ក្រុមឧទ្ទាម Houthis គឺជាសម្ព័ន្ធមិត្តដ៏ស្វិតស្វាញហាម៉ាស់។ Reuters
ក្រុមឧទ្ទាម Houthis ក្រុម Hezbollah និងហាម៉ាស់គឺជាសម្ព័ន្ធមិត្តដ៏ស្វិតស្វាញ ដែលប្រទេសអ៊ីរ៉ង់ ហៅថាជាក្រុមតស៊ូប្រឆាំងនឹងអ៊ីស្រាអែល។ ថ្មីៗនេះ ក្រុម Houthis បានបើកការវាយឆ្មក់ទៅលើនាវាដឹកទំនិញដែលឆ្លងកាត់ទន្លេក្រហម (Red Sea) ដែលអាចជាមូលហេតុរុញឱ្យទំនិញឡើងថ្លៃទូទាំងពិភពលោក។
សកម្មភាពវាយឆ្មក់នេះ ត្រូវបានក្រុមឧទ្ទាម Houthis ហៅថាជាការសងសឹកតបតនឹងសហរដ្ឋអាមេរិក ដែលកំពុងតែដាក់យុទ្ធនាការបញ្ចូនជំនួយយោធាទៅកាន់តំបន់ហ្គាហ្សា។ ប៉ុន្តែយ៉ាងណា ការវាយប្រហារជាបន្តបន្ទាប់នេះ បានបង្កការរំខានយ៉ាងខ្លាំងដល់ការធ្វើពាណិជ្ជកម្មពិភពលោក។
ការវាយប្រហារចុងក្រោយបំផុត បានរារាំងការដឹកជញ្ជូនទំនិញនៅច្រកព្រែកជីកស៊ុយអេ ជាច្រកភ្ជាប់ដ៏សំខាន់មួយពីអាស៊ី ទៅកាន់អឺរ៉ុប។ ព្រែកជីកស៊ុយអេនេះ តំណាងឱ្យទំនិញប្រមាណជា ១២% នៃទំនិញទូទាំងពិភពលោក។
តាមរយៈការវាយប្រហារនេះ កាលពីថ្ងៃទី ២១ ធ្នូកន្លងទៅ បណ្ដាប្រទេសនាំចេញទំនិញធំៗដូចជា អាល្លឺម៉ង់ ក្រិក ទីក្រុងឡុងដ៍ និងសហរដ្ឋអាមេរិក បានប្ដេជ្ញាផ្លាស់ប្ដូរការដឹកជញ្ជូនទំនិញ ដោយបញ្ចៀសនូវផ្លូវទឹក ជាពិសេសគឺទន្លេក្រហម និងព្រែកជីកស៊ុយអេ។
ក្រុមហ៊ុនដឹកជញ្ជូនដ៏ធំមួយគឺ Hapag-Lloyd បានឱ្យដឹងថា ខ្លួននឹងផ្លាស់ប្ដូរផ្លូវដឹកជញ្ជូនសម្រាប់ កប៉ាល់ចំនួន ២៥ គ្រឿងនៅត្រឹមចុងឆ្នាំនេះ ដោយហេតុថាស្តុកទំនិញបានកើនឡើងកាន់តែច្រើន ហើយនឹងបន្តជាប់គាំង បើមិនមានចំណាត់ការទេ។
បើមិនប្រើច្រកសមុទ្រក្រហម និងច្រកព្រែកជីកស៊ុយអេទេ ក៏មានន័យថាកប៉ាល់ដឹកទំនិញធំៗរបស់ពិភពលោក នឹងត្រូវធ្វើដំណើរវាងទ្វីបអាហ្រ្វិកទាំងមូលតែម្ដង។ ក្នុងន័យនេះ បើទោះជាទំនិញត្រូវបានដឹកចេញតាមផ្លូវថ្មី ដោយមិនមានការរំខានក្ដី ក៏វាទាមទារពេលវេលាយូរជាងមុន ដែលអាចជាមូលហេតុ ធ្វើឱ្យទំនិញត្រូវឡើងថ្លៃផងដែរ។
Freightos (CRGO.O) ដែលជាក្រុមហ៊ុនដំណើរការកក់ និងទូទាត់លើទំនិញអន្តរជាតិបាននិយាយនៅដើមសប្តាហ៍នេះថា ការចំណាយលើការដឹកជញ្ជូនតាមកុងតឺន័រពីប្រទេសចិនទៅកាន់សមុទ្រមេឌីទែរ៉ាណេបានហក់ឡើងដល់ ៤៤% ហើយនៅក្នុងខែធ្នូនេះ ដោយសារតែការរំខាននៅសមុទ្រក្រហម។
ក្រុមហ៊ុននេះ បានឱ្យដឹងទៀតថា ប្រសិនបើជម្លោះនេះនៅតែបន្តអូសបន្លាយ ប្រភេទទំនិញដែលមិនស្ថិតក្រោមកុងត្រា នឹងអាចកើនឡើងទ្វេដង ឬបីដងពីលើតម្លៃបច្ចុប្បន្ន។
ជាមួយគ្នានេះដែរ ក្រុមហ៊ុនគ្រឿងសង្ហារិមលំដាប់ពិភពលោក IKEA ក៏ជាក្រុមហ៊ុនមួយ ក្នុងចំណោមក្រុមហ៊ុនជាច្រើនទៀត ដែលមានទំនិញជាប់គាំង ដោយសារការពន្យារពេលដឹកជញ្ជូនផងដែរ។ បើតាមក្រុមហ៊ុននេះ ទំនិញរបស់ខ្លួនរួមជាមួយនឹងទំនិញផ្សេងទៀត អាចនឹងត្រូវពន្យារពេលពី ២ ទៅ ៣ សប្ដាហ៍។
គួរបញ្ជាក់ថា ក្រុម Houthis ដែលជាសម្ព័ន្ធមិត្តនឹងអ៊ីរ៉ង់ បានចាប់ផ្ដើមបើកការវាយប្រហារលើនាវាដែលឆ្លងកាត់ច្រកសមុទ្រ Bab al-Mandab នៅចុងភាគខាងត្បូងនៃសមុទ្រក្រហមអស់រយៈពេលជាច្រើនសប្តាហ៍មកហើយ៕
