ជនសង្ស័យជាបុរស និងស្ត្រី ២ នាក់ ដែលរងពីបទបំផ្លាញមហាកំផែងចិន។
ប៉ូលិសបានចាប់ខ្លួនមនុស្ស ២ នាក់ បន្ទាប់ពីពួកគេបានប្រើប្រាស់អេស្កាវ៉ាទ័រ ដើម្បីឈូសឆាយធ្វើប្រឡោះផ្លូវកាត់លើមហាកំផែងចិនក្នុងខេត្ត Shanxi នាភាគខាងជើងនៃប្រទេស។
ការិយាល័យវប្បធម៌នៃខេត្ត Shanxi បានបង្ហោះនៅលើបណ្ដាញសង្គមចិនកាលពីដើមសប្តាហ៍នេះថា ជនសង្ស័យជាបុរស និងស្ត្រី ២ នាក់ បានធ្វើឱ្យខូចរចនាសម្ព័ន្ធដ៏ល្បីល្បាញ ក្នុងកំណាត់នៅស្រុក Youyu នៃខេត្ត Shanxi ដែលមិនអាចជួសជុលបានឱ្យមានទ្រង់ទ្រាយដូចដើមវិញ។
បណ្តាញសារព័ត៌មានចិន China Daily ដែលចុះផ្សាយ កាលពីថ្ងៃចន្ទកន្លងទៅនេះ បានឱ្យដឹងថា ប៉ូលិសខេត្ត Shanxi ទទួលបានដំណឹងពីហេតុការណ៍នេះកាលពីថ្ងៃទី ២៤ខែសីហា ហើយបានដើរតាមគន្លងដានគ្រឿងចក្រ ដែលប្រើក្នុងការឈូសឆាយមហាកំផែងមួយកន្លែងនោះ ដើម្បីស្វែងរកជនសង្ស័យ។
កាសែតដដែលផ្សាយបន្តថា ជនសង្ស័យទាំង ២ ដែលបានចុះកិច្ចសន្យាធ្វើការលើគម្រោងសំណង់មួយនៅក្បែរនោះ បានសារភាពថាពួកគេបានប្រើប្រាស់គ្រឿងចក្រអេស្កាវ៉ាទ័រដើម្បីឈូសធ្វើផ្លូវកាត់នៅលើមហាកំផែង ដើម្បីកាត់បន្ថយពេលវេលាធ្វើដំណើរទៅកាន់កន្លែងធ្វើការរបស់ពួកគេ។ អ្នកទាំង ២ ត្រូវបានចោទប្រកាន់ពីបទបំផ្លាញសម្បត្តិវប្បធម៌។
យោងតាមការចេញផ្សាយនោះមហាកំផែងចិន ដែលចាប់ផ្ដើមសាងសង់ឡើងក្នុងសតវត្សរ៍ទី ៣ អធិរាជចិនផ្សេងៗគ្នាដើម្បីទប់ស្កាត់ការឈ្លានពានរបស់បរទេស គឺជាតំបន់បេតិកភណ្ឌពិភពលោករបស់អង្គការយូណេស្កូ។ កន្លែងដែលរងការឈូសឆាយ មានចម្ងាយធ្វើដំណើរប្រហែល ៦ ម៉ោងភាគខាងលិចនៃទីក្រុងប៉េកាំង និងត្រូវបានសាងសង់ក្នុងសន្ដតិវង្ស Ming ចន្លោះពីសតវត្សរ៍ទី ១៤-១៧៕
