កាលពីថ្ងៃទី១៤ ខែធ្នូ ឆ្នាំ២០២៣ ក្រុមអាជ្ញាធរហុងកុង បានប្រកាសថា នឹងផ្តល់ប្រាក់រង្វាន់ដល់បុគ្គលណា ដែលអាចផ្ដល់ព័ត៌មាន ឈានទៅដល់ការចាប់ខ្លួនសកម្មជនចំនួន ៥នាក់។ រូបថត Hong Kong Police Force
នាថ្ងៃទី១៤ ខែធ្នូ ឆ្នាំ២០២៣ ក្រុមអាជ្ញាធរហុងកុង បានប្រកាសថា នឹងផ្តល់ប្រាក់រង្វាន់ដល់បុគ្គលណា ដែលអាចផ្ដល់ព័ត៌មាន ឈានទៅដល់ការចាប់ខ្លួនសកម្មជនចំនួន ៥ នាក់ ដែលត្រូវបានចោទប្រកាន់ពីបទឧក្រិដ្ឋកម្មសន្តិសុខជាតិ។ បច្ចុប្បន្ន សកម្មជនទាំង ៥ នាក់នេះកំពុងរស់នៅបរទេស ហើយអាជ្ញាធរហុងកុងបានប្រកាសថានឹងផ្តល់ប្រាក់រង្វាន់ចំនួន ១២៨.០០០ ដុល្លារអាមេរិក សម្រាប់អ្នកដែលបានជួយផ្ដល់ព័ត៌មាន។
គួររំឭកថា សំឡេងសកម្មជនគាំទ្រលទ្ធិប្រជាធិបតេយ្យជាច្រើននៅក្នុងទីក្រុងហុងកុង ត្រូវបានគាបសង្កត់ខ្លាំង បន្ទាប់ពីច្បាប់ស្ដីពីសន្តិសុខត្រូវបានដាក់ចេញក្នុងឆ្នាំ២០២០។ ការណ៍នេះបានធ្វើឱ្យសិទ្ធិសេរីភាពបានធ្លាក់ចុះ បើទោះបីជាចិនធ្លាប់បានសន្យាជាមួយអង់គ្លេសដែលធ្លាប់ដាក់អាណានិគម ថានឹងគោរពសិទ្ធិសេរីភាពប្រជាជនហុងកុងក៏ដោយ។ ចិនតែងតែអះអាងថា ច្បាប់នេះគឺត្រូវបានដាក់ចេញដើម្បីស្ដារស្ថិរភាពនៅហុងកុងឡើងវិញ។
តុលាការហុងកុងបានចេញដីកាចាប់ខ្លួនសកម្មជនមួយចំនួន រួមមាន លោក ចននី ហ្វក (Johnny Fok) លោក តូនី ឆយ (Tony Choi) លោក ស៊ីម៉ុន ឆឹង (Simon Cheng) កញ្ញា ហួយ វិងធិង (Hui Wing-ting) និង កញ្ញា ចូយ សៀវ (Joey Siu)។ ក្រុមប៉ូលិសមិនបានបញ្ជាក់ថាតើពួកគេនៅទីណានោះទេ ប៉ុន្តែប្រព័ន្ធផ្សព្វផ្សាយសង្គមមួយចំនួនបានបង្ហាញថា ពួកគេប្រហែលជាកំពុងរស់នៅសហរដ្ឋអាមេរិក និងចក្រភពអង់គ្លេស។
គួររំឭកថា កាលពីខែកក្កដា ទីក្រុងហុងកុងបានព្រមានដល់សកម្មជនចំនួន ៨ នាក់ដែលរស់នៅបរទេសថា ពួកគេនឹងត្រូវបានគេតាមចាប់ខ្លួន អស់មួយជីវិត ដោយអះអាងថា នឹងមានការផ្តល់ប្រាក់រង្វាន់ ដល់អ្នកជួយផ្ដល់ព័ត៌មាន ពីពួកគេផងដែរ។ នេះជាលើកទីមួយហើយដែលច្បាប់សន្តិសុខត្រូវបានគេប្រើប្រាស់ក្នុងវិធីនេះ ដែលធ្វើឱ្យរដ្ឋាភិបាលលោកខាងលិចបានរិះគន់យ៉ាងខ្លាំង។ ជាក់ស្ដែង សហរដ្ឋអាមេរិកបានថ្កោលទោសយ៉ាងខ្លាំងចំពោះការអនុវត្តច្បាប់នេះ ហើយចក្រភពអង់គ្លេសបានហៅសកម្មភាពនេះថាជាការគំរាមកំហែងដល់លទ្ធិប្រជាធិបតេយ្យ និងសិទ្ធិមនុស្សជាមូលដ្ឋាន។
លោក ដេវីដ ខាមឺរូន (David Cameron) រដ្ឋមន្ត្រីការបរទេសអង់គ្លេស បានសម្តែងការព្រួយបារម្ភចំពោះប្រទេសចិនដែលអនុវត្តច្បាប់សន្តិសុខជាតិរបស់ខ្លួនចំពោះប្រជាជនហុងកុងនៅសហរដ្ឋអាមេរិក។ បន្ថែមលើនេះ សហរដ្ឋអាមេរិកក៏បានបដិសេធរាល់ការប៉ុនប៉ងរបស់ចិនក្នុងការពង្រីកដែនវិសាលភាពអនុវត្តច្បាប់របស់ខ្លួន និងបានធានាដល់សិទ្ធិពលរដ្ឋហុងកុងដែលកំពុងរស់នៅអាមេរិក។
លោក ដេវីដ ខាមឺរូន (David Cameron) រដ្ឋមន្ត្រីការបរទេសអង់គ្លេស។AFP
លោក ស្ទីវ លី (Steve Li) អគ្គនាយកនៃនាយកដ្ឋានសន្តិសុខជាតិហុងកុង បានឱ្យដឹងថា ប៉ូលិសហុងកុងបានទទួលបញ្ជីឈ្មោះសកម្មជនចំនួន ៥០០ នាក់រួមទាំងសកម្មជន ៨ នាក់ ដែលប៉ូលិសធ្លាប់បានតាមចាប់ខ្លួន ប៉ុន្តែអាជ្ញាធរនៅមិនទាន់ចាប់ខ្លួននៅឡើយទេ។ សកម្មជនថ្មីចំនួន ៥ នាក់ត្រូវបានដាក់បញ្ចូលបន្ថែមទៅក្នុងបញ្ជី ដោយចោទប្រកាន់ពីបទឃុបឃិតជាមួយបរទេស និងការញុះញង់ឱ្យធ្វើអបគមន៍។
លោក លី បានលើកឡើងបន្ថែមដោយចោទប្រកាន់សកម្មជន ៨ នាក់ដែលបានភៀសខ្លួនទៅបរទេសថា បានធ្វើសកម្មភាពប៉ះពាល់ដល់សន្តិសុខជាតិ។ លោកបន្តថា សព្វថ្ងៃនេះ ក្រុមប៉ូលិសចង់ធ្វើយ៉ាងណាកាត់ផ្ដាច់មូលនិធិដែលពួកគេបានជួយមកសកម្មជនក្នុងប្រទេស និងបានចាប់ខ្លួនមនុស្ស ៤ នាក់ដែលសង្ស័យថាបានផ្តល់មូលនិធិដល់អតីតសមាជិកសភាដែលគាំទ្រលទ្ធិប្រជាធិបតេយ្យ។
អ្នកទាំង ៤ នាក់នោះត្រូវបានចោទប្រកាន់ថាបានផ្តល់មូលនិធិដល់សកម្មភាពគាំទ្រឯករាជ្យចំនួនចាប់ពី ១២៨០ ដុល្លារ ដល់ ១៥៤០០ ដុល្លារសហរដ្ឋអាមេរិក។ រីឯលោក ឆឹង ដែលកំពុងរស់នៅបរទេសបានលើកឡើងនៅលើបណ្ដាញសង្គម X របស់លោកថា គាត់មានមោទនភាពដែលត្រូវបានប៉ូលីសចិនតាមប្រមាញ់ដោយសារតែជំនឿរបស់គាត់។ ដោយឡែក កញ្ញា សៀវ វិញបានប្តេជ្ញាបន្តសកម្មភាពរបស់នាង បើទោះបីជាមានការចោទប្រកាន់ក៏ដោយ។
លោកស្រី សារ៉ា ប៊្រូកស៍ (Sarah Brooks) នាយករងប្រចាំតំបន់របស់អង្គការលើកលែងទោសអន្តរជាតិ សម្រាប់ប្រទេសចិនទាំងមូល បានមានប្រសាសន៍ថា ការប្រើប្រាស់ប្រាក់រង្វាន់ដើម្បីទទួលបានព័ត៌មានតាមចាប់សកម្មជន ហាក់ដូចជាវិធីសាស្ត្រដែលកំពុងពេញនិយមក្នុងការបំបិទសំឡេងប្រឆាំង។ លោកស្រីបានជំរុញឱ្យអាជ្ញាធរលុបចោលប្រាក់រង្វាន់ទាំងនេះចេញ ដោយបញ្ជាក់ថា ការផ្តល់ប្រាក់រង្វាន់គឺជាយុទ្ធសាស្ត្រគំរាមកំហែងដែលហួសព្រំដែន៕
