លោកស្រី Linda Thomas-Greenfield ឯកអគ្គរដ្ឋទូតអាមេរិកប្រចាំអង្គការសហប្រជាជាតិ។ AFP
ខណៈអ៊ីស្រាអែលបន្តការផ្លោងតាមផ្លូវអាកាសចូលតំបន់ហ្គាហ្សាឈានចូលសប្តាហ៍ទី៣ ដោយដាក់គោលដៅលើមូលដ្ឋានរបស់ក្រុមសកម្មប្រយុទ្ធហាម៉ាស់ប៉ាឡេស្ទីន សហរដ្ឋអាមេរិកដែលជាសម្ព័ន្ធមិត្តរបស់អ៊ីស្រាអែល បានជំរុញឱ្យក្រុមប្រឹក្សាសន្តិសុខអង្គការសហប្រជាជាតិគាំទ្រអ៊ីស្រាអែល ខណៈតំបន់មជ្ឈិមបូព៌ាកាន់តែក្តៅក្រហាយ។
សហរដ្ឋអាមេរិកកាលពីថ្ងៃទី ២១ ខែតុលា បានស្នើឡើងនូវសេចក្តីព្រាងសម្រេចរបស់ក្រុមប្រឹក្សាសន្តិសុខអង្គការសហប្រជាជាតិដែលមានខ្លឹមសារថា«អ៊ីស្រាអែលមានសិទ្ធិ» ក្នុងការការពារបូរណភាពទឹកដីរបស់ខ្លួន និងទាមទារឱ្យអ៊ីរ៉ង់បញ្ឈប់ការនាំចេញអាវុធទៅកាន់ក្រុមភេរវករដែលគំរាមកំហែងដល់សន្តិភាព និងសន្តិសុខនៅទូទាំងតំបន់។
បើតាមទីភ្នាក់ងារសារព័ត៌មានរ៉យទ័រឱ្យដឹងថា សេចក្ដីព្រាងសម្រេចនោះបានអំពាវនាវឱ្យមានការការពារជនស៊ីវិលរួមទាំងមនុស្សគ្រប់គ្នាដែលកំពុងស្វះស្វែងរកទីសុវត្ថិភាព និងបានកត់សម្គាល់ថា រដ្ឋត្រូវតែគោរពតាមច្បាប់អន្តរជាតិក្នុងការឆ្លើយតបទៅនឹងការវាយប្រហារលក្ខណៈភេរវកម្មនិងជាពិសេសបន្តសកម្មភាពនាំជំនួយមនុស្សធម៌ទៅកាន់តំបន់ហ្គាហ្សា។
ប៉ុន្តែយ៉ាងណារហូតមកដល់ពេលនេះគេនៅមិនទាន់ដឹងច្បាស់ទេថា ពេលណាសហរដ្ឋអាមេរិកនឹងដាក់សេចក្ដីព្រាងនេះទៅជាការបោះឆ្នោតសម្រេចឡើយ។
ក្នុងករណីនេះដើម្បីអនុម័តដំណោះស្រាយខាងលើ គេត្រូវការសំឡេងគាំទ្រយ៉ាងតិច ៩ ចេញពីសមាជិកអង្គការសហប្រជាជាតិដោយមិនរាប់បញ្ចូលសំឡេងរបស់រុស្ស៊ី ចិន សហរដ្ឋ អាមេរិក បារាំងឬអង់គ្លេសទេ។ ក្រុមប្រឹក្សាសន្តិសុខអង្គការសហប្រជាជាតិមាន ១៥ ប្រទេស ដោយ៥ជាក្រុមប្រឹក្សាសន្តិសុខអចិន្រៃ្តយ៍ រួមមាន សហរដ្ឋអាមេរិក អង់គ្លេស បារាំង ចិន និងរុស្ស៊ី។
ចំណាត់ការរបស់សហរដ្ឋអាមេរិកនាពេលនេះ កើតឡើង បន្ទាប់ពីខ្លួនបដិសេធមិនទទួលស្គាល់សេចក្ដីព្រាងសម្រេចមួយរបស់ប្រេស៊ីលដែលអំពាវនាវឱ្យមានការផ្អាកសកម្មភាពមនុស្សធម៌នៅក្នុងជម្លោះរវាងអ៊ីស្រាអែល និងក្រុមសកម្មប្រយុទ្ធហាម៉ាស់ប៉ាឡេស្ទីន។
ឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិ លោកស្រី Linda Thomas-Greenfield បាននិយាយថាដំណោះស្រាយដែលរៀបចំឡើងដោយអ្នកការទូតប្រេស៊ីល គឺមិនអាចទទួលយកបានទេព្រោះវាមិនបាននិយាយពីសិទ្ធិការពារខ្លួនរបស់អ៊ីស្រាអែលឡើយ។ ចក្រភពអង់គ្លេសក៏បានបដិសេធដោយនិយាយថា ដំណោះស្រាយនេះខ្វះការលើកឡើងពីវិធីដែលក្រុមហាម៉ាស់កំពុងប្រើប្រជាជនប៉ាឡេស្ទីនស្លូតត្រង់ជាខែលការពារពួកគេ។
ស្ថានភាពសង្គ្រាម គិតត្រឹមថ្ងៃទី ២២ ខែតុលា គឺឈានដល់ដំណាក់កាលដែលអ៊ីស្រាអែលប្រើប្រាស់ការវាយប្រហារតាមផ្លូវអាកាស ខណៈដែលការវាយប្រហារបែបនេះ គឺកម្រមានណាស់។
មិនត្រឹមតែប៉ុណ្ណោះ អ៊ីស្រាអែលនៅតែបន្តការទម្លាក់គ្រាប់បែករបស់ខ្លួនទៅលើតំបន់ហ្គាហ្សាពេញ ១ យប់ រួមទាំងការវាយប្រហារទៅលើមជ្ឈមណ្ឌលលក់ទំនិញ និងហាងកាហ្វេដ៏ពេញនិយមនៅតំបន់ហ្គាហ្សា។
បើតាមទីភ្នាក់ងារសារព័ត៌មាន Aljazeera បានឱ្យដឹងថា ជនជាតិប៉ាឡេស្ទីនយ៉ាងហោចណាស់ ៤ ៣៨៥ នាក់ត្រូវបានសម្លាប់នៅក្នុងការវាយប្រហាររបស់អ៊ីស្រាអែលលើតំបន់កាហ្សាចាប់តាំងពីថ្ងៃទី ៧ ខែតុលាមក។
ជនជាតិអ៊ីស្រាអែលជាង ១ ៤០០ នាក់ទៀតក៏ត្រូវបានសម្លាប់ដែលភាគច្រើនបំផុត គឺនៅក្នុងអំឡុងពេលការវាយប្រហាររបស់ក្រុមហាម៉ាស់នៅភាគខាងត្បូងអ៊ីស្រាអែលនៅថ្ងៃទី ៧ ខែតុលា៕
