លោក ដូណាល់ ត្រាំ ដែលកើនប្រជាប្រិយភាព ជាបេក្ខជនប្រធានាធិបតីនៃបក្សសាធារណរដ្ឋ។ AFP
លោក ដូណាល់ ត្រាំ អតីតប្រធានាធិបតីអាមេរិក និងជាបេក្ខភាពនាំមុខគេរបស់គណបក្សសាធារណរដ្ឋសម្រាប់ការបោះឆ្នោតអាណត្តិខាងមុខបាននិយាយកាលពីថ្ងៃទី ១៨ វិច្ឆិកាថា ប្រសិនបើលោកជាប់ឆ្នោតរូបលោកនឹងផ្ដាច់កិច្ចព្រមព្រៀងពាណិជ្ជកម្មប៉ាស៊ីហ្វិកដែលបច្ចុប្បន្នកំពុងដឹកនាំដោយលោកប្រធានាធិបតីចូ បៃដិន។
ថ្លែងទៅកាន់អ្នកគាំទ្រនៅរដ្ឋ Iowa លោកត្រាំបាននិយាយថាលោកប្រឆាំងនឹងកិច្ចព្រមព្រៀងពាណិជ្ជកម្មដែលកំពុងត្រូវបានចរចាដោយរដ្ឋបាលរបស់ប្រធានាធិបតី លោក ចូ បៃដិន ជាមួយប្រទេសចំនួន ១៤ ផ្សេងទៀតដោយលើកហេតុផលថាវានឹងរារាំងការផលិតរបស់សហរដ្ឋអាមេរិក និងបង្កឱ្យមានបញ្ហាបាត់បង់ការងារ។
ដោយឡែកកិច្ចពិភាក្សាលើផ្នែកពាណិជ្ជកម្មនៃក្របខ័ណ្ឌសេដ្ឋកិច្ចឥណ្ឌូប៉ាស៊ីហ្វិក (IPEF) មានបំណងធ្វើឱ្យតំបន់ប៉ាស៊ីហ្វិកមានលទ្ធភាពទប់ទល់នឹងឥទ្ធិពលពាណិជ្ជកម្មរបស់ប្រទេសចិន ប៉ុន្តែកិច្ចពិភាក្សាមិនទាន់ទទួលបានភាពជោគជ័យនៅឡើយបន្ទាប់ពីប្រទេសមួយចំនួនរួមទាំងវៀតណាមនិងឥណ្ឌូនេស៊ីបានបដិសេធមិនប្តេជ្ញាចំពោះការទាមទារដែលមានចែងនៅក្នុង IPEF។
ក្នុងពេលកាន់តំណែងជាប្រធានាធិបតីកាលពីឆ្នាំ ២០១៧ លោក ដូណាល់ ត្រាំ ធ្លាប់បានដកកិច្ចព្រមព្រៀងពាណិជ្ជកម្មនេះម្ដងរួចទៅហើយ។ ក្នុងនោះការបោះឆ្នោតឆ្នាំ ២០២៤ ខាងមុខប្រសិនបើលោកជាប់ឆ្នោតលោកនឹងសំដៅដកកិច្ចព្រមព្រៀងនេះមុនគេ។
ថ្លែងក្នុងយុទ្ធនាការឃោសនាបោះឆ្នោតនៅរដ្ឋ Iowa ដដែលលោកត្រាំបានសង្កត់ធ្ងន់ថា៖ «កិច្ចព្រមព្រៀងពាណិជ្ជកម្មឥណ្ឌូប៉ាស៊ីហ្វិកនេះនឹងស្លាប់នៅថ្ងៃណាមួយក្រោមការដឹកនាំរបស់លោក ចូ បៃដិន»។
លោកបន្តថា៖ «វានឹងកាន់តែអាក្រក់ទៅទៀតដោយកិច្ចព្រមព្រៀងនេះនឹងគំរាមកំហែងធ្វើឱ្យកសិករនិងក្រុមហ៊ុនបង្កើតផលិតផលនានាប្រឈមនឹង ភាពច្របូកច្របល់»។
យ៉ាងណាមិញ រដ្ឋបាលលោកបៃដិនសង្ឃឹមថានឹងបញ្ចប់រឿងសំខាន់ៗនៅក្នុងកិច្ចពិភាក្សាពាណិជ្ជកម្ម របស់ខ្លួនបានទាន់ពេលវេលាសម្រាប់កិច្ចប្រជុំកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) នៅសប្តាហ៍នេះ។
រដ្ឋបាលលោក បៃដិន ក៏បានប្តេជ្ញាបន្តការចរចាកិច្ចព្រមព្រៀងដ៏ធំមួយនេះ ប៉ុន្តែការខិតចូលមកនៃការបោះឆ្នោតហាក់បានក្លាយជាសម្ពាធបន្ថែមហើយ ម្យ៉ាងទៀតអាមេរិកក៏កំពុងតែដោះស្រាយជាមួយបណ្ដាប្រទេសដែលមិនទាន់ចូលរួមជាមួយក្របខ័ណ្ឌនៃកិច្ចព្រមព្រៀងផង។
សហរដ្ឋអាមេរិកបានចាប់ផ្តើមក្របខ័ណ្ឌសេដ្ឋកិច្ចឥណ្ឌូប៉ាស៊ីហ្វិកសម្រាប់វិបុលភាព (IPEF) នៅខែឧសភាឆ្នាំ ២០២២ ជាមួយអូស្ត្រាលីប្រ៊ុយណេដារូសាឡឹម ហ្វីជី ឥណ្ឌា ឥណ្ឌូនេស៊ី ជប៉ុនសាធារណរដ្ឋកូរ៉េ ម៉ាឡេស៊ី នូវែលសេឡង់ហ្វីលីពីន សិង្ហបុរី ថៃ និងវៀតណាម។
ក្របខ័ណ្ឌនេះមានសសរស្តម្ភសំខាន់គឺ ការកសាងវិស័យពាណិជ្ជកម្មដោយផ្តោតលើខ្សែច្រវាក់ផ្គត់ផ្គង់ថាមពលស្អាត ការបំបែកកាបូន ហេដ្ឋារចនាសម្ព័ន្ធពន្ធនិងការប្រឆាំងអំពើពុករលួយ៕
