សារព័ត៌មាន THE JAKARTA POST បានផ្សាយថា ប្រធានាធិបតីឥណ្ឌូនេស៊ី លោក ចូកូ វីដូដូ (Joko Widodo) ដែលគេនិយមហៅ ចូកូវី (Jokowi) បានចេញមុខបដិសេធការចោទប្រកាន់ដែលកំពុងល្បីក្នុងបណ្តាញសង្គមដែលថា រដ្ឋមន្ត្រីមួយរូបបានប្រើអំពើហិង្សាក្នុងអំឡុងពេលជម្លោះគោលនយោបាយនៅក្នុងកិច្ចប្រជុំគណៈរដ្ឋមន្ត្រី របស់លោក។
ការជជែកយ៉ាងទូលំទូលាយលើបណ្តាញសង្គម ក្នុងរយៈពេលប៉ុន្មានថ្ងៃថ្មីៗនេះដោយលើកឡើងថា រដ្ឋមន្ត្រីការពារជាតិ Prabowo Subianto ដែលជាបេក្ខភាពមួយរូបសម្រាប់ប្រជែងតំណែងប្រធានាធិបតីឥណ្ឌូនេស៊ីដែលនឹងត្រូវបោះឆ្នោតនៅដើមឆ្នាំ ២០២៤ បានប្រើអំពើហិង្សា ដោយការចាប់ច្របាច់ក និងទះកំផ្លៀងអនុរដ្ឋមន្ត្រីកសិកម្ម លោក Harvick Hasnul Qolbi មុនពេលកិច្ចប្រជុំគណៈរដ្ឋមន្ត្រី នៅវិមានប្រធានាធិបតីបានចាប់ផ្តើម។ នេះយោងតាមការផ្សាយដដែល។
អ្នកសារព័ត៌មានបានចោទសួរប្រធានាធិបតី ចូកូវី កាលពីថ្ងៃអង្គារ ក្នុងអំឡុងពេលធ្វើដំណើរទស្សនកិច្ចទៅកាន់ទីផ្សារប្រពៃណីមួយក្នុងទីក្រុង Jatinegara ភាគខាងកើតទីក្រុងហ្សាការតា ប្រធានាធិបតីជិតផុតអាណត្តិបាននិយាយដោយសើចចំអកថា «តាមដែលខ្ញុំដឹង មិនមានឧបទ្ទវហេតុបែបនេះទេ។ ម៉េចបាន [មាន] ច្របាច់ក?»
ប្រធានាធិបតីបានរំឭកថា សាធារណជនគួរតែផ្ទៀងផ្ទាត់ព័ត៌មានពីប្រព័ន្ធផ្សព្វផ្សាយសង្គមមុននឹងធ្វើការសន្និដ្ឋានដោយខ្លួនឯង ជាពិសេសនៅមុនការបោះឆ្នោតសកលឆ្នាំ ២០២៤។
លោកបានមានប្រសាសន៍ថា៖ «ក្នុងឆ្នាំនយោបាយ ពិតជាមានព័ត៌មាន [មិនពិត]ប្រភេទនេះច្រើនណាស់។ ដូច្នេះសូមពិនិត្យ [ព័ត៌មាន] ជាមុនសិន កុំឱ្យតម្លៃព័ត៌មានទាំងអស់ដែលគ្រាន់តែដឹង»។
THE JAKARTA POST បានលើកឡើងនូវការចែកចាយតៗគ្នាជាច្រើនលើបណ្តាញសង្គម បន្ទាប់ពីឃ្លីបវីដេអូមួយដែលត្រូវបានដាក់ចំណងជើងថា «តើបេក្ខជនប្រធានាធិបតីបានទះកំផ្លៀងអនុរដ្ឋមន្ត្រីក្នុងបន្ទប់ប្រជុំទេ? ហើយវីដេអូននោះត្រូវបានសាធារណៈជនចាប់អារម្មណ៍និងបញ្ចេញមតិយ៉ាងច្រើន៕