បេសកជនរបស់ប្រទេសអ៊ីរ៉ង់ប្រចាំអង្គការសហប្រជាជាតិ លោក Amir Saeid Iravani AFP
មួយថ្ងៃបន្ទាប់ពីការចោទប្រកាន់របស់សហរដ្ឋអាមេរិកថា អ៊ីរ៉ង់នៅពីក្រោយការវាយប្រហារដោយក្រុមប្រដាប់អាវុធ Houthi លើកងទ័ពសហរដ្ឋអាមេរិកនៅតំបន់សមុទ្រក្រហម មន្ត្រីជាន់ខ្ពស់អ៊ីរ៉ង់បានចេញមុខបដិសេធថា ខ្លួនមិនជាប់ពាក់ព័ន្ធនោះទេ។
ទីភ្នាក់ងារសារព័ត៌មានអ៊ីរ៉ង់ Tasnim បានរាយការណ៍កាលពីថ្ងៃអង្គារថា បេសកជនរបស់ប្រទេសអ៊ីរ៉ង់ប្រចាំអង្គការសហប្រជាជាតិ លោក Amir Saeid Iravani បាននិយាយថា ប្រទេសរបស់លោកមិនជាប់ពាក់ព័ន្ធសកម្មភាពណាមួយក្នុងសកម្មភាពឬក៏វាយប្រហារប្រឆាំងកងទ័ពសហរដ្ឋអាមេរិកនៅតំបន់មជ្ឈិមបូព៌ានោះទេ។
ទីភ្នាក់ងារព័ត៌មានរ៉យទ័រ បានរាយការណ៍ថា សហរដ្ឋអាមេរិកបានស្តីបន្ទោសក្រុម Houthi ដែលជាសម្ព័ន្ធមិត្តរបស់អ៊ីរ៉ង់មានមូលដ្ឋាននៅប្រទេសយេម៉ែនចំពោះការវាយប្រហារជាបន្តបន្ទាប់នៅក្នុងដែនទឹកមជ្ឈិមបូព៌ា ចាប់តាំងពីសង្គ្រាមផ្ទុះឡើងរវាងអ៊ីស្រាអែល និងក្រុមសកម្មប្រយុទ្ធហាម៉ាស់ប៉ាឡេស្ទីន កាលពីថ្ងៃទី៧ ខែតុលា។
នៅក្នុងការសង្ខេបព័ត៌មានជាមួយអ្នកយកព័ត៌មានកាលពីថ្ងៃចន្ទ ទីប្រឹក្សាសន្តិសុខជាតិរបស់សហរដ្ឋអាមេរិក លោក Jake Sullivan បាននិយាយថា ទីក្រុងវ៉ាស៊ីនតោនមាន «ហេតុផលគ្រប់ទាំងអស់ដើម្បីជឿថា ការវាយប្រហារទាំងនេះ ខណៈពេលដែលការវាយប្រហារត្រូវបានធ្វើឡើងដោយក្រុម Houthis ក្នុងប្រទេសយេម៉ែន ត្រូវបានភ្ជាប់យ៉ាងពេញលេញដោយអ៊ីរ៉ង់» ។
នៅក្នុងឧប្បត្តិហេតុចុងក្រោយនេះ កប៉ាល់ពាណិជ្ជកម្មចំនួនបីបានស្ថិតនៅក្រោមការវាយប្រហារនៅក្នុងដែនទឹកអន្តរជាតិនៅសមុទ្រក្រហមភាគខាងត្បូងកាលពីថ្ងៃអាទិត្យ។ ក្រុម Houthis បានទទួលស្គាល់ការបាញ់ដ្រូន និងការវាយប្រហារដោយមីស៊ីល ប្រឆាំងនឹងអ្វីដែលពួកគេបាននិយាយថា ជានាវាអ៊ីស្រាអែលពីរគ្រឿងនៅក្នុងតំបន់នោះ។
នាវា Carney ដែលជានាវាពិឃាតរបស់កងទ័ពជើងទឹកសហរដ្ឋអាមេរិក បានបាញ់ទម្លាក់យន្តហោះគ្មានមនុស្សបើកចំនួន៣គ្រឿងកាលពីថ្ងៃអាទិត្យ ខណៈដែលវាឆ្លើយតបនឹងការអំពាវនាវពីនាវាពាណិជ្ជកម្ម។ យោធាអាមេរិកនិយាយថា នាវាទាំងបីនោះបានភ្ជាប់ជាមួយប្រទេសចំនួន ១៤ ផ្សេងពីគ្នា។
