ជនជាតិអាហ្វហ្គានីស្ថានម្នាក់ឈរនៅខាងក្រៅស្ថានទូតនៃសាធារណរដ្ឋអ៊ីស្លាមអាហ្វហ្គានីស្ថានក្នុងទីក្រុងញូវដេលី ប្រទេសឥណ្ឌា កាលពីសប្ដាហ៍មុន។ រូបថត AFP
ស្ថានទូតអាហ្វហ្គានីស្ថានក្នុងប្រទេសឥណ្ឌារបស់រដ្ឋាភិបាលចាស់ ដែលគាំទ្រដោយបស្ចិមប្រទេសបានប្រកាសបិទស្ថានទូត ចាប់ពីថ្ងៃទី ១ ខែតុលា ឆ្នាំ ២០២៣ តទៅ ដោយលើកឡើងពីកង្វះជំនួយផ្នែកការទូត។ នេះបើតាមការចុះផ្សាយរបស់បណ្ដាញព័ត៌មាន Al Jazeera។
សេចក្តីថ្លែងការណ៍របស់ស្ថានទូតអាហ្វហ្គានីស្ថានកាលពីថ្ងៃសៅរ៍ បានឱ្យដឹងថា៖ «វាគួរឱ្យសោកសៅ សោកស្ដាយ និងខកចិត្តយ៉ាងខ្លាំង ដែលស្ថានទូតអាហ្វហ្គានីស្ថាននៅក្រុងញូវដែលី ប្រកាសពីការសម្រេចចិត្តបញ្ឈប់ប្រតិបត្តិការរបស់ខ្លួន»។
សេចក្តីថ្លែងការណ៍បន្តថា ការសម្រេចចិត្តនេះ ធ្វើឡើងដោយសារតែកង្វះការគាំទ្រដ៏សំខាន់ ពីប្រទេសឥណ្ឌា ដែលបានបង្អាក់លទ្ធភាពរបស់ស្ថានទូត ក្នុងការបំពេញភារកិច្ចរបស់ខ្លួន។
ប្រភពដដែលបន្តទៀតថា៖ «មានការថយចុះគួរឱ្យកត់សម្គាល់ទាំងបុគ្គលិក និងធនធានដែលមានសម្រាប់ពួកយើង ដែលធ្វើឱ្យវាកាន់តែមានការប្រឈមមុខកាន់តែខ្លាំងឡើងក្នុងការបន្តប្រតិបត្តិការ»។
ទោះយ៉ាងណា សេចក្តីថ្លែងការណ៍នោះ បញ្ជាក់ថា ស្ថានទូតចង់បានកិច្ចព្រមព្រៀងជាមួយរដ្ឋាភិបាលឥណ្ឌា ដើម្បីធានាថាផលប្រយោជន៍របស់ជនជាតិអាហ្វហ្គានីស្ថានដែលកំពុងរស់នៅ ធ្វើការ សិក្សា និងធ្វើអាជីវកម្មនៅឥណ្ឌា ទទួលបានការការពារ។
ការបិទនេះ កើតឡើងជាង ២ ឆ្នាំ បន្ទាប់ពីរដ្ឋាភិបាលតាលីបង់ បានត្រឡប់មកកាន់អំណាចលើ ប្រទេសវិញ ក្រោយការដួលរលំនៃរដ្ឋាភិបាលរបស់លោកប្រធានាធិបតី Ashraf Ghani បន្ទាប់ពីសហរដ្ឋអាមេរិកបានដកកងទ័ពរបស់ខ្លួនក្រោយពីធ្វើប្រតិបត្តិការក្នុងប្រទេសអស់រយៈពេល ២០ ឆ្នាំ។
ការបិទស្ថានទូតនេះ បន្ទាប់ពីមានសេចក្តីរាយការណ៍ថា ឯកអគ្គរដ្ឋទូត និងអ្នកការទូតជាន់ខ្ពស់ផ្សេងទៀត បានចាកចេញពីប្រទេសឥណ្ឌាក្នុងរយៈពេលប៉ុន្មានខែថ្មីៗនេះ ដោយមានការប៉ះទង្គិចគ្នាក្នុងចំណោមអ្នកដែលបន្តធ្វើការក្នុងទីក្រុងញូវដែលី ប៉ុន្តែស្ថានទូតបានច្រានចោលការអះអាងទាក់ទងនឹងការប៉ះទង្គិចផ្ទៃក្នុងក្នុងចំណោមបុគ្គលិករបស់ខ្លួន ដោយសង្កត់ធ្ងន់ថា ទាំងនេះជាពាក្យចចាមអារ៉ាមដែលគ្មានមូលដ្ឋាន។
ស្ថានទូតអាហ្វហ្គានីស្ថានថា ឥណ្ឌានឹងគ្រប់គ្រងមើលថែស្ថានទូតរបស់ខ្លួន ប៉ុន្តែក្រសួងការបរទេសឥណ្ឌាមិនទាន់បញ្ជាក់ពីជំហរនោះទេ។
គ្មានប្រទេសណាមួយ ឬឥណ្ឌា ទទួលស្គាល់រដ្ឋាភិបាលថ្មីរបស់តាលីបង់ជាផ្លូវការឡើយ៕
