ប្រជាជនចិន ធ្វើដំណើរតាមផ្លូវសាធារណៈក្នុងពេលកន្លងមក។ AFP
ក្រោយមានសេចក្តីរាយការណ៍ករណីជំងឺផ្លូវដង្ហើម (respiratory illnesses) ភាគច្រើនកើតលើកុមារជាក្រុមៗនៅភាគខាងជើងប្រទេសចិន អង្គការសុខភាពពិភពលោក ឬ WHO កាលពីថ្ងៃទី២២ ខែវិច្ឆិកា បានស្នើជាផ្លូវការឱ្យប្រទេសចិនផ្តល់ព័ត៌មានលម្អិត។
អង្គការសុខភាពពិភពលោក និងសាធារណរដ្ឋប្រជាមានិតចិនធ្លាប់ប៉ះទង្គិចគ្នាយ៉ាងខ្លាំងក្នុងអំឡុងពេលលេចចេញជំងឺកូវីដ១៩កាលពីចុងឆ្នាំ២០១៩ និងដើមឆ្នាំ២០២០ ដោយសារការទាមទាររបស់អង្គការសុខភាពពិភពលោកសម្រាប់ការសិក្សាស្រាវជ្រាវរកឫសគល់នៃជំងឺ។
យោងតាមសេចក្តីរាយការណ៍របស់ទីភ្នាក់ងារព័ត៌មានរ៉យទ័រ អង្គការ WHO បាននិយាយនៅក្នុងសេចក្តីថ្លែងការណ៍មួយថា អាជ្ញាធរចិនមកពីគណៈកម្មការសុខភាពជាតិបានធ្វើសន្និសីទសារព័ត៌មានមួយកាលពីថ្ងៃទី១៣ខែវិច្ឆិកា ដើម្បីរាយការណ៍ពីការកើនឡើងនៃជំងឺផ្លូវដង្ហើមនៅក្នុងប្រទេស។
ទីភ្នាក់ងារសុខភាពពិភពលោកបាននិយាយថា អាជ្ញាធរចិនបានសន្មតថាការកើនឡើងជំងឺផ្លូវដង្ហើមទាំងនោះ ដោយសារតែការដកការរឹតបន្តឹងវិធានការកូវីដ១៩ និងការចរាចរនៃមេរោគដែលគេស្គាល់ដូចជា គ្រុនផ្តាសាយ ជំងឺរលាកសួត mycoplasma (ការឆ្លងមេរោគបាក់តេរីទូទៅជាធម្មតាប៉ះពាល់ដល់កុមារតូច) វីរុស syncytial ផ្លូវដង្ហើម និងវីរុសដែលបណ្តាលឱ្យកើតកូវីដ១៩។
អាជ្ញាធរចិនបានសង្កត់ធ្ងន់លើតម្រូវការសម្រាប់ការបង្កើនការតាមដានឃ្លាំមើលជំងឺនៅក្នុងកន្លែងថែទាំសុខភាព និងការកំណត់សហគមន៍ ក៏ដូចជាការពង្រឹងសមត្ថភាពនៃប្រព័ន្ធសុខាភិបាលក្នុងការគ្រប់គ្រងអ្នកជំងឺ។
សេចក្តីរាយការណ៍កន្លងមក បានបង្ហាញថា ទាំងប្រទេសចិន និងអង្គការសុខភាពពិភពលោក បានប្រឈមមុខនឹងសំណួរអំពីតម្លាភាពនៃការរាយការណ៍អំពីករណីជំងឺកូវីដ១៩ដំបូងបំផុតដែលបានលេចឡើងនៅក្នុងទីក្រុងវូហាន (Wuhan) នៅចុងឆ្នាំ ២០១៩ និងដើមឆ្នាំ២០២០។
កាលពីថ្ងៃទី២២ ខែវិច្ឆិកា អង្គការសុខភាពពិភពលោកបាននិយាយថា ក្រុមតាមដានរួមទាំងកម្មវិធីសម្រាប់តាមដានជំងឺដែលកំពុងកើតមានបានរាយការណ៍ពីចង្កោមនៃជំងឺរលាកសួតដែលមិនបានធ្វើរោគវិនិច្ឆ័យចំពោះកុមារនៅភាគខាងជើងប្រទេសចិន។
អង្គការសុខភាពពិភពលោកបាននិយាយថា វាមិនច្បាស់ទេថាតើទាំងនេះត្រូវបានផ្សារភ្ជាប់ជាមួយនឹងការកើនឡើងជាទូទៅនៃការឆ្លងមេរោគផ្លូវដង្ហើមដែលត្រូវបានរាយការណ៍ពីមុនដោយអាជ្ញាធរចិន ឬព្រឹត្តិការណ៍ដាច់ដោយឡែក។
ទីភ្នាក់ងារសុខភាពបាននិយាយថា ខ្លួនបានស្នើសុំព័ត៌មានបន្ថែមអំពីរោគរាតត្បាត និងគ្លីនិក ក៏ដូចជាលទ្ធផលមន្ទីរពិសោធន៍ពីការផ្ទុះឡើងដែលបានរាយការណ៍ទាំងនេះក្នុងចំណោមកុមារ តាមរយៈយន្តការបទប្បញ្ញត្តិសុខភាពអន្តរជាតិ។
អង្គការសុខភាពពិភពលោក ក៏បានស្នើទៅប្រទេសចិនសម្រាប់ព័ត៌មានបន្ថែមអំពីនិន្នាការចរាចរណ៍នៃមេរោគដែលគេស្គាល់ និងបន្ទុកបច្ចុប្បន្នលើប្រព័ន្ធថែទាំសុខភាព។ WHO បាននិយាយថា ខ្លួនកំពុងទាក់ទងជាមួយគ្រូពេទ្យ និងអ្នកវិទ្យាសាស្ត្រ តាមរយៈភាពជាដៃគូបច្ចេកទេស និងបណ្តាញដែលមានស្រាប់នៅក្នុងប្រទេសចិន។
ចាប់តាំងពីពាក់កណ្តាលខែតុលា មក អង្គការសុខភាពពិភពលោកបាននិយាយថាភាគខាងជើងប្រទេសចិនបានរាយការណ៍ពីការកើនឡើងនៃជំងឺផ្តាសាយធៀបនឹងរយៈពេលដូចគ្នាកាលពី ៣ ឆ្នាំមុន៕
