ក្រុមសកម្មប្រយុទ្ធហ៊ូធីដែលគាំទ្រដោយអ៊ីរ៉ង់។
ក្រុមសកម្មប្រយុទ្ធហ៊ូធី បានគំរាមកំហែងឆ្លើយតបឱ្យកាន់តែចាស់ដៃ ក្រោយសហរដ្ឋអាមេរិកបើកការវាយប្រហារជាថ្មីប្រឆាំងនឹងក្រុមប្រដាប់អាវុធនៃប្រទេសយេម៉ែនមួយនេះកាលពីថ្ងៃសៅរ៍ ចំពេលដែលភាពតានតឹងនៅមជ្ឈិមបូព៌ាកាន់តែកើនឡើង។ នេះបើតាមការរាយការណ៍របស់ទីភ្នាក់ងារសារព័ត៌មានរ៉យទ័រ។
អ្នកនាំពាក្យក្រុមហ៊ូធី លោក NasruldeenAmer បានប្រាប់បណ្ដាញព័ត៌មាន Al Jazeera ថា ការវាយប្រហារចុងក្រោយរបស់អាមេរិក មិនបង្កការរងរបួស ឬការខូតខាតសម្ភារអ្វីទេ។ លោកបន្តថា ក្រុមហ៊ូធី នឹងមាន «ការឆ្លើយតបឱ្យម៉ឺងម៉ាត់ ខ្លាំង និងត្រូវគោលដៅ»។
ចំណែកឯអ្នកនាំពាក្យរបស់ហ៊ូធី ម្នាក់ទៀត លោក Mohammed Abdulsalam បានប្រាប់រ៉យទ័រថា ការវាយប្រហារ រួមទាំងការវាយប្រហារពេល ១ យប់ ទៅលើមូលដ្ឋានយោធាក្នុងទីក្រុងសាណា មិនបង្កផលប៉ះពាល់ខ្លាំងដល់សមត្ថភាពរបស់ក្រុមហ៊ូធី ក្នុងការរាំងផ្លូវនាវាដែលពាក់ព័ន្ធនឹងអ៊ីស្រាអែល មិនឱ្យឆ្លងកាត់សមុទ្រក្រហម និងសមុទ្រអារ៉ាប់ឡើយ។ យ៉ាងណាមិញ ការវាយប្រហារកាលពីថ្ងៃសុក្របានសម្លាប់សកម្មប្រយុទ្ធហ៊ូធីយ៉ាងហោចណាស់ ៥នាក់។
ការវាយប្រហាររបស់អាមេរិក បានបន្ថែមការព្រួយបារម្ភពីកំណើនភាពតាននៃជម្លោះដែលបានរីករាលដាលនៅមជ្ឈិមបូព៌ា ចាប់តាំងពីសង្រ្គាមបច្ចុប្បន្នរវាងក្រុមសកម្មប្រយុទ្ធប៉ាឡេស្ទីនហាម៉ាស់ និងអ៊ីស្រាអែល ផ្ទុះឡើងនៅដើមខែតុលា ឆ្នាំមុន។
ការវាយប្រហារជាថ្មីកាលពីថ្ងៃសៅរ៍ ដែលអាមេរិកអះអាងថា ជាទីតាំងរ៉ាដាមួយរបស់ក្រុមហ៊ូធី បានកើតឡើងតែ១ថ្ងៃប៉ុណ្ណោះ បន្ទាប់ពីអាមេរិក និងអង់គ្លេស បានបើកការវាយប្រហាររាប់សិបលើក ទៅលើទីតាំងយោធារបស់ក្រុមសកម្មប្រយុទ្ធដដែលនេះក្នុងប្រទេសយេម៉ែន កាលពីថ្ងៃសុក្រ។
អ្នកនាំពាក្យសេតវិមាន លោក ចន ឃើរប៊ី បានថ្លែងថា ការវាយប្រហារនោះ បានបង្កការខូតខាតដល់សមត្ថភាពផ្ទុក បាញ់បង្ហោះ និងបញ្ជាមីស៊ីល ឬដ្រូន ដែលប្រើដើម្បីវាយប្រហារលើនាវាដឹកជញ្ជូនពាណិជ្ជកម្មនៅសមុទ្រក្រហម។
អាមេរិក និងសម្ព័ន្ធមិត្ត បាននិយាយថា ការវាយប្រហាររបស់ខ្លួននៅយេម៉ែន គឺជាការឆ្លើយតបទៅនឹងសកម្មភាពរបស់ក្រុមហ៊ូធី ដែលវាយប្រហារប្រឆាំងនឹងនាវាដឹកជញ្ជូនទំនិញពាណិជ្ជកម្មកាត់សមុទ្រក្រហម ដើម្បីបង្ហាញការគាំទ្រដល់ក្រុមហាម៉ាស់។ ក្រុមប្រដាប់អាវុធដែលគាំទ្រដោយប្រទេសអ៊ីរ៉ង់មួយនេះ អះអាងថា ខ្លួននឹងឈប់វាយប្រហារ លុះត្រាតែអ៊ីស្រាអែលលែងវាយប្រហារនៅហ្គាហ្សា៕
