លោក Petteri Orpo នាយករដ្ឋមន្ត្រីហ្វាំងឡង់។ AFP
ហ្វាំងឡង់ ដែលបោះបង់ជំហរអព្យាក្រឹត្យមិនចូលបក្សសម្ព័ន្ធជាច្រើនទសវត្សរ៍ទៅចុះចូលជាមួយអង្គការប្រដាប់អាវុធណាតូ ដោយសារតែខ្លាចរុស្ស៊ីឈ្លានពាន ដូចករណីអ៊ុយក្រែន ប្រកាសបិទព្រំដែនដែលនៅសេសសល់ចុងក្រោយជាមួយរុស្ស៊ី ដើម្បីទប់ស្កាត់ចំណាកស្រុករុស្ស៊ី ហូរចូលប្រទេសរបស់ខ្លួន។
លោក Petteri Orpo នាយករដ្ឋមន្ត្រីហ្វាំងឡង់ បាននិយាយកាលពីថ្ងៃទី២៨ ខែវិច្ឆិកាថា ប្រទេសនេះនឹងបិទច្រកព្រំដែនចុងក្រោយរបស់ខ្លួនទៅកាន់ប្រទេសរុស្ស៊ី បន្ទាប់ពីលំហូរជនចំណាកស្រុកដែលទីក្រុង ហែលស៊ីនគីអះអាងថាជាការវាយប្រហារកូនកាត់(Hybrid)រៀបចំដោយទីក្រុងម៉ូស្គូ។ យោងការផ្សាយរបស់ទីភ្នាក់ងារព័ត៌មានបារាំង AFP។
លោកស្រី ម៉ារី រ៉ានតានេន (Mari Rantanen)រដ្ឋមន្ត្រីក្រសួងមហាផ្ទៃ ហ្វាំងឡង់ បាននិយាយថា ការបិទច្រកព្រំដែននេះនឹងចូលជាធរមានពេញ ១យប់រវាងថ្ងៃទី២៩ និង៣០ ខែវិច្ឆិកា និងមានរយៈពេលរហូតដល់ថ្ងៃទី១៣ខែធ្នូ។
ប្រទេស ហ្វាំងឡង់ ដែលស្ថិតនៅអឺរ៉ុបខាងជើង (Nordic)ដែលមានព្រំដែន ១៣៤០ គីឡូម៉ែត្រជាមួយប្រទេសរុស្ស៊ីបានឃើញការកើនឡើងនៃជនចំណាកស្រុកដែលគ្មានឯកសារដែលស្វែងរកសិទ្ធិជ្រកកោននៅតាមព្រំដែនរបស់ខ្លួនជាមួយប្រទេសរុស្ស៊ីក្នុងខែវិច្ឆិកា។
ចាប់តាំងពីដើមខែសីហាមក ជនចំណាកស្រុកជិត ១០០០នាក់បានចូលប្រទេសហ្វាំងឡង់ដោយគ្មានទិដ្ឋាការតាមរយៈចំណុចឆ្លងកាត់ព្រំដែនភាគខាងកើត។
«ហ្វាំងឡង់ គឺជាគោលដៅនៃប្រតិបត្តិការកូនកាត់រុស្ស៊ី។ នេះជាបញ្ហាសន្តិសុខជាតិ»។
កាលពីសប្តាហ៍មុន ច្រកឆ្លងព្រំដែន« Raja-Jooseppi »ស្ថិតនៅតំបន់ចុងបូព៌ា របស់ហ្វាំងឡង់ បានក្លាយជាច្រកចូលតែ ១គត់ទៅកាន់ប្រទេសរុស្ស៊ី បន្ទាប់ពីការបិទច្រកឆ្លងកាត់ចំនួន ៧ ផ្សេងទៀតដោយប្រទេសហ្វាំងឡង់ចាប់តាំងពីរុស្ស៊ីបង្កើតសង្គ្រាមឈ្លានពានអ៊ុយក្រែន។
អ្នកស្វែងរកសិទ្ធិជ្រកកោននឹងត្រូវបានកំណត់ចំពោះការដាក់ពាក្យសុំការការពារនៅ «ចំណុចឆ្លងកាត់ព្រំដែនបើកចំហសម្រាប់ចរាចរណ៍ផ្លូវអាកាស និងសមុទ្រ ដែលសំដៅដល់«កំពង់ផែ និងព្រលានយន្តហោះ » ។ នេះបើយោងតាមសេចក្តីថ្លែងការណ៍របស់រដ្ឋាភិបាល។
លោកនាយករដ្ឋមន្ត្រី Orpo បាននិយាយអំពីការកើនឡើងនេះថា «នេះគឺជាសកម្មភាពរៀបចំ មិនមែនជាការសង្គ្រោះបន្ទាន់ពិតប្រាកដទេ»។
លោកបានបន្ថែមថា «ភាពងាយស្រួលដែលជនចំណាកស្រុកបានរកឃើញផ្លូវរបស់ពួកគេទៅកាន់ចំណុចឆ្លងកាត់ព្រំដែនដាច់ស្រយាលនៅ Raja-Jooseppi ក៏ជាភ័ស្តុតាងនៃរឿងនេះដែរ» ។
លោកបានបន្តថា៖ «វាមិនមែនគ្រាន់តែជាចំនួននៃការមកដល់ដែលជាបញ្ហានោះទេ ប៉ុន្តែវាជាបាតុភូតផ្ទាល់របស់វា»។
ទំនាក់ទំនងរបស់ហ្វាំងឡង់ ជាមួយប្រទេសជិតខាងភាគខាងកើត មានភាពជូរចត់បន្ទាប់ពីការលុកលុយរបស់អ៊ុយក្រែន។
បន្ទាប់ពីហ្វាំងឡង់បានចូលជាសម្ព័ន្ធមិត្តយោធាដែលដឹកនាំដោយសហរដ្ឋអាមេរិកណាតូក្នុងខែមេសា ដោយបានផ្លាស់ប្តូរគោលនយោបាយមិនចូលបក្សសម្ព័ន្ធរយៈពេលជាច្រើនទសវត្សរ៍របស់ខ្លួន រុស្ស៊ីបានព្រមានអំពី «វិធានការតបត»៕
