ប្រធានាធិបតីចិននិងអាមេរិកជួបគ្នានៅមុនកិច្ចប្រជុំកំពូល APEC នៅអាមេរិក។ AFP
ជាថ្មីម្តងទៀត ក្រោយជំនួបកំពូលទ្វេភាគី រវាងប្រទេសមហាអំណាចលេខ១ និងលេខ២ នៅទីក្រុងសាន់ហ្រ្វាន់ ស៊ីស្កូ ប្រធានាធិបតីសហរដ្ឋអាមេរិក លោក ចូ បៃដិន (Joe Biden) បានអះអាងនៅថ្ងៃពុធថា លោកមិនបានផ្លាស់ប្តូរទស្សនៈរបស់លោកដែលថា ប្រធានាធិបតីចិន ស៊ី ជីនភីង (Xi Jinping) ថា ជា«ជនផ្តាច់ការ»នោះទេ។
កាលពីប៉ុន្មានខែមុន ក្រោយរដ្ឋមន្ត្រីការបរទេសអាមេរិក អាន់តូនី ប្លីនកែន បានបំពេញទស្សនកិច្ចដំបូងនៅក្នុងប្រទេសចិនដែលត្រូវបានគេមើលឃើញថា ថ្នាក់ដឹកនាំប្រទេសមហាអំណាចទាំង២ ព្យាយាមបន្ធូរបន្ថយភាពតានតឹងក្នុងពិភពលោក លោក ចូ បៃដិន បានហៅមេដឹកនាំចិនថា ជាជនផ្តាច់ការ ដែលនាំឱ្យអ្នកនាំពាក្យរដ្ឋាភិបាលបរិហារការនិយាយរបស់លោកបៃដិន។
ដែលជាការអត្ថាធិប្បាយមួយទំនងជានឹងផ្ទុះឡើងនៅទីក្រុងប៉េកាំង បន្ទាប់ពីមេដឹកនាំទាំងពីរបានពិភាក្សាគ្នាក្នុងកិច្ចប្រជុំកំពូលដោយត្រង់ៗ បន្ទាប់ពីការរៀបចំជាច្រើនខែ។
នៅលើកនេះវិញ លោក បៃដិន នៅតែបន្តហៅ លោកស៊ី ជីនភីង ជាជនផ្តាច់ការដដែល។
យោងតាមរ៉យទ័រ នៅចុងបញ្ចប់នៃសន្និសីទសារព័ត៌មាន លោក ចូ បៃដិន ត្រូវបានគេសួរថាតើគាត់នៅតែប្រកាន់ទស្សនៈដែលថា លោក ស៊ី គឺជាជនផ្តាច់ការ ឬយ៉ាងណា ដែលគាត់បាននិយាយកាលពីខែមិថុនា។
តាមរ៉យទ័ររាយការណ៍ លោក បៃដិន បាននិយាយថា៖«មើលទៅគាត់គឺជាជនផ្តាច់ការក្នុងន័យថាគាត់ជាបុរសម្នាក់ដែលគ្រប់គ្រងប្រទេសដែលជាប្រទេសកុម្មុយនិស្តដែលផ្អែកលើទម្រង់រដ្ឋាភិបាលខុសពីប្រទេសរបស់យើងទាំងស្រុង»។
កាលពីខែមីនាឆ្នាំមុន ប្រធានាធិបតីចិន ស៊ី ជីនភីង បានជាប់ឆ្នោតជាប្រធានាធិបតីអាណត្តិទី៣ នៅពេលដែលសមាជិកជិត ៣០០០ នាក់ នៃសភាប្រជាជនជាតិបានបោះឆ្នោតជាឯកច្ឆ័ន្ទ ឱ្យគាត់នៅក្នុងការបោះឆ្នោតមួយដែលមិនមានបេក្ខជនផ្សេងទៀត។
ប្រធានាធិបតីចិន ស៊ី ជីនភីង ត្រូវបានគេចាត់ទុកថាជាមេដឹកនាំចិន ដ៏មានឥទ្ធិពលបំផុតចាប់តាំងពីលោកម៉ៅ សេទុង បន្ទាប់ពីការបង្រួបបង្រួមអំណាចក្នុងការបង្កើតគោលនយោបាយ និងយោធាអស់រយៈពេលមួយទសវត្សរ៍ និងការរារាំងសេរីភាពសារព័ត៌មាន៕
