ប្រេងនឹងកាន់តែឡើងថ្លៃ ខណៈចិនកាត់បន្ថយអត្រាគោលនយោបាយដើម្បីគាំទ្រសេដ្ឋកិច្ច។ AFP
តម្លៃប្រេងបានកើនឡើងខ្ពស់នៅថ្ងៃទី ១៥ ខែសីហា ខណៈដែលប្រទេសចិន កាត់បន្ថយអត្រាគោលនយោបាយសំខាន់ៗ ជាលើកទីពីរ ដោយមិននឹកស្មានដល់ក្នុងរយៈពេលត្រឹមតែ ៣ ខែ ប៉ុណ្ណោះគឺដើម្បីជំរុញការស្ទុះងើបឡើងវិញនៃសេដ្ឋកិច្ច។
តែទោះជាយ៉ាងណាក៏ដោយទិន្នន័យបានបង្ហាញថា សេដ្ឋកិច្ចចិនក៏ប្រឈមនឹងភាពយឺតយ៉ាវណាស់ដែរ។ ប្រេងឆៅ Brent នាពេលអនាគតនឹងកើនឡើង ១១ សេន ឬ ០.១% ដែលធ្វើឱ្យតម្លៃការជួញដូរហក់ឡើងដល់ ៨៦,៣២ ដុល្លារក្នុងមួយបារ៉ែល។ ជាមួយគ្នានេះ ប្រេងឆៅរបស់អាមេរិក West Texas Intermediate ក៏បានកើនឡើង ៧ សេន ផងដែរ ០.១% កើនដល់ ៨២, ៥៧ ដុល្លារក្នុងមួយបារ៉ែល។
ការកើនតម្លៃបែបនេះ បន្ទាប់ពីធនាគារប្រជាជនចិន (PBOC) បានទម្លាក់អត្រាការប្រាក់ពី ២,៦៥ ភាគរយ ទៅ ២,៥០ ភាគរយលើទឹកប្រាក់ចំនួន ៤០១ ពាន់លានយន់ (៥៥, ២៥ ពាន់លានដុល្លារ) ដែលមានតម្លៃស្មើនឹងប្រាក់កម្ចីរយៈកន្លះឆ្នាំ (MLF) ដល់ស្ថាប័នហិរញ្ញវត្ថុមួយចំនួនដោយផ្អែកលើមូលដ្ឋាន មួយចំនួន។
ធនាគារប្រជាជនចិន (PBOC) បាននិយាយនៅក្នុងសេចក្តីថ្លែងការណ៍តាមអ៊ីនធឺណិតថា ការចាក់សាច់ប្រាក់នេះ គឺដើម្បីប្រឆាំងនឹងកត្តាជាច្រើនរួមទាំងការបង់ពន្ធដើម្បី រក្សាសាច់ប្រាក់នៃប្រព័ន្ធធនាគារឱ្យបានគ្រប់គ្រាន់។
ទិន្នន័យនៃទិន្នផលឧស្សាហកម្ម និងការលក់រាយរបស់ប្រទេសចិន បានបង្ហាញឱ្យឃើញថាសេដ្ឋកិច្ចចិន បានធ្លាក់ចុះបន្ថែមទៀតកាលពីខែមុន ដោយបង្កើនសម្ពាធលើសេដ្ឋកិច្ច ដែលកំពុងធ្លាក់ចុះរួចហើយ និងជំរុញឱ្យអាជ្ញាធរកាត់បន្ថយអត្រាគោលនយោបាយសំខាន់ៗមួយចំនួនដើម្បីជំរុញសកម្មភាពសេដ្ឋកិច្ចឡើងវិញ។
ទោះបីជាទិន្នន័យម៉ាក្រូសេដ្ឋកិច្ចចុះខ្សោយ ក៏ពិតមែន តែវិស័យប្រេងរបស់ប្រទេសចិនមានភាពរឹងមាំ។ ទិន្នផលរោងចក្រចម្រាញ់ប្រេងរបស់ប្រទេសចិន ក្នុងខែកក្កដា បានកើនឡើង ១៧,៤% ធៀបនឹងឆ្នាំមុន ដោយសារក្រុមហ៊ុនចម្រាញ់បានរក្សាទិន្នផលឱ្យកើនឡើង ដើម្បីឆ្លើយតបនឹងតម្រូវការសម្រាប់ការធ្វើដំណើរនារដូវក្ដៅ និងទទួលបានប្រាក់ចំណេញខ្ពស់ផងដែរសម្រាប់ការនាំចេញប្រេងឥន្ធនៈ។
ជាមួយគ្នានេះ ទិន្នផលប្រេង និងឧស្ម័នធម្មជាតិ របស់សហរដ្ឋអាមេរិក ត្រូវបានគេជឿថានឹងធ្លាក់ចុះនៅក្នុងខែកញ្ញា ពោលគឺជាខែទី២ ជាប់ៗគ្នា ដល់កម្រិតទាបបំផុតចាប់តាំងពីខែឧសភា។ នេះបើតាមទិន្នន័យរដ្ឋបាលព័ត៌មានថាមពលអាមេរិកបានបង្ហាញកាលពីថ្ងៃចន្ទ។
ទិន្នផលប្រេងរបស់សហរដ្ឋអាមេរិកធ្លាក់ចុះ អាចធ្វើឱ្យការរឹតបន្តឹងនៃការផ្គត់ផ្គង់ប្រេងពិភពលោកកាន់តែខ្លាំងឡើង ខណៈសម្ព័ន្ធមិត្តដែលគេស្គាល់ថាជា OPEC+ កំពុងកាត់បន្ថយផលិតកម្មប្រេង៕
