របបយោធានីហ្សេ បញ្ជាឱ្យប៉ូលិសបណ្ដេញឯកអគ្គរដ្ឋទូតបារាំងចេញ។ AFP
របបយោធាដែលកំពុងដឹកនាំប្រទេសនីហ្សេ បានលុបចោលទិដ្ឋាការរបស់ឯកអគ្គរដ្ឋទូតបារាំង និងបានបញ្ជាឱ្យក្រុមប៉ូលិស បណ្តេញឯកអគ្គរដ្ឋទូតបារាំងចេញ។ វិធានការនេះបានធ្វើឡើងបន្ទាប់ពីពួកយោធា បានបញ្ជាឱ្យអ្នកការទូតរូបនេះ ចាកចេញពីប្រទេសនីហ្សេកាលពីសប្តាហ៍មុន។
កាលពីថ្ងៃព្រហស្បតិ៍ លិខិតមួយត្រូវបានចែកចាយនៅលើប្រព័ន្ធផ្សព្វផ្សាយក្នុងស្រុកនីហ្សេ ដែលត្រូវបានគេជឿថា ជាលិខិតបង្គាប់បញ្ជាទៅកាន់ក្រសួងការបរទេសនីហ្សេ ដោយរបបយោធាថា «នីហ្សេត្រូវលុបចោលប័ណ្ណសម្គាល់ការទូត និងទិដ្ឋាការរបស់មនុស្សពាក់ព័ន្ធ រួមទាំងសមាជិកគ្រួសាររបស់អ្នកការទូតទាំងអស់នោះផងដែរ ហើយក្រុមប៉ូលិសត្រូវទទួលបញ្ជា និងអនុវត្តន៍វិធានការបណ្ដេញចេញមួយនេះ»។
កាលពីសប្តាហ៍មុន ក្រសួងការបរទេសនីហ្សេ បានឱ្យដឹងថា របបយោធាបានប្រកាសប្រាប់បេសកជនបារាំង លោក ស៊ីលវ៉េន អ៊ីតេ (Sylvain Itte) ឱ្យចាកចេញពីប្រទេសនីហ្សេ ដោយសារតែលោកបានបដិសេធមិនចូលរួមក្នុងកិច្ចប្រជុំដែលបានគ្រោងទុកជាមួយរដ្ឋមន្ត្រីការបរទេសនីហ្សេ រួមទាំងសកម្មភាពផ្សេងៗទៀតរបស់រដ្ឋាភិបាលបារាំង ដែលនេះគឺជាការប្រឆាំងនឹងផលប្រយោជន៍របស់នីហ្សេ។
របបយោធាក៏បានព្រមានកាលពីថ្ងៃព្រហស្បតិ៍ផងដែរថា «ឯកអគ្គរដ្ឋទូតបារាំងលែងទទួលបានបុព្វសិទ្ធិ និងអភ័យឯកសិទ្ធិ ដែលភ្ជាប់ជាមួយឋានៈជាសមាជិកនៃបុគ្គលិកការទូតរបស់ស្ថានទូតបារាំងទៀតហើយ»។ ប៉ុន្តែ អ្នកនាំពាក្យរបស់ប្រធានាធិបតីបារាំងបានប្រាប់អ្នកកាសែតកាលពីថ្ងៃព្រហស្បតិ៍ថា ឯកអគ្គរដ្ឋទូតនៅតែស្ថិតក្នុងមុខតំណែងដដែល ដោយមិនគោរពតាមសំណើរបស់របបយោធានោះទេ។
ទន្ទឹមនឹងនេះផងដែរ ទូរទស្សន៍ CNN បានទាក់ទងទៅកាន់ក្រសួងការបរទេសបារាំង ដើម្បីសុំការអត្ថាធិប្បាយជុំវិញបញ្ហានេះ។
ក្រសួងការបរទេសបារាំងក៏បានរំឭកឡើងវិញនូវសេចក្តីថ្លែងការណ៍របស់ពួកគេកាលពីថ្ងៃទី២៥ ខែសីហា ដោយសង្កត់ធ្ងន់ថា «ក្រុមក្បត់ទាំងអស់នោះ មិនមានសិទ្ធិអំណាចក្នុងការទាមទារឱ្យយើងចេញពីប្រទេសនោះទេ»។ សេចក្តីថ្លែងការណ៍របស់ក្រសួងបានបន្ថែមថា «ឯកអគ្គរដ្ឋទូតទទួលបានការទទួលស្គាល់ពីសំណាក់អាជ្ញាធរជាប់ឆ្នោតស្របច្បាប់ក្នុងប្រទេសនីហ្សេ មិនមែនរបបយោធានោះទេ»។
គួរដឹងដែរថា រដ្ឋាភិបាលបារាំងមិនទទួលស្គាល់របបយោធារបស់នីហ្សេនោះទេ ហើយតែងតែបានទទូចថា លោកប្រធានាធិបតី ម៉ូហាំ បាហ្សោម (Mohamed Bazoum) ដែលត្រូវបានផ្តួលរំលំដោយរដ្ឋប្រហារកាលពីខែមុន នៅតែជាមេដឹកនាំស្របច្បាប់តែមួយគត់របស់ប្រទេសនេះ។
កាលពីថ្ងៃចន្ទ ប្រធានាធិបតីបារាំង លោក អេម៉ានូអែល ម៉ាក្រុន (Emmanuel Macron) បាននិយាយថា លោក អ៊ីតេ នឹងមិនចាកចេញពីប្រទេសនីហ្សេឡើយ បើទោះបីជាផុតថ្ងៃកំណត់របស់របបយោធាដែលបានកំណត់ថ្ងៃឱ្យលោកចាកចេញពីប្រទេសនីហ្សេក៏ដោយ។
គួរបញ្ជាក់ថា ទាហានបារាំងរហូតដល់ទៅ ១៥០០ នាក់ កំពុងឈរជើងនៅក្នុងប្រទេសនីហ្សេ ហើយប្រទេសនេះផងដែរគឺធ្លាប់ជាដៃគូដ៏សំខាន់របស់បារាំងនៅក្នុងតំបន់សាហែល (Sahel)៕
