សិស្សវិទ្យាល័យក្នុងប្រទេសអេស្ប៉ាញកំពុងចូលកម្មវិធីហាត់សម។ AFP
សាលាអន្តរជាតិជាច្រើនក្នុងប្រទេសអេស្ប៉ាញត្រូវបានត្រួតពិនិត្យយ៉ាងហ្មត់ចត់ដោយប៉ូលិសជាមួយនឹងសត្វឆ្កែហិតក្លិនស្របពេលដែលសាលាជាច្រើនផ្សេងទៀតបានបិទទ្វារកាលពីថ្ងៃចន្ទបន្ទាប់ពីពួកគេបានទទួលការគំរាមកំហែងបំផ្ទុះគ្រាប់បែកតាមអ៊ីមែលអនាមិកដែលក្រសួងមហាផ្ទៃអេស្ប៉ាញបកស្រាយថាជាការបោកបញ្ឆោត។
ប្រភពពីប៉ូលិសនៅក្នុងទីក្រុង Zaragoza បានបញ្ជាក់ថាសាលាអន្តរជាតិចំនួន ៤ នៅក្នុងទីក្រុងនេះទទួលបានសារគំរាមកំហែងបែបនេះចំណែកសាលាបារាំង Lycee Molier ក៏មិនបើកដូចគ្នាកាលថ្ងៃចន្ទ។
ក្រៅពីទីក្រុងខាងលើនេះនៅទីក្រុងម្រ៉ាឌីដក៏មានសាលារៀនបីផ្សេងទៀតដែលមានគណៈគ្រប់គ្រង ជាជនជាតិអង់គ្លេសបានប្រាប់សារព័ត៌មានរ៉យទ័រថាពួកគេបានទទួលការគំរាមកំហែងស្រដៀងគ្នានេះកាលពីសប្តាហ៍មុនឬនៅថ្ងៃចន្ទ។
ចំណែកឯនៅលើកោះ Tenerife សាលារៀនឈ្មោះ French Lycee និងសាលាអន្តរជាតិអាល្លឺម៉ង់ក៏បានទទួលការគំរាមកំហែងតាមសារដូចគ្នាហើយមិនបានបើកសាលារៀនទេកាលពីថ្ងៃចន្ទ។
នៅក្នុងសេចក្តីថ្លែងការណ៍មួយកាលពីថ្ងៃចន្ទដដែលនេះក្រសួងមហាផ្ទៃអេស្ប៉ាញបាននិយាយថា៖«ទាក់ទងនឹងរលកនៃការគំរាមកំហែងតាមអ៊ីមែលនេះពាក្យបណ្តឹងកំពុងត្រូវបានត្រួតពិនិត្យហើយការស៊ើបអង្កេតកំពុងត្រូវបានប្រមូលផ្តុំខណៈសារគំរាមកំហែងនោះទំនងជាការបោកបញ្ឆោត»។
ស្ថានទូតបារាំងប្រចាំនៅទីក្រុងម្រ៉ាឌីដក៏បានបញ្ជាក់ថាមានការគំរាមកំហែងតាមរយៈសារអេឡិចត្រូនិក (E-mail) ទៅសាលាបារាំងជាច្រើននិងសាលាអន្តរជាតិផ្សេងទៀតក្នុងប្រទេសអេស្ប៉ាញហើយទោះបីជាប៉ូលិសបានរកឃើញវត្ថុសង្ស័យក៏ដោយក៏នៅតែស្នើឱ្យសាលារៀនរក្សាការប្រុងប្រយ័ត្ន។
បើតាមកាសែត El Mundo បានឱ្យដឹងថាគិតមកទល់ពេលនេះសាលារៀនសរុបចំនួន ១៨ នៅតាមទីក្រុងដូចជា៖ទីក្រុង Pontevedra ទីក្រុង Tenerife ទីក្រុង Zaragoza ទីក្រុង Reus ទីក្រុង Tarragona ទីក្រុង Villarreal និង Castellon សុទ្ធតែបានទទួលការគំរាមកំហែងតាមរយៈសារអេឡិចត្រូនិក។
ប្រភពពីសាលាមួយបានប្រាប់សារព័ត៌មានរ៉យទ័រថា សារគំរាមកំហែងទាំងនោះមិនបានបញ្ជាក់ពីហេតុផលណាមួយជុំវិញការចេញសារគំរាមកំហែងដែលនាំទៅដល់ការបិទសាលារៀនអន្តរជាតិក្នុងទីក្រុងនានានោះទេ។
ខណៈប្រភពសាលាមួយផ្សេងទៀតបាននិយាយថាសារអ៊ីមែលនោះខ្លីបំផុត។ វាសំដៅលើតែគ្រឿងផ្ទុះដែលដាក់នៅតាមសាលារៀនដោយមិនបង្ហាញថាជាសកម្មភាពរបស់ក្រុមណាមួយឬហេតុផលអ្វីនោះទេ។
អឺរ៉ុបធ្លាប់ប្រកាសពីការគំរាមកំហែងដោយអំពើភេរវកម្មកើនឡើងក្នុងតំបន់បន្ទាប់ពីសង្គ្រាមអ៊ីស្រាអែល-ហាម៉ាស់ផ្ទុះ៕
