តំបន់សមរភូមិនៅភាគខាងកើតគ្របដណ្តប់ដោយការធ្លាក់ព្រិល ហើយរុស្ស៊ី បន្ថយសកម្មភាពវាយប្រហារ។ AFP
មន្ត្រីអ៊ុយក្រែន បាននិយាយកាលពីថ្ងៃអង្គារថា យោធារបស់រុស្ស៊ី ហាក់បន្ថយការវាយប្រហារ និងបញ្ជូនសម្ភារតិចជាងមុនទៅកាន់សមរភូមិតំបន់ប្រជុំជន អាឌីវកា (Avdiivka) ភាគខាងកើតដែលត្រូវបានគេមើលឃើញថាជាច្រកចូលទៅកាន់រដ្ឋធានីនៃតំបន់ Donetsk។
ទីភ្នាក់ងារព័ត៌មានរ៉យទ័រ បានរាយការណ៍ថា អ្នកនាំពាក្យយោធាអ៊ុយក្រែន លោក Oleksandr Shtupun បាននិយាយថា មានការវាយប្រហារតាមផ្លូវគោកមានចំនួនតិចដងជាងមុន និងការវាយប្រហារតាមអាកាសតិចជាងមុនផងដែរលើតំបន់អាឌីវកា ដែលជាទីក្រុងដែលមានប្រជាជនមុនសង្គ្រាមប្រហែល ៣២០០០ នាក់ ប៉ុន្តែចំនួនប្រជាជនបានថយចុះមកនៅប្រហែល ១៥០០នាក់ ក្រោមការវាយប្រហាររបស់រុស្ស៊ី អស់រយៈពេលជាងមួយខែចុងក្រោយនេះ។
លោក Shtupun បានប្រាប់ទូរទស្សន៍ជាតិថា៖«កងកម្លាំងកាន់កាប់របស់រុស្ស៊ី បានកាត់បន្ថយចំនួននៃការវាយប្រហារតាមផ្លូវគោក និងផ្លូវអាកាស ទោះបីជាពួកគេនៅតែបំពានច្បាប់នៃសង្គ្រាមដោយការបាញ់ប្រហារទៅលើក្រុមគ្រូពេទ្យ និងរថយន្តជម្លៀសក៏ដោយ»។
ទោះជាបែបណា រុស្ស៊ី តែងបដិសេធការចោទប្រកាន់បែបនេះ។
អ្នកនាំពាក្យរូបនេះ បានប្រាប់សារព័ត៌មានថា៖«អ្នកឈ្លានពានមិនបោះបង់ចោលផែនការរបស់ពួកគេដើម្បីឡោមព័ទ្ធតំបន់ប្រជុំជនអាឌីវកាឡើយ។ ការវាយប្រហារចំនួនប្រាំបីត្រូវបានវាយលុកនៅថ្ងៃនេះ»។
ប្រធានរដ្ឋបាលយោធារបស់អាឌីវកា លោក Vitaliy Barabash បាននិយាយថា ការប្រយុទ្ធគ្នាកំពុងដណ្តើមកាន់កាប់សង្កាត់ឧស្សាហកម្មមួយ ហើយកងកម្លាំងអ៊ុយក្រែនកំពុងកាន់កាប់ទីតាំងរបស់ពួកគេ។ បន្ទាយសំខាន់ៗត្រូវបានសាងសង់ឡើង បន្ទាប់ពីក្រុមផ្តាច់ខ្លួនដែលផ្តល់មូលនិធិដោយរុស្ស៊ី បានរឹបអូសយកអាឌីវកាក្នុងរយៈពេលខ្លីក្នុងឆ្នាំ ២០១៤៕
