រដ្ឋមន្ត្រីការបរទេសរុស្ស៊ី លោក សឺហ្គេយ ឡាវរ៉ូវ (Sergei Lavrov) បង្ហាញភាពស្និទ្ធស្នាលជាមួយសមភាគី លោកស្រី Choe Son Hui ក្នុងជំនួបនៅទីក្រុងព្យុងយ៉ាង។ KCNA/AFP
ក្រសួងការបរទេសរុស្ស៊ីបានឱ្យដឹងថា រដ្ឋមន្ត្រីការបរទេស លោក សឺហ្គេយ ឡាវរ៉ូវ (Sergei Lavrov) បានថ្លែងអំណរគុណដល់ប្រទេសកូរ៉េខាងជើង សម្រាប់ការគាំទ្រសង្គ្រាមនៅប្រទេសអ៊ុយក្រែន ហើយបានសន្យាថា រុស្ស៊ីនឹងគាំទ្រ និងសាមគ្គីយ៉ាងពេញទំហឹងចំពោះមេដឹកនាំកូរ៉េខាងជើងលោក គីម ជុងអ៊ុន។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។
លោកឡាវរ៉ូវ ថ្លែងយ៉ាងដូច្នេះ ក្រោយធ្វើដំណើរទៅដល់ទីក្រុងព្យុងយ៉ាងកាលពីថ្ងៃពុធ ដើម្បីចូលរួមកិច្ចប្រជុំផ្សេងៗ ដែលគេមើលឃើញថា ជាការរៀបចំផ្លូវសម្រាប់ដំណើរទស្សនកិច្ចរបស់ប្រធានាធិបតី លោក វ្ល៉ាឌីមៀ ពូទីន។
ថ្លែងក្នុងពិធីទទួលរបស់កូរ៉េខាងជើង កាលពីថ្ងៃពុធ លោក ឡាវរ៉ូវ បាននិយាយថា ទីក្រុងម៉ូស្គូឱ្យតម្លៃយ៉ាងជ្រាលជ្រៅចំពោះការគាំទ្រឥតងាករេ និងជាគោលការណ៍ចំពោះ «ប្រតិបត្តិការយោធាពិសេស» នៅអ៊ុយក្រែន របស់ក្រុងព្យុងយ៉ាង។ នេះបើតាមសំណេរសុន្ទរកថា ដែលមានផ្សាយលើគេហទំព័រក្រសួងការបរទេសរុស្ស៊ី។
លោកបន្តថា៖«ដូចគ្នានេះដែរ សហព័ន្ធរុស្ស៊ីផ្ដល់ការគាំទ្រ និងសាមគ្គីភាពយ៉ាងពេញទំហឹងរបស់ខ្លួនចំពោះសេចក្តីប្រាថ្នារបស់កូរ៉េខាងជើងលើផ្លូវនៃការអភិវឌ្ឍន៍របស់ខ្លួន។
គួរគូសបញ្ជាក់ថា ដំណើរទស្សនកិច្ចរយៈពេល២ថ្ងៃរបស់ លោកឡាវរ៉ូវ ធ្វើឡើង១ខែ បន្ទាប់ពីមេដឹកនាំកូរ៉េខាងជើងលោក គីម បានធ្វើដំណើរទស្សនកិច្ចដ៏កម្រមួយទៅកាន់ប្រទេសរុស្ស៊ីពោលគឺនៅពេលដែលលោកបានពិភាក្សាអំពីកិច្ចសហប្រតិបត្តិការយោធារុស្ស៊ី-កូរ៉េខាងជើង ហើយបានអញ្ជើញលោក ពូទីនឱ្យធ្វើទស្សនកិច្ចមកកាន់ទីក្រុងព្យុងយ៉ាង។
លោក ឡាវរ៉ូវ បាននិយាយថា ដំណើរទស្សនកិច្ចនៅសប្តាហ៍នេះនឹងផ្តល់«ឱកាសដ៏មានតម្លៃ» ដើម្បីពិនិត្យឡើងវិញ និងរៀបរាប់ពីជំហានជាក់ស្តែង សម្រាប់ការអនុវត្តកិច្ចព្រមព្រៀងដែលបានសម្រេចរវាងមេដឹកនាំនៃប្រទេសទាំង២។
គួរកត់សម្គាល់ថា ក្រៅជំហរគាំទ្រការទូតលើឆាកអន្តរជាតិ ប្រទេសកូរ៉េខាងជើងថ្មីៗនេះ បានរងការចោទប្រកាន់ពីសហរដ្ឋអាមេរិក ថាបានផ្គត់ផ្គង់អាវុធឱ្យរុស្ស៊ី ដើម្បីយកទៅប្រើប្រាស់ក្នុងសង្រ្គាមនៅអ៊ុយក្រែន។ រុស្ស៊ីច្រានចោលការចោទប្រកាន់នេះថា មិនយោងទៅតាមភស្តុតាងច្បាស់លាស់៕
