏បែកបាក់ផងដែរ ដោយគណបក្សភឿថៃ ដែលឈ្នះឆ្នោតលំដាប់លេខរៀងទី២ បានងាកទៅចាប់គណបក្សផ្សេងៗដែលមាននិន្នាការអភិរក្សនិយម និងមានយោធានៅពីក្រោយ។
មកទល់ពេលនេះសម្ព័ន្ធភាពថ្មីដែលមានគណបក្សចំនួន ៩ ប្រមែប្រមូលដោយគណបក្សភឿថៃមានអាសនៈសរុបតែ ២៣៨ សំឡេងប៉ុណ្ណោះ ដែលនៅតែខ្វះសំឡេងភាគច្រើននៅក្នុងសភាដែលមាន ៥០០ អាសនៈ។
យោងតាម thaipbs គណបក្សភឿថៃ មិនទាន់បានទាក់ទងជាផ្លូវការជាមួយគណបក្សចំនួន ២ ទៀត គឺគណបក្ស Palang Pracharath និង United Thai Nation ដែលគណបក្សទាំង ២ នេះសុទ្ធតែមានអំណាចយោធានៅពីក្រោយ ដើម្បីចូលរួមបង្កើតរដ្ឋាភិបាលចម្រុះ ដោយសារមានការព្រួយបារម្ភចំពោះប្រតិកម្មតបអវិជ្ជមានពីអ្នកបោះឆ្នោតរបស់ខ្លួន ដែលចាត់ទុកគណបក្សទាំង ២ នេះជាសំណល់នៃការធ្វើរដ្ឋប្រហារចំនួន ២ លើកក្នុងឆ្នាំ ២០១៤ និងឆ្នាំ ២០១៦។
ជាមួយគ្នានេះ សមាជិកនៃគណបក្សដែលមានចំណងជាមួយយោធាទាំង ២ បានបើកចំហឆន្ទៈក្នុងការចូលរួមជាមួយក្រុមចម្រុះដឹកនាំដោយគណបក្សភឿថៃ ប៉ុន្តែបានដាក់លក្ខខណ្ឌមិនប៉ះពាល់ដល់ការកែប្រែច្បាប់ដែលបន្ថយអំណាចព្រះរាជវាំងថៃ និងបន្ថយអំណាចរបស់ក្រុមយោធានោះទេ។
ក្រោយបេក្ខភាពលោកភិថាត្រូវបដិសេធចំនួន ២ លើក មានការផ្សព្វផ្សាយខ្លះថា គណបក្ស Palang Pracharath និង United Thai Nation ដែលសុទ្ធសឹងចេញពីក្រុមគ្រប់គ្រងកងកម្លាំងប្រដាប់អាវុធបានចរចាយកតំណែងក្រសួងការពារជាតិ និងក្រសួងមហាផ្ទៃរួចទៅហើយជាមួយគណបក្សភឿថៃ ដែលជាគណបក្សមានអាទិភាពខ្ពស់សម្រាប់ការដាក់បេក្ខភាពនាយករដ្ឋមន្ត្រីនៅក្នុងការបង្កើតរដ្ឋាភិបាលថៃថ្មី៕
