ប្រធានាធិបតី វ្ល៉ាឌីមៀ ពូទីន បានជួបពិភាក្សារយៈពេលប្រាំម៉ោងនៅក្នុងវិមានក្រឹមឡាំង ជាមួយប្រធានាធិបតីអ៊ីរ៉ង់ Ebrahim Raisi កាលថ្ងៃទី៧ខែធ្នូ។
រុស្ស៊ី ដែលជាគូប្រជែងរបស់បស្ចឹមលោក និងព្យាយាមរក្សាឥទ្ធិពលរបស់ខ្លួន ក្នុងតំបន់មជ្ឈិមបូព៌ា បានចាប់ដៃជាមួយអ៊ីរ៉ង់ដែលមានអរិភាពស្រាប់ជាមួយសហរដ្ឋអាមេរិកនិងប្រទេសអ្នកមាននៅតំបន់អឺរ៉ុប។
ក្រសួងការបរទេសរុស្ស៊ី បាននិយាយកាលពីថ្ងៃអង្គារថា ខ្លួន និងអ៊ីរ៉ង់ នឹងបង្កើនល្បឿនការងារលើ «កិច្ចព្រមព្រៀងអន្តររដ្ឋថ្មីដ៏សំខាន់មួយ» ប៉ុន្តែ ភាគីរុស្ស៊ី បានបញ្ជាក់លម្អិតជុំវិញវិសាលភាពនៃកិច្ចព្រមព្រៀង ដែលកើតឡើងចំពេលមានការកើនឡើងនូវទំនាក់ទំនងនយោបាយ ពាណិជ្ជកម្ម និងយោធារវាងទីក្រុងម៉ូស្គូ និងទីក្រុងតេអេរ៉ង់ ដែលសហរដ្ឋអាមេរិកចាត់ទុកដោយក្តីបារម្ភ។
នៅក្នុងសេចក្តីថ្លែងការណ៍មួយ ដែលចុះផ្សាយដោយទីភ្នាក់ងារព័ត៌មានរ៉យទ័រ រុស្ស៊ី បាននិយាយថា រដ្ឋមន្ត្រីការបរទេសនៃប្រទេសទាំងពីរបានព្រមព្រៀងគ្នានៅក្នុងការហៅទូរស័ព្ទកាលពីថ្ងៃចន្ទ ដើម្បីពន្លឿនការងារលើកិច្ចព្រមព្រៀងនេះ ដែលស្ថិតក្នុង «ដំណាក់កាលនៃការត្រៀមខ្លួនសម្រាប់កម្រិតខ្ពស់»។
កាលពីសប្តាហ៍មុន ប្រធានាធិបតី វ្ល៉ាឌីមៀ ពូទីន បានជួបពិភាក្សារយៈពេលប្រាំម៉ោងនៅក្នុងវិមានក្រឹមឡាំងជាមួយប្រធានាធិបតីអ៊ីរ៉ង់ Ebrahim Raisi ។
ដូចទៅនឹងមេដឹកនាំប្រទេសកូរ៉េខាងជើង គីម ជុងអ៊ុន ដែលបានជួបជាមួយលោក ពូទីន នៅភាគខាងកើតឆ្ងាយរបស់រុស្ស៊ីក្នុងខែកញ្ញា អ៊ីរ៉ង់ ដែលជាសត្រូវរបស់សហរដ្ឋអាមេរិកស្រាប់ទៅហើយនោះ អាចផ្តល់ឱ្យក្រុងម៉ូស្គូនូវឧបករណ៍យោធាសម្រាប់សង្គ្រាមរបស់ខ្លួននៅអ៊ុយក្រែន ហើយឧបករណ៍សំខាន់គឺយន្តហោះគ្មានមនុស្សបើកដែលរុស្ស៊ីបានប្រើប្រាស់យន្តហោះគ្មានមនុស្សបើករបស់អ៊ីរ៉ង់យ៉ាងទូលំទូលាយ។
វិមានក្រឹមឡាំងកាលពីខែមុនបាននិយាយថា រុស្ស៊ី និងអ៊ីរ៉ង់ កំពុងអភិវឌ្ឍទំនាក់ទំនងរបស់ពួកគេ «រួមទាំងក្នុងវិស័យកិច្ចសហប្រតិបត្តិការបច្ចេកទេសយោធា» ប៉ុន្តែបានបដិសេធមិនធ្វើអត្ថាធិប្បាយលើការផ្តល់យោបល់របស់សេតវិមានដែលថាអ៊ីរ៉ង់អាចកំពុងពិចារណាផ្តល់ឱ្យរុស្ស៊ីនូវមីស៊ីលផ្លោង។
អ៊ីរ៉ង់គឺជាអ្នកគាំទ្រដ៏សំខាន់របស់ក្រុមហាម៉ាស់ ដែលជាសត្រូវរបស់អ៊ីស្រាអែល។ នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយតាមទូរស័ព្ទជាមួយលោក ពូទីន កាលពីថ្ងៃអាទិត្យ ហើយបានសម្តែងការមិនពេញចិត្តយ៉ាងខ្លាំងចំពោះកិច្ចសហប្រតិបត្តិការ «ដ៏គ្រោះថ្នាក់»របស់រុស្ស៊ីជាមួយអ៊ីរ៉ង់។
អាជ្ញាធរអ៊ីរ៉ង់បាននិយាយថា កិច្ចសហប្រតិបត្តិការយោធាជាមួយរុស្ស៊ី កំពុងពង្រីកពីមួយថ្ងៃទៅមួយថ្ងៃ។ អ៊ីរ៉ង់បាននិយាយកាលពីខែមុនថា ខ្លួនបានបញ្ចប់ការរៀបចំ សម្រាប់ប្រទេសរុស្ស៊ី ក្នុងការផ្តល់ឱ្យវានូវយន្តហោះចម្បាំង Su-35 ឧទ្ធម្ភាគចក្រវាយប្រហារ Mi-28 និងយន្តហោះហ្វឹកហាត់ពីឡុត Yak-130៕
