ភ្លៀងធ្លាក់ខ្លាំងនៅហុងកុង បង្កឱ្យជន់លិចផ្លូវទីក្រុង និងស្ថានីយរថភ្លើង។ AFP
ភ្លៀងធ្លាក់យ៉ាងគំហុកបានជន់លិចទីក្រុងហុងកុងនាថ្ងៃសុក្រ ទី៨ ខែកញ្ញា និងបណ្តាលឱ្យមានទឹកជំនន់រាលដាលពាសពេញទីក្រុង ផ្លូវ ផ្សារទំនើប និងស្ថានីយរថភ្លើងធំ (MTR) ត្រូវជន់លិចទាំងអស់ ខណៈអាជ្ញាធរបានបញ្ជាឱ្យបិទសាលារៀន និងសុំឱ្យអ្នកធ្វើការស្នាក់នៅផ្ទះ។
តំបន់រដ្ឋបាលពិសេសរបស់ចិន បានប្រឈមនឹងភ្លៀងធ្លាក់ខ្លាំងបំផុតជាច្រើនម៉ោង ដែលនេះជាអ្វីដែលហួសពីកំណត់ត្រាចាស់ដែលបានកើតឡើងកាលពី ១៤០ ឆ្នាំមុន។ ទឹកបានហូរបុកមកទីក្រុងតាមតំបន់ភ្នំ ខណៈអាជ្ញាធរក្រុងហុងកុងក៏បានចេញការព្រមានអំពីហានិភ័យបាក់ដីផងដែរ។
ផ្លូវសម្រាប់រថយន្តបានប្រែក្លាយទៅជាផ្លូវទឹកហូរ ហើយវីដេអូដែលចែកចាយនៅលើបណ្តាញសង្គមបានបង្ហាញឱ្យឃើញថាគ្រប់ផ្លូវក្នុងទីក្រុង និងសូម្បីតែស្ថានីយរថភ្លើងក្រោមដីពោរពេញទៅដោយទឹក។
លើសពីនេះផ្លូវក្រោមដី Cross-Harbour Tunnel ដែលជាសរសៃឈាមដ៏សំខាន់សម្រាប់តភ្ជាប់ពីកោះហុងកុងទៅកាន់ទីក្រុង Kowloon ក៏ត្រូវបានជន់លិចដោយទឹក ខណៈរូបថតក៏បង្ហាញឱ្យឃើញថាមជ្ឈមណ្ឌលទំនិញនៅក្នុងស្រុក Chai Wan ត្រូវបានលិចទាំងស្រុង។
ក្រុមអ្នកជំនាញរបស់ហុងកុងបានឱ្យដឹងថា លក្ខខណ្ឌអាកាសធាតុដ៏ធ្ងន់ធ្ងរនេះត្រូវបានគេរំពឹងថានឹងបន្តដល់រសៀលថ្ងៃសុក្រ។ ជាមួយគ្នានេះ ផ្សារហ៊ុនទីក្រុងហុងកុងនឹងមិនបើកដំណើរការឡើយនៅព្រឹកថ្ងៃសុក្រ ហើយនឹងបន្តបិទ ប្រសិនបើព្យុះភ្លៀងខ្មៅងងឹតនៅតែមាន។
មេដឹកនាំទីក្រុងលោក John Lee បាននិយាយថា លោកមានការព្រួយបារម្ភយ៉ាងខ្លាំងអំពីទឹកជំនន់ដ៏ធ្ងន់ធ្ងរនៅក្នុងទីក្រុង និងបានណែនាំដល់នាយកដ្ឋានទាំងអស់ឱ្យឆ្លើយតបនឹងស្ថានភាពនេះជាមួយនឹងកិច្ចខិតខំប្រឹងប្រែងទាំងអស់៕
