អ្នកប្រយុទ្ធប្រឆាំងរដ្ឋប្រហារដើរជាមួយអាវុធនៅក្នុងទីប្រជុំជនមួយក្នុងតំបន់ Sagaing ភាគពាយ័ព្យនៃប្រទេសមីយ៉ាន់ម៉ា កាលពីខែសីហា ឆ្នាំមុន។ AFP
រដ្ឋាភិបាលស្រមោល និងប្រព័ន្ធផ្សព្វផ្សាយក្នុងស្រុករបស់ប្រទេសមីយ៉ាន់ម៉ាដែលកំពុងហែកហួរដោយសារសង្គ្រាមស៊ីវិល បាននិយាយកាលពីថ្ងៃអង្គារថា កងទ័ពប្រឆាំងរបបយោធាបានដណ្តើមកាន់កាប់តំបន់ប្រជុំជនមួយនៅកណ្តាលប្រទេសមីយ៉ាន់ម៉ា ដែលជាទីស្នាក់ការកណ្តាលរដ្ឋបាលស្រុក។ យោងសេចក្តីរាយការណ៍របស់ទីភ្នាក់ងារព័ត៌មានរ៉យទ័រ។
រដ្ឋាភិបាលរួបរួមជាតិស្រមោល (NUG) បានសាទរការដណ្តើមបាននោះថា ជាជ័យជម្នះដ៏សំខាន់ បើទោះបីជាអ្នកវិភាគបានព្រមានថា អ្នកប្រយុទ្ធអាចតស៊ូដើម្បីកាន់កាប់តំបន់ Kawlin ដែលមានប្រជាជនប្រហែល ២៥ ០០០នាក់។
យោធាមីយ៉ាន់ម៉ាកំពុងប្រយុទ្ធប្រឆាំងនឹងការកើនឡើងនៃអំពើហិង្សា ខណៈដែលកងកម្លាំងប្រឆាំងនឹងខ្លួន រួមទាំងកងទ័ពជនជាតិភាគតិច បានចាប់ផ្តើមការវាយប្រហារថ្មីក្នុងរយៈពេល ២ ឆ្នាំ បន្ទាប់ពីការធ្វើរដ្ឋប្រហារទម្លាក់រដ្ឋាភិបាលដែលកើតចេញពីការបោះឆ្នោតតាមបែបប្រជាធិបតេយ្យ កាលពីខែកុម្ភៈ ឆ្នាំ ២០២១។
NUG បាននិយាយថា កងទ័ពប្រឆាំងបានវាយប្រហារទាហានរបបយោធានៅតំបន់ Kawlin កាលពីសប្តាហ៍មុន មុនពេលមានអំណាចលើពួកគេកាលពីថ្ងៃចន្ទ និងដណ្តើមកាន់កាប់តំបន់ប្រជុំជននេះតែម្តង។
ក្រសួងការពារជាតិរបស់រដ្ឋាភិបាលស្រមោលបានបង្ហោះវីដេអូមួយនៅលើប្រព័ន្ធផ្សព្វផ្សាយសង្គមរបស់ទាហានដែលលើកទង់នៃក្រុមតស៊ូតម្រង់ជួរជាមួយរដ្ឋាភិបាលស្រមោល។
នាយករដ្ឋមន្ត្រី NUG លោក Mahn Winn Khaing Thann បាននិយាយនៅលើវេទិកាប្រព័ន្ធផ្សព្វផ្សាយសង្គម X ថា «ទីប្រជុំជនថ្នាក់ស្រុកមួយស្ថិតនៅក្រោមការគ្រប់គ្រងរបស់យើង»។
រ៉យទ័រក៏បានបញ្ជាក់ថា ខ្លួនបានទាក់ទងអ្នកនាំពាក្យរបបយោធា តែមិនបានឆ្លើយតបនឹងការហៅទូរស័ព្ទមុនពេលចេញផ្សាយព័ត៌មានទេ៕
