ឯកអគ្គរដ្ឋទូតសហរដ្ឋអាមេរិកប្រចាំប្រទេសជប៉ុន លោក Rahm Emanuel បានធ្វើទស្សនកិច្ចនៅតំបន់ ហ្វូគូស៊ីម៉ា (Fukushima) កាលពីថ្ងៃព្រហស្បតិ៍កន្លងទៅថ្មីនេះ។ រូបថត AFP
ឯកអគ្គរដ្ឋទូតសហរដ្ឋអាមេរិកប្រចាំប្រទេសជប៉ុន លោក Rahm Emanuel បានធ្វើទស្សនកិច្ចនៅតំបន់ ហ្វូគូស៊ីម៉ា (Fukushima) កាលពីថ្ងៃព្រហស្បតិ៍កន្លងទៅថ្មីនេះ និងបានប្រាប់ក្រុមអ្នកសារព័ត៌មានថា លោករំពឹងថា សហរដ្ឋអាមេរិក នឹងគាំទ្រដល់ប្រទេសជប៉ុន ប្រសិនបើការហាមឃាត់របស់ចិនលើអាហារសមុទ្ររបស់ជប៉ុន ក្លាយជាជម្លោះនៅអង្គការពាណិជ្ជកម្មពិភពលោក (WTO)។
ចិន ដែលជាដៃគូពាណិជ្ជកម្មដ៏ធំបំផុតរបស់ជប៉ុន បានដាក់បម្រាមលើផលិតផលជលផលជប៉ុន ភ្លាមៗបន្ទាប់ពីជប៉ុនបានបញ្ចេញទឹកវិទ្យុសកម្ម ពីរោងចក្រថាមពលនុយក្លេអ៊ែរ Fukushima ដែលបានបំផ្លាញកាលពីឆ្នាំ ២០១១ ចូលទៅក្នុងមហាសមុទ្រប៉ាស៊ីហ្វិកកាលពីថ្ងៃព្រហស្បតិ៍សប្តាហ៍មុន។
ទាក់ទិននឹងការដាក់បម្រាមនេះដែរ មន្ត្រីជប៉ុននៅតែបន្តបង្ហាញសកម្មភាពការទូតដើម្បីជំរុញឱ្យប្រទេសចិនលុបចោលការហាមឃាត់របស់ខ្លួន ដោយជប៉ុនយល់ថា ការធ្វើនេះមិនផ្អែកលើភ័ស្តុតាងវិទ្យាសាស្ត្រ។ លើសពីនេះ ជប៉ុនក៏បានប្តឹងទៅអង្គការពាណិជ្ជកម្មពិភពលោក (WTO) ផងដែរ។
លោក Rahm Emanuel តំណាងភាគីអាមេរិក ដែលជាសម្ព័ន្ធមិត្តរបស់ជប៉ុន បាននិយាយថា ប្រសិនបើប្រទេសជប៉ុនបន្តកិច្ចខិតខំប្រឹងប្រែងនោះ សហរដ្ឋអាមេរិកនឹងបន្តឈរប្រកៀកស្មា វាមិនមែនដោយសារតែប្រទេសទាំង ២ ជាសម្ព័ន្ធមិត្តប៉ុណ្ណោះទេ ប៉ុន្តែដោយសារតែមានភាពស្របច្បាប់ចំពោះករណីនេះ។
គួរជម្រាបថា កាលពីឆ្នាំ ២០២២ ប្រទេសជប៉ុនបាននាំចេញផលិតផលជលផលក្នុងរង្វង់ទឹកប្រាក់ប្រមាណ ៦០០ លានដុល្លារទៅកាន់ប្រទេសចិន ដោយវាបានធ្វើឱ្យចិនក្លាយជាទីផ្សារដ៏ធំបំផុតសម្រាប់ការនាំចេញអាហារសមុទ្ររបស់ជប៉ុន។ បន្ទាប់ពីចិនមកគឺហុងកុង ក៏ប៉ុន្តែថ្មីៗនេះ ហុងកុងក៏បានប្រកាសហាមឃាត់របស់ខ្លួនលើការនាំចូលអាហារសមុទ្រពីតំបន់ចំនួន ១០ នៃប្រទេសជប៉ុន បន្ទាប់ពីការបញ្ចេញទឹកវិទ្យុសកម្មនេះ៕
