ប្រធានាធិបតីប្រេស៊ីល ដែលទើបកាន់តួនាទីជាងកន្លះឆ្នាំ លោក Luiz Inacio Lula da Silva ពេលត្រួតពលក្នុងពិធីបុណ្យឯករាជ្យកាលពីថ្ងៃទី៧កញ្ញា២០២៣។ AFP
ប្រធានាធិបតីប្រេស៊ីល ដែលទើបកាន់តួនាទីជាងកន្លះឆ្នាំ លោក Luiz Inacio Lula da Silva បាននិយាយដោយមានការថ្លឹងថ្លែងដោយមានតុល្យភាពអំណាចជាថ្មី ថា ដីកាចាប់ខ្លួនលោក ពូទីន នឹងចេញដោយប្រព័ន្ធយុត្តិធម៌របស់ប្រទេសប្រេស៊ីល មិនមែនដោយរដ្ឋាភិបាលរបស់លោកនោះទេ។
ការអត្ថាធិប្បាយជាថ្មីរបស់លោក Lula da Silv កើតឡើងត្រឹមតែមួយថ្ងៃបន្ទាប់ពីលោកនិយាយប្រាប់អ្នកសារព័ត៌មាននៅក្នុងប្រទេសឥណ្ឌា ដោយមានការធានាអះអាងថា រដ្ឋាភិបាលរបស់នឹងមិនចាប់ខ្លួនប្រធានាធិបតីរុស្ស៊ី លោក វ៉្លាឌីមៀ ពូទីន ប្រសិនបើប្រធានាធិបតីប្រទេសមហាអំណាចដែលសង្ស័យប្រព្រឹត្តិឧក្រិដ្ឋកម្មសង្គ្រាមនៅអ៊ុយក្រែន នឹងត្រូវទៅចូលរួមប្រជុំដោយផ្ទាល់នៅប្រទេសប្រេស៊ីល ដែលនឹងធ្វើជាប្រធាននៃកិច្ចប្រជុំក្រុមប្រទេសអភិវឌ្ឍន៍សេដ្ឋកិច្ច (G-20) នៅឆ្នាំ ២០២៤។
យោងតាមការចេញផ្សាយរបស់ទីភ្នាក់ងារព័ត៌មានរុស្ស៊ី TASS បញ្ហានៃការចាប់ខ្លួនប្រធានា ធិបតីរុស្ស៊ីលោក វ្ល៉ាឌីមៀ ពូទីន ក្នុងអំឡុងពេលទស្សនកិច្ចរបស់លោកទៅកាន់កិច្ចប្រជុំកំពូល G20 នៅប្រទេសប្រេស៊ីល ក្នុងឆ្នាំ ២០២៤ នឹងត្រូវពិចារណាដោយតុលាការរបស់ប្រទេសនេះ។
ទីភ្នាក់ងារព័ត៌មានរ៉យទ័របានដកស្រង់សម្តីប្រធានាធិបតីប្រេស៊ីលថា៖ «ប្រសិនបើលោកពូទីនសម្រេចចិត្តចូលរួម [កិច្ចប្រជុំកំពូលនៅឆ្នាំក្រោយ] ការសម្រេចចិត្ត [លើការចាប់ខ្លួនដែលអាចកើតមាន] គឺស្ថិតនៅក្នុងអំណាចរបស់តុលាការ មិនមែនរដ្ឋាភិបាលរបស់ខ្ញុំទេ»។
កាលពីថ្ងៃទី ៩ ខែកញ្ញា នៅក្នុងបទសម្ភាសន៍ជាមួយទូរទស្សន៍ឥណ្ឌា Firstpost លោក Lula da Silva បាននិយាយថា ដរាបណាលោកនៅកាន់អំណាចជាប្រធានាធិបតីប្រេស៊ីល «គាត់[ពូទីន] នឹងមិនត្រូវបានគេចាប់ខ្លួនដោយគ្មានការអនុញ្ញាតពីអាជ្ញាធរនោះទេ»។
