ក្រុមហ៊ុនអ៊ុយក្រែន ២០០ ដែលផលិតដ្រូនលើសពីសមត្ថភាពរដ្ឋអាចទិញ។ AFP
ក្រុមហ៊ុនរបស់ប្រទេសអ៊ុយក្រែនប្រមាណ ២០០ បានចូលរួមបង្កើនការផលិតយន្តហោះគ្មានមនុស្សបើកសម្រាប់ប្រើប្រាស់ក្នុងសង្គ្រាមជាមួយរុស្ស៊ីដែលបច្ចុប្បន្ននេះមានចំនួនច្រើនដែលថវិការបស់រដ្ឋមិនអាចបញ្ជាទិញអស់ឡើយ។
រដ្ឋមន្ត្រីក្រសួងបច្ចេកវិទ្យារបស់ប្រទេសអ៊ុយក្រែនបាននិយាយកាលពីថ្ងៃទី ៩ ខែមករាថា ក្រុមហ៊ុនផលិតរបស់អ៊ុយក្រែនបានបង្កើនទិន្នផលនៃយានអវកាសគ្មានមនុស្សបើក (UAVs) ដល់កម្រិតមួយដែលថវិកាទិញយន្តហោះគ្មានមនុស្សបើកនាពេលបច្ចុប្បន្នរបស់អ៊ុយក្រែនមិនគ្រប់គ្រាន់ដើម្បីទិញឱ្យអស់ចំនួនដែលក្រុមហ៊ុនផលិតបានឡើយ។
ទីភ្នាក់ងារព័ត៌មានរ៉យទ័រ បានផ្សាយថា លោក Mykhailo Fedorov ឧបនាយករដ្ឋមន្ដ្រីទទួលបន្ទុកកិច្ចការឌីជីថល បានប្រាប់ទូរទស្សន៍ជាតិអ៊ុយក្រែនថា៖«គិតត្រឹមថ្ងៃនេះ ទីផ្សារបានបង្កើនល្បឿនលឿនជាងចំនួនលុយដើម្បីទិញ UAVs ទាំងអស់»។
លោកបានបន្តថា៖«ដូច្នេះយើងត្រូវបង្កើនការផ្តល់ហិរញ្ញប្បទាន និងបើកទីផ្សារបន្ថែមទៀត ដូច្នេះតម្លៃធ្លាក់ចុះដោយសារតែការប្រកួតប្រជែង និងធ្វើឱ្យមានការផលិតក្នុងស្រុកច្រើន»។
UAVs ត្រូវបានប្រើប្រាស់យ៉ាងទូលំទូលាយដោយអ៊ុយក្រែន និងរុស្ស៊ីក្នុងសង្គ្រាមរយៈពេលជាង ២២ ខែកន្លងមកនេះ ដោយផ្តល់ឱ្យកងទ័ពនូវការឃ្លាំមើលពីលើអាកាស និងអនុញ្ញាតឱ្យពួកគេបំផ្លាញគោលដៅដែលមានតម្លៃរាប់រយដងនៃតម្លៃរបស់ UAVs ដូចជាប្រព័ន្ធការពារដែនអាកាស និងរ៉ាដាទំនើប។
យោងតាមលោករដ្ឋមន្ត្រីអ៊ុយក្រែន ឥឡូវនេះមានក្រុមហ៊ុនប្រហែល ២០០ នៅក្នុងប្រទេសអ៊ុយក្រែនដែលផលិតយន្តហោះគ្មានមនុស្សបើក ហើយឥឡូវនេះក្រុមហ៊ុនក្នុងស្រុកប្រមាណ ៧០ បានចុះកិច្ចសន្យាផ្គត់ផ្គង់យន្តហោះគ្មានមនុស្សបើកដល់រដ្ឋាភិបាលអ៊ុយក្រែន៕
