នាវាឆ្មាំសមុទ្រចិនដែលរារាំងនាវាផ្គត់ផ្គង់យោធាហ្វីលីពីននៅក្នុងសមុទ្រចិនខាងត្បូងកាលពីដើមខែសីហា។ AFP
យោធាជើងទឹករបស់ទីក្រុងម៉ានីលបាននិយាយកាលពីថ្ងៃចន្ទថា នាវាកងទ័ពជើងទឹកមកពីប្រទេសហ្វីលីពីន និងសហរដ្ឋអាមេរិក បានធ្វើនាវាចរ រួមគ្នាឆ្លងកាត់ផ្នែកខ្លះនៃសមុទ្រចិនខាងត្បូង ដែលស្ថិតនៅក្នុងតំបន់សេដ្ឋកិច្ចផ្តាច់មុខរបស់ប្រទេសអាស៊ីអាគ្នេយ៍។ នេះបើយើងតាមរ៉យទ័រ។
កងកម្លាំងប្រដាប់អាវុធនៃទីបញ្ជាការខាងលិចរបស់ប្រទេសហ្វីលីពីនបាននិយាយនៅថ្ងៃចន្ទថា សកម្មភាពនេះគឺជាលើកទីមួយហើយដែលហ្វីលីពីន និងក្រុងវ៉ាស៊ីនតោនបានអនុវត្តនាវាចររួមគ្នានៅក្នុងដែនទឹកភាគខាងលិចនៃកោះ Palawan ។
ការបង្ហាញកិច្ចសហប្រតិបត្តិការរវាងអាមេរិក និងហ្វីលីពីន កើតឡើងចំពេលដែលភាពតានតឹងកាន់តែខ្លាំងឡើងរវាងទីក្រុងម៉ានីល និងទីក្រុងប៉េកាំង ដែលទាមទារភាគច្រើននៃសមុទ្រចិនខាងត្បូង តាមរយៈការបញ្ចេញផែនទីស្តង់ដាថ្មីមួយកាលពីថ្ងៃទី២៨ខែសីហា។
BRP Jose Rizal ដែលជាប្រភេទនាវាចម្បាំងមានបំពាក់ មីស៊ីល របស់កងទ័ពជើងទឹកហ្វីលីពីន និងនាវាចម្បាំង USS Ralph Johnson ដែលជានាវាពិឃាតរបស់កងទ័ពជើងទឹកអាមេរិកបានចូលរួមជាមួយគ្នា ក្នុងអំឡុងពេលដែលកប៉ាល់ធ្វើសមយុទ្ធនៅក្បែរនាវាផ្សេងទៀត។
បញ្ជាការខាងលិចបាននិយាយនៅក្នុងសេចក្តីថ្លែងការណ៍មួយថា «ព្រឹត្តិការណ៍នេះមានគោលបំណងផ្តល់ឱកាសមួយសម្រាប់កងទ័ពជើងទឹកហ្វីលីពីន និងកងទ័ពជើងទឹកឥណ្ឌូប៉ាស៊ីហ្វិកអាមេរិក ដើម្បីសាកល្បង និងកែលម្អគោលទ្រឹស្តី ដែនសមុទ្រដែលមានស្រាប់»។
ទីក្រុងម៉ានីលបានត្អូញត្អែរម្តងហើយម្តងទៀតប្រឆាំងនឹងអ្វីដែលខ្លួនបានពិពណ៌នាថាជាសកម្មភាព «ឈ្លានពាន» របស់ចិននៅក្នុងសមុទ្រចិនខាងត្បូង រួមទាំងការប្រើប្រាស់កាណុងបាញ់ទឹកដោយឆ្មាំឆ្នេរសមុទ្ររបស់ខ្លួនប្រឆាំងនឹងនាវាហ្វីលីពីនដែលចូលរួមក្នុងបេសកកម្មផ្គត់ផ្គង់ឡើងវិញកាលពីថ្ងៃទី៥ ខែសីហា។
ចិនបានសាងសង់កោះយោធា នៅសមុទ្រចិនខាងត្បូង ហើយការទាមទារអធិបតេយ្យភាពជាប្រវត្តិសាស្ត្រត្រួតលើតំបន់សេដ្ឋកិច្ចផ្តាច់មុខរបស់ហ្វីលីពីន វៀតណាម ម៉ាឡេស៊ី ប្រ៊ុយណេ និងឥណ្ឌូនេស៊ី។
ប្រទេសហ្វីលីពីនបានឈ្នះការសម្រេចពី មជ្ឈត្តករ អន្តរជាតិប្រឆាំងនឹងប្រទេសចិនក្នុងឆ្នាំ ២០១៦ បន្ទាប់ពីសាលាក្តីមួយបាននិយាយថាការទាមទារដ៏ទូលំទូលាយរបស់ទីក្រុងប៉េកាំងចំពោះអធិបតេយ្យភាពលើភាគច្រើននៃសមុទ្រចិនខាងត្បូងមិនមានមូលដ្ឋានច្បាប់នោះទេ៕
